ئەو عەشقا نەفرەتێن مرۆڤان لێ هاتینە باراندن
ئارین عیسا عبدولڕەحمان
دەمژمێر ٢ی شەڤە، چکچکا میلێن دەمژمێرێ ب ئاراستەیا لێدانێن دلێ من دقوتیت، من خەو نینە؛ ئەوژی پشتی کابووسێ گیانێ من گڤاشتی و چاڤێن من ژ خەوێ هشککرین. ئەز یا ڕوینشتیمە ل سەر کورسیکا خوە، ئەو کورسیکا نەفرەتی یا ژ بەرمایکێن ژنا جیرانا مە فەدیلایێ بۆ مە مای و بوویە کەڤالەکێ بێی وێنە د مالا مەدا، ئەز یا ڕوینشتیمە د ناڤبەرا هۆشیاری و خەوناندا و ژ ئالییەكێ دیترڤە د ناڤبەرا گێلەشۆکا بیرهاتن و ستەما بێدەنگییێدا.
چ تشت وەکی جەنگی جوانییا ژیانێ ل بەر چاڤێن مە کرێت ناکن، هەر تشت شەپرزە دبیت، هیڤییێن مە ل قۆلاچەکێ خوە د ڤەشێرن و دترسن قەستا ژییێ مە یێ مای بکن. ل دەمێ داگیرکرنێ وەلاتێ من ب تنێ نەهاتە داگیرکرن، هەردو چاڤێن من یێن ڕوون هاتنە کۆرەکرن، زمانێ من هاتە قوتکرن، ئەوان مەملەکەتا ئەشقا ژیانا من ب ساخی و ل بەر چاڤێن من وێرانکر، هەتاڤا ژیانا من هەتا هەتایێ ژ من هاتە دزین، چ تشتان شیان نینن ڕۆژا ڕەش ل بەر چاڤێن من ڕۆن بکن، ڕۆندکێن من تێرا دەهـ زڤستانێن باران تێدا نەباریت هەنە. بەردەوام د ناڤ گێلەشۆکا بێدەنگییێیدا نقۆم دبووم، هەر وەکی خوەشییێ تۆبەکری دوبارە سلاڤی ڕۆح و گیانێ من بکت! کابووسان خوەشییا خەوا شرین یا شەڤێ یا ل بەر من بەرزەکری، ئەو دەرمانێن نۆژداری بۆ من نڤێسین ب ئێکجاری من نەدخوارن؛ لەوڕا بەردەوام دمامە د ناڤبەرا ڕاستییەکا خاپینۆک و خەونێن هەلاویستیدا.
خوەشتڤییێن من بەرەڤ جیهانا ڕاستەقینە چووبوون، بەلێ بەردەوام قەستا ڕۆحا من دکرن و من دهەمبێزا خوەدا بێهۆش دکن، خەون و خەیالان ئەز دۆرپێچ کربووم، کەسێ باوەرنەدکر کو ئەو هەر ڕۆژ قەستا من دکن و هەر دگۆتن تو یا دینی، ئەڤە سێ سال ب سەر مرنا هەمییانڤە بۆرین! ئەز ببوومە علکێ دەڤێ جیران و نیاسان، خالەتا فەدیلا و نۆفێ هەرگاڤا ئەز دیتبام دا بێژن ئەنفالا کچا کەوێ یا دین و هاربووی پشتی چاڤێن وێ ژ لاوکێ دلێ وێ بێ باربووین! بەردەوام ئەز ب ئاخفتنێن خوە دئێشاندم ل شوینا من بدنە بەر سینگێ خوە و ب سەرێ منڤە ماچی بکن، بەس ما کەنگی خەلکێ بێ وژدان دلۆڤانی ب مرۆڤان برییە.
پشتی شەڕ ب دویماهی هاتی ئەز و برایێ خوە بتنێ ژ خێزانا خوە مابووین! سەرەڕای خرابییا ڕەوشا من، من کارێ دورینێ دکر و برایێ من سەرەڕای بچویکبوونا ژییێ خوە کارێ جۆتیارییێ دکر و هوسا مە ژیانا خوە دبرە سەری. دیسان شەڤێ دەست ب ڕەشكرنا ناخێ ئاسمانیکر و ڕێک بۆ بیرهاتنان ڤەکر دا بهێن و مێشکێ من بخۆن، دێ بێژی بیرهاتنان گرێبەستا نەخوەشییا ژیانا من ل گەل شەڤێ یا ئیمزاکرین و بێی دەستویری برینێن من نویدکرن. گەلەک پێڤەچوو هەتا من دوبارە شەڕ ل گەل هەر کەسەکی و تشتەکی کری و هەتا دخەوچوویم. هەڤالا شەڤێن من کابووسێ قەستا من کر، شێردلی جوانترین جلوبەرگێن خوە لبەرکربوون، ئەو جلێن بۆ داوەتا خوە مە ئامادەکرین، جلێن من یێن بویکینییێ د دەستاندابوون و دگۆت: خانما من ئەنفالا ژیانا من، جلێن خوە بکێ دا بچین و بۆ هەتاهەتایێ ژیانا خوە پێکڤە ببۆرینن، ئەز باش دزانم تو ل هیڤییا هاتنا منی.. ل هیڤییا هەڤالێ ژیانا خوەیی. دەستێ خوە ب هەمی ڤیان درێژدکر، من دەستێ ئەوی گرت و یا ل گەل دچم، ئەڤ کابووسە وەکی یێن بەری نوکە نەبوون، من هەستپێدکر ئەز یا د ڕاستییێدا، هەتا ئەم گەهشتینە سەربانەکێ بلند، ئەز ڕاوەستیام و من گۆت: شێردلێ من ئەم نەگەهشتین.! گۆت: ئەڤە دووماهییا ڕێکێ یە، یان دێ ل گەل من تەمامکی یانژی دێ ڕاوەستی.! ژ نشکەکێڤە من گوهـ ل گازییێن خالەتا فەدیلایێ و مامێ بەنگین و هەمی کەسێن کۆلانێ بوو، دگۆتن: نە کچا من نە هشیاربی وەنەکی، دێ پەشێمان بی.! ئەو هەمی ل ئالییەكێ و شێردلێ من ل ئالییەكێ دیتر.
من گۆتە ئەوان: بەرێخوەبدنێ، ئەڤە لاوکێ دلی من هات و دێ من ل گەل خوە بت، بەرێخوەبدنێ، ما من نەگۆتە وە نەمرییە و هەر دهێت قەستا من دکت، بەس وە باوەرنەدکر! بەس ما کەنگی هوین بۆ من بووینە دەیکوباب یان خوەشتڤیی دا ژ من باوەربکن، یادیژی بۆچی دێ بەرەڤ وەڤە هێم و قەستا وەکم! لەوڕا نە ترسن ئەگەر تشتەک ل من بهێت ژی دێ د هەمبێزا دەیکوبابێن خوە و د ناڤ دەستێن خوەشتڤییێ خوەدا بم. بەرەڤ لاوکێ دلێ خوەڤە چووم و من زانی ئەڤ کابووسە دووماهیک بوو و گیانێ من سڤکبوو و من هەست ب تشتەکێ گەرم ل بن سەرێ خوە کر؛ من زانی ڕۆحا من هێدی هێدی ژ گیانێ من هاتەدەر و بەرەڤ دلۆڤانی و حەزژێکرنا ڕاستەقینەڤە چووم..
