ئەنفال
خالد عەلی سلێڤانەیی
بیابانێن باشوور و ناڤەراستا وەلاتێ هەنێ
تژی مرۆڤن؛ ژن و زارۆك و زەلامن
د لبێن خیزی دا دبن بابەلیسك
رەشەبایەكێ تۆرەبووی دئافرینن
نفرەتا ل گۆڕێن كۆژەكێن خوە دكەن
ب ئێك قێری دلێ ئەسمانان دهەژینن.
:: :: ::
بیابانێن باشوور و ناڤەراستا وەلاتێ هەنێ
دگەل چیا دئاخڤن، لێبۆرینێ دخوازن
خوە دچەمینن، هندی دهێن و نەشێن
دۆزەخا تاوانێن نفشێ پیسێ ئەنفالچیان
ژ سەر ناڤێ خوە بڤەمرینن.
:: :: ::
د بیابانێن باشوور و ناڤەراستا وەلاتێ هەنێ دا
بێهنا سێڤا، شیرێ ساڤا، بسكێن زاراڤ و لەوەندی
شاشك و شویتك شەپك و دەستێن
ب كەزاخا مێوان ڤە زڤڕ بووین
ب زمانێ كوردی سەرێ یاسایێن جیهانێ
دپرچقینن.
:: :: ::
بیابانێن باشوور و ناڤەراستا وەلاتێ هەنێ
دێمێن بها، ژ گەلەك جها هەمبێز دكەن
دبێژن ئەم ساخ و نەمرن، هەمی جیهانێ ڤەدگرن و
وەك بالندا هنداڤ كوردستانێ دفڕن
دبن خەونێن نها و مزگینیا سال و مها
دێ بۆ مە راگەهینن.
