ئەوا ژ ساخكرنا رۆژەكێ گرنگتر
نەسرین یوسف
ئەگەر بەرپەرێن رۆژژمێرا دیرۆكا گەلێ خۆ ڤەدین، دێ گەلەك رۆژێن گرنگ بینین كو گرنگە بهێنە ساخكرن، ئەوا راست بیت د بیرئینانا ڤان رۆژان دا؛ سالانە هیچ كێماسی نە هاتیەكرن، ئێك ژ ڤان رۆژان ژی رۆژا ئالایێ كوردستانێ یە كو سالانە هەڤدەیی مەها كانوونا ئێكێ ب رێورەسم و رەنگێن جودا دهێتە بیرئینان،
بەلێ پرسیارا گرنگ ئەڤەیە، ئەرێ بیرئینان بۆ رۆژەكێ یان چەند رۆژەكا بۆ سیمبۆلا مللەتەكی كو ئالایە بتنێ بەسە؟.
ئەڤ پرسیارە د دەمەكی دایە ئەگەر بۆ مللەتێن دیتر ل جیهانێ؛ ئالا هەما پاتەیەكێ چەند رەنگی بیت و یێ پیرۆز بیت، باشە پا ئالایێ كوردستانێ كو هندی رۆژێن دیرۆكا خۆ یا درێژ و دێرین بیرئینان و بلند راگرتنا وی چەند گرنگە؟ ئەز بێژم پەیڤ تێرا بەرسڤێ ناكەن؛ هەما هەر كەسەك ئەگەر لسەر ملێ خۆ بزڤریت دیرۆكا باپیرێ خۆ ببینیت دێ زانیت بۆ كوردان و بۆ كوردستانێ ئەڤی ئالایێ رەنگین چ رامانەك هەیە و رەنگێن وی چ فەلسەفەیا قوربانیدانێ دهەلگرن؟
ئەڤجا د رۆژەكا هۆسا دا گرنگە بهێتە زانین بیرئانین بۆ چەند رۆژ و دەمژمێران تێرا زیندی مانێ ناكەت، بەلكو پێدڤی یە پشتی تەكنۆلۆژیا گەهشتیە گوپیتكێ، زارۆك و سنێلە و گەنجێ مە؛ كەفتیە د بن سیبەرا وێ ڤە، پێدڤی یە هزر بهێتەكرن د ناڤ ڤێ شێل و بێلا جیهانێ دا؛ د ناڤ ڤی كاروانێ ب لەزێ پێشڤەچوونێ دا، چاوا ئالایی ژ سەر ملا بۆ ناڤ دلا ڤەگوهێزین؟ چاوا ئالایی ژ بەر تیرۆژكێن هەتاڤێ ل سەر بانێ فەرمانگەهەكێ بكەینە د مۆبایلا گەنجەكی دا و د هزرا وی دا بكەینە پیرۆزی،
ئەڤ ئەركە ل گەل هندێ كو ئەركێ مە هەمیانە، چ تاك چ مالبات چ ژی هەر كەسەك د بازنەیێ كارێ خۆ دا، لێ پشكا شێری یا ڤی ئەركی دبیتە بەهرا سازیێن پەروەردەیی و رەوشەنبیری، داكو بۆ ئەڤرۆ ژی هشیاری پەیدا ببیت و بۆ سوباهیا دویر ژی بنەمایەكێ هزری بۆ بەرەبابێن سەردەم بهێتەدانان، داكو بۆ دەمێن درێژ هەمی پیرۆزیێن ڤی گەلی كو ئێك ژ وان ئالایە بلند پیرۆز و راگرتی بمینت.
