ئەندامەکێ بەرێ یێ پەرلەمانێ تورکیا: گەلەک کەس د ناڤ ئاکپارتیێ دا داخوازا چارەسەرکرنا پرسا کوردی دکەن
ب، سەرجان مەحمود:
سڕی ساکیک ئەندامێ بەرێ یێ پەرلەمانێ تورکیا ژ لیستا ھەدەپێ د داخۆیانیەکێ دا راگەھاند کو نھا د ناڤ ئاکپارتیێ دا ھژمارەک زێدە کەس ھەنە کو ل دژی سیاسەتا نھا یا ئاکپارتیێ نە و گۆت: (د ناڤ ئاکپارتیێ دا کەسایەتیێن ناڤدار یێن وەک جەمیل چیچەک سەرۆکێ بەرێ یێ پەرلەمانێ تورکیا و شیرەتکارێ سەرۆک کۆمارێ تورکیا و بولەند ئارنج جێگرێ سەرۆکێ ئاکپارتیێ ئێدی ب ئاشکرا دبێژن کو دڤێت حوکمەت سەلاحەدین دەمیرتاشی ئازاد بکەت و بریارێن دادگەھا ئورۆپا بجە بکەت و داخۆیانیێن ب ڤی رەنگی نیشا ددەن کو د ناڤ دەستھەلاتێ دا ژی کەسێن دخوازن ب دیالۆگێ پرسا کوردی چارەسەر بکەن زێدەتر دبین و ئێدی دەنگێ خوە بلند دکەن و ئەو یەک پێشھاتەکا گەلەک گرنگە).
سڕی ساکیک ھەروەسا راگەھاند ژی کو دەستھەلات و ھەڤالبەندا وێ پارتا نەتەوەپەرست ھەول ددەن ھەدەپە بھێتە داخستن لێ ئەڤ داخوازا وان چو ئەنجامێن خوە نابیت چونکو ب دەھان پارتێن کورد داخستن لێ پرسگرێکا کوردی ب ھێزتر و دژوارتر لێ ھات و ھەتا نھا ژی ژ بەر پرسا کوردی رەوشا ناڤخوەیی یا تورکیا ئالۆز بوویە و گۆت: (سیاسەتا دەولەتا تورکیا ئەوە کو ھەردەم دڤێت کوردان بێی رۆل بھێلیت لێ ئەزموونێن چەندین سالێن بۆری ئەو یەک سەلماندن کو بێی کوردان نەشێن چو پێنگاڤەکێ ب ھاڤێژن و نەچارن پرسا کوردی چارەسەر بکەن و ئەز وەسائا دبینم د رەوشا نھا دا د ناڤ ئاکپارتیێ دا ژی گەلەک کەس ھەنە دخوازن پرسگرێکا کوردی ب دیالۆگێ بھێتە چارەسەر کرن و ژ بەر ڤێ چەندێ دڤێت ئالیێ کوردی ئانکۆ ھەدەپە رژدیێ د دیالۆگێ دا بکەت و دڤێت ھەر کەس و ئالیەک بزانیت کو ھەتا پرسا کوردی چارەسەر نەبیت چو پرسێن دی یێن تورکیا ژی ناھێنە چارەسەر کەن، ئانکۆ تورکیا ب چارەسەرکرنا پرسا کوردی دێ ب ھێز کەڤیت و لاواز نابیت).
سەبارەت ب رەوشا سیاسی و ئابووریا تورکیا ژی سڕی ساکیک راگەھاند کو نھا ژ ھەر دەمەکێ زێدەتر بێکاری ھەیە و ھەژاری ل ھەموو ئالیێ تورکیا بەلاڤ بوویە و نەرازیبوونەکا مەزن د ناڤ ئالیگرێن ئاکپارتیێ دا ژی دروست بوویە و گۆت: (رەوشا تورکیا ل بەر چاڤانە و ھەر کەس ھەم ژ پارێ کو دکەڤیتە دەستێ خوە و ھەم ژی ژ بەر بێکاریێ نەرازیە و دیسان گەندەلیا کو د ناڤ سازیێن دەولەتێ دا بەلاڤ بوویە کاریگەریا خوە ل ھەموو تورکیا دکەت و خالا دی ژی نەبوونا دادوەریێ یە کو زیانەکا مەزن گەھاندیە ھەموو جڤاکێ و ئەز باوەر دکەم پرانیا ئالیگرێن ئاکپارتیێ ژی ئێدی وەسا دبینن کو دەمێ چوونا دەستھەلاتا ئاکپارتیێ و مەھەپێ ھاتیە).
د دووماھیا ئاخڤتنا خوە دا ژی سڕی ساکیک راگەھاند کو حەفتانە کۆمپانیێن راپرسیان د ناڤ خەلکی دا راپرسیان دکەن و ل دووڤ ئەنجامێن راپرسیان دەنگێ ھەڤپەیمانیا ئاکپارتیێ و مەھەپێ رۆژ ب رۆژێ کێمتر دبیت و جودابوون ئانکۆ ڤەقەتیانێن ژ ئاکپارتیێ گەلەک زێدە بووینە و د ناڤ سالا بۆری دا ئەحمەد داوود ئوگلۆ سەرۆک وەزیرێن بەرێ و عەلی باباجان وەزیرێ بەرێ یێ ئابووریێ ژ ئاکپارتیێ جودا بوون و دو پارتێن نوو ئاڤا کرینە و گۆت: (ئانکۆ نھا پێگەھێ ئاکپارتیێ گەلەک لاواز بوویە، وەکو بەرێ خەلک باوەریا خوە ب ئەردۆگانی و ئاکپارتیێ نائینن و بۆ وان ژی ئاشکرا بوویە کو ئێدی ئاکپارتی نەشێت تورکیا برێڤە ببەت، رەوش گەلەک ئالۆزە و ئەو یەک ژی نیشا ددەت کو ئاکپارتی ژی وەکو دەستھەلاتێن بەری نھا ل تورکیا بەر ب نەمانێ ڤە دچیت).
