ئەو وانەیا دل شکاندین
ئارین عیسا عەبدولڕحمان
ئەڤرۆ خەو ژ هەمبێزا چاڤێن من تێرنەدبوو، ل بەر دەنگێ بارانێ و گڕگڕا ئەوران ئەز نقۆمی خەونێن خوە یێن ڕەنگاوڕەنگ ببووم بێی کو بزانم دەم یێ ژ من دچیت. دناڤ ئەوێ بێدەنگییا کویردا دەنگەک وەکی بایەکێ ساڕ د جەرگێ گوهێ مندا ڤەدا و دگۆت:
– هێژا، سپێدەیا هاتییە بەر دەرگەهێ تە، ما دەم نەهات ژ هەمبێزا خەوێ دەربکەڤی و پێشوازییا ئەوێ بکی!
دەما چاڤێن من ژ ناڤ هەمبێزا خەوا گران و شرین هاتینە دەر ژنوی هشێن من هاتنە سەرێ من کو گەلەک درەنگە و وەختە وانەیا دەستپێکێ ژ من بچیت. ب لەزوبەز من کارێ خوە کر و بەرەڤ قوتابخانەیێ دا ڕێ.
بارانا ئەڤێ سپێدەهیێ یا بێی دلۆڤانییە، هەر وەکی من سزا ددەت؛ ژبەر درەنگ ڕابوونێ و دبێژیت دێ بارم دا جارەکا دی هشیاربی و د دەمێ خوەدا کارێ خوە ئەنجام بدی. بایەکێ بهێز سیهوانەیا من ژ ناڤ دەستێن من هاڤێت و ل گەل بای و بارانێ ب شێتانە سەماکر. بارانێ ئەز هەمبێزکرم، لێ تووڕەمە و ڕەوشا من یا هندێ نینە دناڤ هەمبێزا ئەوێدا مەست ببم، د دەمەکیدا ترۆمبێلەک بهێز هات و ئاڤا سەر جاددەیێ هەمی ب من وەرکر، تووڕەبوونا من زێدەتر لێهات، هەر وەکی گەردوون هەمی ڕێککەفتی ببنە ئێک دا ئەڤێ سپێدەهییێ ل من تێکبدەن.
ل ناڤ پۆلێ و پشتی مامۆستا گیروبووی، هەر قوتابیەک ب تشتەکیڤە مژویل ببوو، هندەکا یارییا پۆلیس و دزانێ دکر، هندەکا وێنە دکێشان و هندەکا بتنێ تیق لیق دکر. ژ نشکەکێڤە مامۆستا “هێژا” ب ژۆر کەڤت، ب توندی دەرگەهێ پۆلێ گرت، چاڤێن هەمییان کزبوون، بێدەنگییەکا تەزی و دژوار وەکی یا ژدەرڤە پۆل هەمی ڤەگرت، جلکێن مامۆستا هێژایێ هەمی شل و پیس ببوون، دلۆپێن بارانێ ب سەر ڕوویێ ئەوێ یێ گەشدا دهاتنە خوار، تبلێن ئەوێ یێن نازک ژ ساڕما سۆر و مۆر بوون و دلەرزین، چاڤێن ئەوێ بێهیڤیبوونەک تێدا دیاردکر. ب دەنگەکێ بلند و زڤرڤە گۆت:
– پەرتووکێن خوە بیننە دەر و کپێن ژ وە نەهێت، من تاقەتا خوە ب خوە نینە، ئەڤە سەرێ سێ هەیڤانە مووچە نەهاتی؛ نەچارم ل ئەڤێ سڕ و سەقەمێ ڕێکا نیڤ دەمژمێرێ ب پێیا ببڕم، دێ زوی وانەیێ بێژم و دەرکەڤم.
لەرزینا سەرمایا ئەوێ ڕۆژێ بەسی قوتابییان نەبوو، مامۆستایێ ب تووڕەی و دەنگ بلندییا خوە لەرزینا تڕسێ ژی ئێخستە دلێن ئەوان یێن بچویک.
ئەوێ ڕۆژێ چ جاران ژبیرناکم، دەمێ من دەرگەهـ ڤەکری و ب هێز پالدای و پاشی من ب هشکی وانە شرۆڤەکری، من ترس و بێهیڤیبوون د چاڤێن ئەوان یێن بچویکدا ددیت. ئەو ئێکەم جاربوو من دەرزەک ل دلێن ئەوان یێن بچویک کری. کاروانێ ژیانێ ئەز نەچارکرم ب ئەوی شێوەیی دلێ هندەک فریشتەیێن بێ گونەهـ بشکێنم کو چ گونەها خوە نەبیت د تاریاتییا ژیانێدا.
