ئەو ئاریشەیێن ب درێژیا ھەیڤا رەمەزانێ بۆ رۆژیگران پەیدادبن
ئه‌ڤرۆ نيوز:
رۆژیگر تووشی ھندەک ئاریشەیێن سڤک دبن و دبنە ئەگەرێ ھندەک نەخوشیان ژ ئەنجامێ کێمبوونا خوارنێ و ڤەخوارنێ، ژ گرنگترین وان ئاریشەیان ژی:
١- ئێشانا سەری: سەرئێشان پەیدادبیت ژ ئەنجامێ کێمبوونا رێژا شەکرێ دخوینێ دا ژ ئەگەرێ راوەستیانێ ژ خوارنا کەرستەیێن شرین ئەوێن دبنە ھاندەر بۆ بەرھەمئینانا ھێزێ یان ژ ئەنجامێ راوەستیانێ ژ کارئینانا جگارەیان ل دەڤ جگارکێشان یان نەڤەخوارنا چایێ و ڤەھوێ کو کەرستێ کافایین دناڤدا ھەیە و کارتێکرنێ ل کوئەندامێ دەماران دکەت. چارەسەری ژی ئەوە کو بێھنڤەدان ھەبیت و گەلەک لەشێ خۆ نەوەستینن و گەلەک نەچنە ل بەر روناھی و دناڤ قەرەبالغێ دا، ل گەل ڤێ چەندێ ژی باشترە رۆژیگر تەڤاڤیا لەشێ خۆ ژ تشتێن شرین دماوەیێن فتارێ و پاشیڤێ دا وەربگریت.
٢- عێلنجی: عێلنجی پەیدادبن ژ ئەنجامێ ھاتنەخوارا فشارا سروشتی دناڤ رووڤیکان دا، ئەوژی ل دەمێ مرۆڤ بەرئاتافی بێھنەکا نەخوش یان دیمەنەکێ نەجوان دبیت، یان ژ ئەنجامێ ئێشانەکا دژوار یان وەستیانێ د ماوێ رۆژیگرتنێ دا دبیت، بۆ چارەسەریێ نوشدار شیرەتان ل مە دکەن ھەناسەیا خۆ ھێدی و کوور ب ھلکێشین، ب مەرجەکی کو ھلکێشانا بێھنێ ب رێیا دفنێ بیت و بەردان ب رێیا دەڤی بیت، و گەلەک جاران ڤێ کریارێ دوبارە بکەن دماوێ رۆژیگرتنێ دا و باشترە سەرێ مرۆڤی یێ چەماندی بیت داکو دلرابوون پەیدانەبیت، ھەروەسان شیرەتان دکەن کو پشتی فتارێ دەرزیکێن ( بی ٦) بھێنە دانان.
٣- گێژبوون: گەلەک جاران رۆژیگر تووشی گیژبوونا ژ نشکان ڤە دبیت، ب تایبەت ھەکە ب لەز راببیت، بۆ چارەسەریێ دشیاندایە رۆژیگر ھێدیانە راببیت و گەلەک ئاڤێ ڤەخوت داکو کارێ خولا خویناوی دروست ببیت و بشێت خوینێ پالدەت بۆ مێشکی.
٤- تێکچوونا دیتنێ: ئەوژی پێکھاتیە ژ تەنگەزاریێن دیتنێ و شێلیبوونا چازان و پشتی رۆژیگر فتارێ دکەت د پتریا جاران دا ئەڤ چەندە نامینیت.
٥- ھشکبوون: ژ ئەنجامێ کێمبوونا رێژا ئاڤێ ھشکبوون پەیدادبیت، ئەوژی ل دەمێ مرۆڤ گەلەک ل بەر تاڤێ ب راوەستیت و ژ نیشانێن وێژی ھشکبوونا دەڤی و مرۆڤ حەز دکەت دلێ خۆ راکەت و لێدانێن دلی زێدە دھێنە لێدان و زەڤلەکێن لەشی دئێشن. بۆ چارەسەریێ ژی پێدڤیە ئاڤ و شلەمەنیێن کەل گەلەک بھێنە ڤەخوارن و خوارنێن ترش و تیژ نەھێنە خوارن.
