ئەو قوتابیێن ناڤێن وان نەهاتین ل زانكۆیان دێ هێنە وەرگرتن
هەولێر، قائید میرۆ:
پەیڤدارێ وەزارەتا خواندنا بلند و ڤەكۆلینێن زانستی دیار كر، هەر قوتابیەكێ ناڤێ وی نەهات بیت، هەر ل زانكۆ و پەیمانگەهان دێ هێنە وەرگرتن و دبێژیت: سیستەمێ سكالایان دێ هێتە كاراكرن بۆ وەرگرتنا داخوازیێن قوتابیان.
عەباس ئەكرەم، پەیڤدارێ وەزارەتا خواندنا بلند بۆ رۆژناما ئەڤرۆ ئاشكرا كر، ل گورەی سیستەمێ زانكۆلاین 96%ێ ناڤێ قوتابیان هاتیە و ل زانكۆ و پەیمانگەهێن سەر ب حوكمەتێ هاتینە وەرگرتن، هندەك قوتابی هەنە رەنگە شاشی هەبیت د دەمێ تژیكرنا فۆرما زانكۆلاین دا یان ژی گەلەك جاران قوتابی هەیە هندەك پشكێن زانكۆیان تژیكرینە د ناڤا سیستەمێ زانكۆلاین دا و نمرەیێن وی وەكو پێدڤی نینن، یان ژی جار هەیە د دەمێ داگرتنا فۆرما زانكۆلاین دا ناهێتە هنارتن.
عەباس ئەكرەم گۆت: «هەر قوتابیەكێ ناڤێ وی نەهابیت ل گورەی نمرەیێن هەر قوتابیەكی دێ هێتە وەرگرتن و مافێ چو قوتابیەكی بەرزە نابیت، زێدەتری 53 هزار دەرچوو بۆ خواندنا ئەڤ سالە هاتینە وەرگرتن، زێدەتری 13 هزار كورسیێن خواندنێ ژی ڤالا ماینە و هەر دەرچوویەكێ بخوازیت دێ شێت داخوازیا خۆ پێشكێشی وەزارەتێ كەت و سیستەمێ وەرگرتنا سكالایان دێ هێتە ڤەكرن».
