ئەو بیابانا سیبەرا وێ ب پشتا من ڤە مای
سالح دۆسكی
د شەڤەكا وەك شووشەیا شین،
دمەشیام
وەك شاخەكێ سپی
ناڤێ خۆ دبیژم..
ل سەر لیێڤا بای..
باژێران ل هنداڤ دكرن كەنی
تبلێن خۆ یێن ئاسنی بلند دكرن
و ب بێدەنگی ژ من دپرسین:
تە بۆچی دلێ خۆ هێلا،
ئەی رێڤینگێ بار بیردانك؟
مستەك سپی ژ بەفرێ د پاخلا مندا بوو
من ژ كێلبێن هەتاڤا رەش ڤەشارتن،
و خەونەكا بنەفشی
مینا رۆناهیا فانۆسەكا كەڤنار
ب سەر چاڤێن مندا بۆری..
من نە دزانی ئەزم دمەشم
یان رێك خۆ دگەهینن ئێك
یا من دڤیا ب تنێ
ئەو بوو:
بەفرێ دناڤ لبێن خێزێ بیابانێ دا
ب كێمترین حەلیان بگەهینم كۆپیتكێ
و دێمێ نێرگزا پێ شاد كەمەڤە..
بیابان ژی بخۆ دزانن
(وێلی وێلی – ئا یا وێلی)
چ جارا نابنە
(دایێ وەلات شرینە
بابۆ وەلات شرینە).
