ئەوێن شیانێن په‌روه‌رده‌كرنێ نه‌بن نابیت زارۆك هەبن
هەولێر، قائید میرۆ:
بسپۆره‌كا نوشداریا داد بۆ ڕۆژناما ئەڤرۆ دیار کر کو ئه‌و تاوانێن ل چه‌ند رۆژێن بۆری هاتینه ئه‌نجامدان بۆ خراب په‌روه‌رده‌كرنێ ڤه‌دگه‌ڕیت و گۆت: ده‌مێ زارۆك خەلەت دهێته په‌روه‌رده‌كرن به‌رهه‌مێ ئه‌ڤی زارۆكی دێ ئه‌ڤه بیت و تاوانێن هوڤانه ئه‌نجام ده‌ت.
دكتۆر دیلمان ئازاد، بسپۆرا نوشداریا دادوه‌ری دیار کر، ئەو تاوانێن به‌ری چه‌ند رۆژان په‌یدابووین و هژماره‌كا وه‌لاتیان ب کۆم هاتینه كوشتن ئەڤە بەلگەیە کو هێشتا گونه‌هبار هه‌نه دناڤ جڤاكی، چونكه په‌روه‌رده‌یا توندوتیژ و دڕنده كه‌سێن دڕنده و توندوتیژ به‌رهه‌م دئینیت.
د. دیلمانێ گۆت: (له‌وڕا ژی كه‌سێن خەلەت هاتینه په‌روه‌رده کرن دێ زۆر مالێن دیژی وێران كه‌ن، بدیتنا من ژینگه‌هـ و په‌روه‌رده‌یا ساخله‌م جڤاكه‌كێ ساخله‌م بەرهەم دئینیت، ده‌مێ كه‌سه‌ك دئاخڤیت دیار دبیت کا چاوا هاتیه په‌روه‌رده‌كرن).
د. دیلمانێ ئەو چەندە ژی گۆت: (كاره‌سات ڤێره ده‌ستپێدكه‌ت ده‌مێ هنده‌ك دبێژن به‌رێ دو شه‌قا زارۆك دهاته په‌روه‌رده‌كرن، زارۆك ب ئێك زلەهـ دهاته بێده‌نگ كرن، راسته بۆ ده‌مه‌كێ كێم ب لێدانا زله‌یه‌كێ زارۆك بێده‌نگ دبیت و سه‌ركه‌فتنه‌كا ده‌مكیه، به‌لێ بۆ هه‌تا هه‌تا شكه‌ستنه بۆ ئه‌ڤی زارۆكی، له‌وڕا ژی زارۆك وی ده‌می دێ ده‌لیڤه‌یه‌كێ گه‌ڕیت هه‌تا بشێت حه‌زێن خۆ ڤالا بكه‌ت و پاشه‌ڕۆژێ ژی دێ زارۆكه‌كێ توندوتیژ به‌رهه‌م ئینیت).
دكتۆر دیلمان ئازاد د بەردەوامیا ئاخفتنێن خۆدا دیار کر کو، دناڤا په‌روه‌رده‌كرنا به‌رێ توندوتیژی هه‌بوو، لێ مخابن دایك و بابێن نوكه هێزا په‌روه‌رده‌كرنێ هه‌ر نه‌مایه و رێكێ نیشا زارۆكێن خۆ ناده‌ن و هه‌موو دایك و بابێن نوكه دبێژن مه چو ده‌ستهه‌لات نینه هه‌مبه‌ری زارۆكێن خۆ.
بسپۆرا نوشداریا دادوه‌ری گۆتژی: (ب دیتنا من په‌روه‌رده‌كرن هونه‌ره، ئانکو هه‌ر كه‌سه‌كێ بشێت زارۆكێن خۆ په‌روه‌رده بكه‌ت دیار دبیت کو ئه‌ڤه دایك و بابە كه‌سێن زانانه، به‌رۆڤاژی ئەو دایك و بابێن نه‌شێن زارۆكێن خۆ په‌روه‌رده بكه‌ن ئه‌ڤه نیشانێن وێ چه‌ندێ نه کو شیانێن په‌روه‌رده‌كرنا زارۆكان نین و نابیت ئه‌و كه‌سه زارۆكا به‌رهه‌م بینن، چونكه دێ بنه ئه‌گه‌رێ تێكدانا جڤاكی و خێزانێن دیژی دێ خراب كه‌ن ب په‌روه‌رده‌یا خراب، چونكه خودانكرنا زارۆكی مافێ زارۆكیه، به‌لێ په‌روه‌رده‌كرنا زارۆكی ئه‌ركێ دایك و بابانه).
