ئەو عاشقێ ژ بەر دئاخڤیت کیە و ساخلەتێن کەساتیا وی چنە؟
ئەڤرۆ نیوز:
ئەڤینی یا ھەی و عشق ژی یا ھەی، و ھەروەسا دلینیەکا ھەی وە دکەت مرۆڤ ژ بەر باخڤیت کو ڤان ھەمی رەنگێن ڤیانی ب رێیەکا ھشک تێکھەل دکەت.
ئەو چ تشتە بەرێ مرۆڤی ددەتە ڤی رەوشتی؟
د. سیما ھینگورانی شارەزایا ھەڤبەندیان دبێژیت: ئەو کەسێن ئەڤ جۆرێ رەوشتی ھشکباوەر ل نک پەیدا دبیت ئەون یێن ل قۆناغا زارۆینیا خوە ئەو ڤیانا پیدڤی بدەستخوەڤە نەئیناین، و ئەڤ چەندە رەنگڤەدانێ ل سەر کەساتیا وان دکەت دەمێ مەزن دبن. پارچا ژ ھەمیان خرابتر د ڤێ سەربارکا رەوشتی دا ئەوە کو دەمێ ئەو وێ چەندێ بدەستڤە نەئینیت یا وی بڤێت دبیت توندوتیژیێ بکاربینیت و دێ زیانا جەستەیی و مێشکی گەھینیتە لایەنێ دی.
دێ چاوا نیشانێن عاشقێ ژ بەر دئاخڤیت زانی؟
ھندەک رەفتارێن دیار یێن ھەین دبنە ئاماژە کو ئەڤ کەسە د عشقێ دا وەلێ ھاتیە ژ بەر باخڤیت و ژ وانان:
وەسا دێ خوە نێزیکی تە کەت ھەتا تە پۆسیدە دکەت ھەتا وی رادەی کو ھزر بکەی یێ ھێز و دەستھەلاتا خوە ل سەر تە دسەپینیت.
گەلەک نامە و ئیمیلان فریدکەت کو تامێ تێ ناھێلیت.
غیرەکا مەزن بۆ چێدبیت و بزاڤێ دکەت ھەمی کەسان ژ تە دوور بکەت.
گەفێن دەڤۆکی دکەت کو دێ زۆریێ ل تە کەت ھەکە تو ل گەل کەسەکێ دی ئاخفتی یان ھەکە کەسەکی خوە نێزیکی تە کر.
زۆریا جەستەیی یا بێ ئێشان دکەت وەکو گڤاشتنا دەستی یان پالدان بۆ راوەستاندنا لڤینا تە یان ژی دی پرچا تە گریت.
رێیێن خوە قۆرتال کرنێ ژ ڤی جۆرێ عاشقان:
زانایێن دەروونی وەسا ھزر دکەن کو دەمێ تو ھەست ب ھەبوونا کەسەکێ نەنیاس دکەی کو یێ ل دووڤ تە دھێت، یا باش ئەوە تو پشتگوە بھاڤێژی، و ھندەک پێرابوونێن ڤەبر بکەی، چونکو مرۆڤ نەشێن پێشبینیا رەفتارێن ڤی جۆرێ عاشقان بکەت، ئەو وەکو بومبەکا ڤەداینە و دبیت ل ھەر وەختەکی بپەقیت.
ھەکە تە ھەست پێ کر کو کەسەک یێ ل دووڤ تە دھێت و نامە و دیاریان بۆ تە دھنێریت سەرەرای کو تە داخواز ژێ کربیت کو وەنەکەت و تە نەڤێت ھەڤبەندیێ ل گەل بکەی، تو دشێی سکالایەکێ ل سەر تۆمار بکەی، ھەکە عەمرێ تە د بن 18 سالیێ دا بیت پێدڤیە تو دایک و بابێن خوە پێ ئاگەھدار بکەی و بابەتێ بۆ شرۆڤەکەی.
ھەکە ئەڤ کەسە ل ھەمی جھان ل دووڤ بھێت یا باش ئەوە ژ ھەڤالێن خوە دوور نەکەڤی ھەتا چارەکا گونجای بۆ دبینی.
ھەکە ڤی کەسی بزاڤ کر ل جھەکێ گشتی خوە نێزیکی تە کر و ڤیا ل گەل تە باخڤیت، پشتگوە نەھاڤێژە و پاشڤە نەبە و نەئێخە شەرمێ و ل شوونا ڤێ چەندێ، ب راستگۆیی ل گەل باخڤە و بێژی تە نەڤێن ھەڤبەندیا ل گەل چێکەی.
د ھاتن و چوونێن خوە ژی دا دەمێ ل ترۆمبێلێن گشتی سوار دبی ل گەل کەسێن نەنیاس نەئاخڤە و ل گەل کەسێن نەنیاس سواری ترۆمبێلان نەبە.
باوەریا خوە ب ھەمی کەسان نەئینە ئەوێن بزاڤێ دکەن دیاریان بۆ تە بینن و پێدڤیە ھەمی دیاریان رەت بکەی چونکو وەرگرتنا دیاریێ رامانا وێ ئەوە تو یا رازی.
خوە ژ بەرھەڤبوونا ڤی جۆرێ کەسان نەترسینە، بەلێ یا ب ھێز بە و ب شارەزایی رەفتارێ ل گەل بکە.
