ئەو ناسناڤێ تە دایە من
نارین حەمید سەبیح
ب دو چاڤێن ڕێ بەرزەڤە وی تەماشەی وان پرتێن بەلاڤێن لوان کوژیکان کر یێن کو د پەرش و بەلاڤبوون، چەند بەرێخوەبدەتێ پتر حەزا نەمانێ بۆ دهات، چەند هەولبدەت ڤێکبدەت دزانیت کارەسات لدویڤدایە، ئەڤجا وی ڕوینشتن ل وی کوژیکێ زیندانێ هەلبژارت، چاڤ لڕێ بوون، نەكو ژ تێهنا خەوێدا بەرزەببن، لێ دەنگێ زەنگا دەرگەهی ڕێگری ل چاڤان کر، دەنگێ چقێنا دەرگەهی وان ئاخفتنێن زڤر یێن لپشت دهێنە گۆتن پتر ئەو هشیارکر.
– خولامێ من، تە بۆچی زویکا دەرگەهـ ڤەنەدکر؟!
ئەڤە هندەک ژ پەیڤێن زڤر و وێرانکەرێن بابێ ئازا یێ ١٠ سالینە یێ کو دئێک سالدا بیست سالان دژیت، دایکا وی دژییەکێ زویدا وەغەرکری و بتنێ دگەل بابێ وی یێ زۆردار هێلایی و ئەو ژ خواندنێ بێ بەهرکری، ڕوژانە لدەمێ ژکارێ خوەیێ ڤەخوارنا مەیێ دزڤڕی ئەڤ پەیڤە پێشکیشی کوڕێ خوەیێ خودان ڕەوشتەکێ جوان دکرن بێی کو ژ مەژی هشکییا خوە بزانیت کو ئەو یێ شاشییەکا مەزن دکەت، ب زڤری لێ خوڕی و گۆتێ:
– دیارە تە دڤێت لسەر ڤان شویشەیان پیاسەیان بکەی، تە بۆچی هەتا نوکە پاقژ نەکرینە؟
ب ڤەلەرزین و گەورییەکا ب ئاخینک ڤە وی بەرسڤدا:
– بڤان هەمی شویشەیان ڤە پاشماوەیێن مەیێ هەنە، دبیت زیانێ بگەهینن.
– بۆ من خەم نینە، یا لسەر تە پێدڤییە پاقژبکەی ژ بەری بچییە کاری.
شەڤێ گرێبەستا خوە دگەل ڕوژێ ئیمزاکر و سەرۆکایەتییا خوە دیارکر، دەمژمێر هەشتی شەڤە و ئازا ب وان چاڤێن تژی شەرم ل نێزیک ترافیکا دهێت و دچیت، داخواز ژ هەر رێبارەكێ دکەت کو کلینیسان ژێ بکرن؛ ژبەرکو وی دزانی ئەگەر ئەو وەنەکەت بابێ وی دێ وی ئازاردەت، گوهێن وی ڕاهاتبوون لسەر گوهلێبوونا پەیڤێن (خوازخوازۆک) و (کوڕێ كۆلانا)، لدەمێ زڤڕی ل ئێک ژوان شەڤێن زڤستانێ بۆ ماوەیێ دەمژمێرەکێ ل هیڤییا دەرگەهـ ڤەکرنێ ما هەتا کو بابێ بێ وژدان دەرگەهـ لێ ڤەکری، ب دو پێ یێن سست خوە هلباسکی دەرجان کر، ب تووڕەیی ڤە بابێ مەژی هشک گۆتێ:
– قازانجا کاری هەی کوڕێ پیس.
ئازا دکەلێنا ناخێ خوەدا زڤڕی وگۆت: توژی وەکی هەمی کەسێن دی بێژە من (کوڕێ خوازخوازۆک) یان ژی (کوڕێ کۆلانا).
بابێ بێ مەژی گۆتێ: ڤێجا ماچییە… ئەو ناسناڤەکە وان کەسان یێ دایە تە.
ئازایی ب دلەکێ تژی خەم لێڤەگێڕا و گۆتێ: نەخێر.
– نەخێر ئەڤە ئەو ناسناڤە یێ تە دایە من.
– بێ رەوشت، بەرسڤا بابێ خوە ددەت.
ئازا ب وان ئازارێن لسەر ملی بەرەڤ وی کوژیکێ تاری چوو، بەرپەڕێن پەرتووکێن خوە هەلدگرتن و هەولددا ڤێکبدەت دگەلدا یێ دوبارە و سێ بارە پست پستێ دکەتە هەر دێ چێبیت ژبەرکو دبێژن «ئارمانج ئەو هیڤییا بلندە یاکو پێ یێن وێ ل ئەردی»، ژبەرکو ڕەهێن ئارمانجا من د دەستێن مندانە، ئاڤدانا وێ ژی دێ ڕوژەکێ بەرهەمی دەت.
ئازا دكۆپیتکا خوەشی و ئارامییا دەروونێ خوەدا بوو، لدەمێ ئەو دانوستاندنا جوان دگەل خوە دکری دناڤبەرا نقرۆسکەکێدا بەرپەڕێن ب وان دەستێن بچویک هاتینە ڤێدان، دوبارە پەرش و بەلاڤ بوون، دگەل وان شویشەیێن بەخت ڕەشێن ژەهرکری.
