ئەو سەرەدەریا ل هەوالگێریا زاخۆ ل گەل مە دكر خوە مرۆڤ وێ ل گەل گیانەوەران ژی ناكەت
دیدار، سالار محەمەد دۆسكی:
2-3
هەمان زیندانیێ سیاسی گۆت: ئەوێن ئەم دقوتاین زێدەتر توركمان و عەرەب بوون، و هەر چ دلوڤانی ب نەدبر و دیسا كورد ژی ل گەل هەبوون، و ب زمانێ كوردی ئاخفتن دگۆتنە مە و سەركردێن مللەتێ مە.
هەمان زیندانیێ سیاسی گۆت: دەمێ حوكمەتا بەعس چووبا گوندا یێ پێشمەرگەبا یان پیشمەرگە نەبا دەستەسەر دكر، و ئەسكەنجەدان و قوتان وی دەمی ئەوا زورداریەكا مەزن ل خەلكێ مە دكر، و بخوە دشیانە خەلكی و تەڤیابا نەڤیابا دڤێت تە دانپیدان وەكی ئەوا دڤێت كربا و هندەكا دانپیدان نەدكر و گەلەك جاران هندەك مرۆڤ دگرتن، و ژوورەكا بچیك ئەم نێزیكی (30) مرۆڤان تێدا بووین و هەر جهێ روینشتنێ نەبوو، و هەمی زێرەڤانێن مە كورد بوون ئێكێ پیرۆمەری بوو، ڤێ دوماهیێ ل فەرمانگەها كارەبێ بوو و ئێكێ دی كریستیان بوو و ئێك یێ كورێمەی بوو زێرەڤان بوو، و هەمان دەم رێكخستنێن نهێنی بوو سەر ب پارتی دیموكراتی كوردستان ڤە، و گۆت بتنێ من پێ چ بیت دێ هەوە ئازاد بكەم، جارەكێ مە داخوازا دیتنا مرۆڤێت خوە كر و مرۆڤێن مە هاتن و چوون دكر، و جارەكێ مالا مە هاتن و مە داخوازا مشارەكی كر چونكە پەنجەرەكا مەزن ل زیندانێ هەبوو و مە گۆت دێ وان شیشكا برین و دێ ب شەڤێ دەركەڤین، وی دەمی مالا مە هەمی ل دەڤەرێن ئازادكری بوو دناڤا پێشمەرگەی دا، و هندەك مرۆڤێن مە ل دهۆك هەبوون ئەو ژی نەوێریان بهێن و بتنێ مرۆڤێن هەڤالێ من حەجی سەرەدانا مە ل زیندانێ دكر، و دەمێ مە داخوازا مشاری كری و بوو مە ئینای و مرۆڤێن مە چوون و زێرەڤانا مشار د دەستێ مە دا گرت، و ئەڤجا ئەم هند قوتاین هند قوتاین و گەلەك ئێشاندین و ئێدی ب چاڤەكێ گەلەك نزمتر تەماشەی مە دكرن، و سالەك دەرباز بوو ئەم ماینە هەوالگێری یا زاخۆ و جهێ روینشتنێ نەبوو، و جهێ دەستئاڤێ هەر د ژۆرێ دا بوو و سەرەدەرییا وان یا ب وی رەنگی بوو خوە مرۆڤ ل گەل گیانەوەران ژی ناكەت.
رۆژەكێ ئەفسەرەكێ ئیراقێ و گازی من كر و گۆت: بێژنە (موحسن ئاغای) بلا بهێت خوە رادەستی مە بكەت، وەعد بیت ئەم هەوە هەمی یا ئازاد بكەین، مە گۆتێ ئەم زیندان كرین ما دێ چەوا گەهینە موحسن ؟ گۆت بێژنە مالێن خوە ئەوێن سەرەدانا هەوە دكەن، من گۆتێ موحسن ل چیایە ما دێ چەوا مالێن مە گەهنە چیایی؟ كەسەك نەوێریت دەرباز بیت و من گۆتێ هووین دشێن نامەكێ بگەهینێ و ئاگەهدار بكەن، كو هندەك پێشمەرگە دەستە سەركرینە و ئەگەر خوە رادەست نەكەت، و رەنگە حوكمەت سزایەكێ دژوار ب دانیتە بەر ئەڤان پێشمەرگان، پشتی ماوەكی ئەم ڤەگوهاستینە ئەمنا دهۆكێ و نێزیكی دو سال و نیڤا دەرباز بوو ئەم ل هەوالگێرییا زاخۆ و ئەمنا دهۆكێ و بەردەوام مرۆڤێن حەجی سەرەدانا وی دكر حەجی پسمامێ مە بوو هەر ئورەماری بوو، ئەمنا دهۆكێ ژی مە گەلەك نەخوشی و ئەشكەنجەدان، و نەخوشی دیتن و كارەب كرین، دوێن عەرەب ژی ل زیندانێ دا بوون رۆژەكێ ل سەر دیواری را سەحكرە حەوشا زیندانێ و زێرەڤانا دیتن و هاتن گۆتن ئەو كی بوون ئەوێن عەرەب گۆتێ ئەڤێن كورد بوون و ئەم گەلەك قوتاین و ئەشكەنجەداین و هەمان دەم ئەم نفستی بووین و ئەم برین و ئەم كارەب كرین و گەلەك قوتاین و هەر چ جورێ قوتانێ هەبوو ل گەل مە كر و ئەم هاڤێتینە ژوور ڤە، پشتی چەند شەڤ دەربازبووین ژ ئەڤێ قوتانێ رۆژەكێ گۆتن خوە بەرهەڤ بكەن دێ هێنە ڤەگوهاستن و مە ژی نەزانی دێ چینە كیڤە و مە خوە بەرهەفكر و ئێكسەر ب ترۆمبێلان ئەم ڤەگوهاستینە باژێرێ مویسل، و چەند شەڤ دەربازبوون و دوڤدا ڤەگوهاستینە ئەمنا گشتی یا بەغدا و ئەم هاڤتینە پشت حەفت دەرگەهان و دوڤدا ئیناینە دادگەهێ و دادگەها مە هاتە پاشخستن بۆ هەیڤا دوڤدا، وی دەمی گەلەكێ بچوویك ژی بووم و دادوەری گۆت سزا ناكەڤیتە سەر تە، چونكە نەب بوومە 18 سالی، ئەم ڤەگوهاستینە تەسفیراتا بەغدا و جورێن مرۆڤا تێدا هەبوون، ئالیەك زارۆك و سنێلە و ئالیەك ژن و ئالیەك مەزن و ژ هەمی جورێن مرۆڤان تێدا هەبوون، و ئەم نێزیكی 10 رۆژا ماینە وێرێ و گەلەك یا پیس بوو، شەڤەكێ گۆت خوە بەرهەڤ بكەن و جارەكا دی ئەم ڤەگوهاستینە ئەمنا دهۆكێ و نێزیكی هەیڤەكێ ماینە ئەمنا دهۆكێ، و دوڤدا ڤەگوهاستینە بنگەهێ پولیسان ل سەنتەرێ باژێری، و 10 رۆژا ماین و دوڤدا دەستێن من پشتێ گرێدان و ئێكسەر بۆ بەغدا و هاتینە رەوانەكرن بۆ تەسفیراتا و شەڤەكێ ماین و هاتینە رەوانەكرن بۆ ئەمنا گشتی و حەفت رۆژا ماین و رۆژەكێ ناڤێن مە خواندن و گۆتن خوە بەرهەڤ بكەن و ئێكسەر بۆ دادگەهێ و گازی من كر، و سێ كەس بەرامبەر من روینشتی نە (عەواد بەندەر) ل نیڤەكێ یێ روینشتی بوو، و دانپیدانێن من خواندن و من گۆتێ ئەڤە نە دانپیدانێن منن، گۆت چەوا ئەڤە نەدانپیدانێن تە نە؟ من گۆتێ وەكی هاتمە دەستەسەركرن سەرۆك كوماری (سەدام حسێن) عەفوو دا بوو، من گۆتە دادوەری مرۆڤەكی ئەڤ تشتە ل گەل من كریە و ناڤێ وی ئەڤەیە و مالا مە یا وی دوژمنایەتی ل گەل ئێك و دو هەیە وی نەڤیا خوە رادەستی حوكمەتێ بكەین، و ئارمانجا وی گرتنا مە بوو و بدەست ڤە ئینانا هندەك پاران بوو، ژ حوكمەتێ، دادوەری خواست سوند بخوەم و من ی گۆتێ من دەست نڤێژ نینە و دەستێ منێ پیسە، گۆت ژ دویر ڤە سووند بخوە من ژی سوند خار راستیێ بێژم، دادوەری گۆتی حوكمەتێ بووتە پارێزەرەك گرتیە و چ سەرتە ناچیت چونكە ژیێ تەیێ بچوویكە و پشتی ماوەكێ كورت دادوەری ل گەل هەر دو هەڤالێن خوە گەنگەشە كرین، و دوڤدا ناڤێ من چوو بەر سینگێ عەواد بەندەر و ناڤێ من خواند و گۆت: سزایێ تە دێ هەتا هەتایێ زیندانێ دابی و من گۆتێ مەمنونم، گۆت بێژی مەمنونم؟ من گۆتێ ما چێتر نینە ژ سێدارێ؟ گۆت بەلێ و رەنگە عەفویەك بهێت هوون بهێنە ئازادكرن، پشتی سزایێ من هاتیەدانان و كرمە دژورەكێ دا و ئێكسەر (محەمەد عەلی زاویتەی) برە دادگەهێ و سزایێ وی خواند سێدارەدان و دوڤدا ئینا دەف من و دەست و چاڤێن وی گرێدان وەك گورگا خوە لێدا، و بتنێ ئەڤ ئاخفتنە گۆتنە من و گۆت (سەبری) من گۆتێ بەلێ گۆت ئەز چووم و دێ من سێدارەدان و ئەگەر هووین ئازادبوون، و دەرگەتن پێش من ڤە پیچەك ئاخا كوردستانێ ماچی بكە، و من گۆتێ سوز بیت و ئێكسەر زڤراندە هولێ و هەر كەسەكێ نەهاتیە هولێ ئەو هاتە رەوانەكرن بۆ سێدارەدانێ، (حەسەن عەلی خەنجەر و عەبدولرەحمان رەسول) هاتن من گۆت كا (محەمە عەلی زاویتەی) من گۆتێ چوو سێدارەدانێ ، و گۆتن چ گۆت وەسیەتا وی من گۆتێ گۆتی پیچەك ئاخا كوردستانێ پێش من ڤە ماچی بكەن، ناڤێ حەجی خواند بۆ دادگەهێ و ئێكسەر هەڤالێ من كرە گری، و گۆت دێ هێمە سێدارەدان من گۆتێ نەترس ئەم پێكڤە گرتینە و سێدارەدان نابیت، و پشتی بریە دادگەهێ و چەندەك دەربازبووی زڤراند و ئەو ژی هاتە سزادان ب سزایێ هەتا هەتایێ ل زیندانێ دا، دووف دا (حەسەن عەلی خنجەر، تاها هلوری، عەبدولرەحمان رەسول، كەلەش).
