ئەندامەكێ لیژنا ئابووری: پێشنیاز هاتیەكرن سفرێن دینارا ئیراقی نەمینن
ئەڤرۆ
قائید میرۆ:
ئەندامەكێ لیژنا ئابووری ل پەرلەمانێ عێراقێ ئاشكراكر، پێشنیاز هاتیەكرن بۆ بانكا ناڤەندی سفرێن سەر دینارا عێراقی بهێنە لابرن و دبێژیت، چەندین پێشنیاز هاتینەكرن مامەلەكرن ب ئەرد و خانیان و بازاڕ ب گشتی ببیتە دینار نەك دۆلار، د هەمبەر دا عیراق پارێ سەد هزاری چاپ بكەت.
سیپان شێروانی، ئەندامێ لیژنا ئابووری ل پەرلەمانێ عێراقێ بۆ رۆژناما ئەڤرۆ دیار كر “مە داخواز ل بانكا ناڤەندی كریە چاوا ئاریشا هنارتنا دۆلاری بۆ دەرڤە هاتیە چارەسەركرن، ل بازاڕێن نافخۆ ژی ئاریشە بهێتە چارەسەركرن، چونكە زۆربەیا ئەو تشتێ ل نافخۆیا عیراقێ ب پارەیەكێ زۆر كڕین و فرۆتن پێ دهێتەكرن ب دۆلاریە نەك دینارێ عیراقی.
زێدەتر گۆت: بۆ نموونە كڕین و فرۆتنا ئەرد و خانیان و بازرگانیا تڕۆمبێلان هەموو ب دۆلاریە، ب تایبەتی 15 بۆ 20 سالانە بازرگانیێ ب دۆلاری دكەن، ئەڤە ژی بۆ ڤێ چەندێ ڤەدگەڕیت دۆلار بۆ ئینان و برنێ و هەلگرتنێ سڤكترە ژ پارێ عێراقی، ئەگەر وەلاتیەك كارێ كڕین و فرۆتنا خانیان بكەت دڤێت فەردەكێ پارەی دگەل خۆ بینیت و ببەت، بەرۆڤاژی ئەگەر دۆلاربیت ئەڤە زۆر ناكەت و زۆر ساناهیترە ژ پارەی، ب كورتی حساب و كیتابێن پارەی زۆر ب زەحمەتە هەگەر كەسەك بازرگانیەكا مەزن بكەت، پێدڤیە تڕۆمبێلەكا تژی پارێ عێراقی دگەل خوە ببەت، مە پێشنیاز كریە چارەسەریا بلەز بۆ گۆهۆڕینا دۆلاری بۆ پارێ عێراقی بهێتەكرن.
سیپان شێروانی ئاماژەكر “دوو پێشنیازێن دی هاتینەكرن بۆ داهاتی كار ل سەر بهێتەكرن ژلایێ بانكا ناڤەندیا عێراقێ، ئەو ژی لادانا سفرێن سەر پارێ عیراقیە، واتە ئێك هزار ببیتە ئێك دینار، پێشنیاریا دوویێ ئەڤە عێراق 100 هزاریا چاپ بكەت، چونكە ب دیتنا من وەك شارەزایەك چاپكرنا 100 هزاریا دێ هەتا رادەكی چارەسەریا بابەتێ كڕین و فرۆتنێ ب دینارا عێراقی كەت بۆ نموونە تشتەكی بكڕی ب 10 ملیۆن دیناران ئەڤە تنێ دێ سەد وەرەقە پێدڤی بین ئەگەر بهێت و 100 هزار بهێنە چاپ كرن، ئەڤە هەموو چارەسەرینە بۆ رەوشا بازاڕێ عێراقێ و كێمكرنا كاریگەریێن بلندبوونا دۆلاری، ئەم گەشبینین دێ داهاتی پێنگاڤێن زۆر باش بهێنە هاڤێتن بۆ چارەسەركرنا ئەو قەیرانا نوكە عێراق ڤەگرتی ب ئەگەرێ بلندبوونا بهایێ دۆلاری.
