ئەو توندوتیژییا ل یاریگەها ئاكرێ چێبووی نە رازیبوون پەیدا كر
رەمەزان زەكەریا
ژ نشكەكێ ڤە پشتی یارییا دناڤبەرا یانەیا ئاكرێ و یانەیا هەولێرێ ئەوا ژ چارچووڤەیێ هەڤڕكیێن گەڕا 17ێ یا خولا پلا نایابا كوردستانێ ئەوا ب سەركەفتنا هەولێرێ ب گۆلەكێ ب دووماهی هاتی، توندوتیژی دناڤ یاریگەهێ پەیدابوو و گەهشتە یاریزان و كارگێرێن هەردو تیمان،ئەڤچەندە بوو جهێ نە ڕازیبوونا هەموولایەكی و فدراسیۆنا فوتبۆلا كوردستانێ دیاركر دێ ل دووڤ ڕێنمایان سەرەدەریی دگەل ڤێ روودانێ كەن.
سوهەیب عەلی پەیڤدارێ یانەیا ئاكرێ بۆ رۆژنامەیا ئەڤرۆ گۆت: ب هیچ ڕەنگەكە دگەل توندوتیژیێ نینن، پشتی یاریزانەكێ یانەیا هەولێرێ ڕەفتارێن نەشرین بەرامبەر پشتەڤانێن یانەیا ئاكرێ كری ئەڤچەندە بۆ ئەگەرێ شەڕ و ئاڵوزی پەیدا بیت،ب مخابنی ڤە ئەڤچەندە بوو ئەگەر زیانێن گیانی هەبن، ئەم دگەل ڤان توند و تیژیان نینن ب هیڤی نە فدراسیۆنا فوتبۆلا كوردستانێ ب ووردی دۆڤچوونێ بكەن و ل دووڤ ڕێنمایان ئەنجام بهێتە دیار كرن.
ژلایێ خوەڤە ئازاد محەمەد سەعید ئەندامێ فدراسیۆنا فوتبۆلا كوردستانێ ژی بۆ ئەڤرۆ گۆت: بەری دەستپێكرنا هەر وەرزەكی مە ڕێنما هەنە وەكو كۆراسەیەك بۆ هەموو یانەیان ل بەر دەستە سز ا و هەموو خال هەر بەندەكێ سزایێ خوە هەیە.
ناڤبری گۆتژی: دەمێ یاریێ چو ئاریشە دژی دادڤان و هە دو تیما نەبووینە، لێ پشتی یاری ب دووماهی هاتی پشتەڤان هاتینە دناڤ یاریگەهێ دا و ئالۆزی دروستكریە،چو بڕیارێن بلەز ناهێتە دان ڕەنگە ب تنێ ل وێ گڕژیا دروستبووی پشتەڤان بهێنە سزادان ل گۆر برگەیێن یاسایێن فدراسیۆنا فوتبۆلا كوردستانێ، بڕیارە ئەڤرۆ هەتا سوبەهی كۆمبوونەكا تایبەت یا فدراسیۆنی بهێتە ئەنجامدان، ل سەر ڕاپۆرتێن سەرپەرشتێ تیمێ و دادڤانان و ڤەدیتنا وێنە و ڤیدیۆیان ل دووماهیێ بریارێ ل سەر وێ روودانێ بهێتە دان، ب هیچ ڕەنگەكی ئەم قەبوول ناكەین خولا كوردستانێ یا جوان و پێشكەفتی هندەك ببنە ئەگەر سیمایێ وێ ب گوهۆڕن.
