ئەو وەرزشا ل گۆڕەپانا ئامادەیا كاوە دهاتە كرن دوبارە نەبوویە
حاجی دوسکی:
دناڤ هەر وەلاتەكێ دا هندەك جه هەنە مرۆڤ شانازیێ پێ دكەت، ئەگەر ئەم بێن بەحس باژێرێ دهوكێ بكەین وەك سەنتەرێ قەزا دهوكێ ئێكسەر ڤێت ئەم بەحسێ ئاڤاهێ ئامادەییا كاوە بكەین هەردەم بویە جهێ شانازییا پترییاخەلكێ دهوكێ ودەوروبەرا، ڤی جهێ گرنك گەلەك خزمەتا تەخا گەنجان كریە نەبتنێ ژلایێ فێركرنێ ڤە بەلكو ژلایەنێن هونەری ورەوشەنبیری ڤە، لێ یا من دڤێت ئەز ئاماژە پێ بدەم لایەنێ وەرزشی یە د ناڤ ڤی ئاڤاهی دا ئەوە گورەپانا ئامادەییا كاوە سەردەكی كانیا وەرزش ڤانا بوو بگرە ژ سەردەمێ دهوك قەزا سەر لیوا میسل ڤە هەتا نێزیكێ سالا 2003 ڤی جهی تایبەتمەندیەكا مەزن هەبوو د ناڤ وەرزشا باژێرێ دهوكێ دا ئەڤ گورەپانە پترییا دەمی یا پربوو ژ گەنجان بۆ ئەنجامدانا یاریین وەرزشی، ڤێ گورەپانێ جهێ خوە د ناڤ دلێ پترییا وەرزشڤانا دا كربوو ل دەمێ سپیدێ قارەمانێن وەرزش یێن قوتابخانا ل سەر ئاستی سنوری قەزا دهوكی لێ هاتنە كرن ل دەمێ ئێڤاریا گەنج مژیلی یارییا باسكێت بۆلێ بوون وەك ل بیرامن گەلەك جاران ل ناڤەراستا سالێن نوتا قارەمانێن باسكێت بۆلێ و ڤۆلی بۆلێ هاتنە كرن ب سەرپەرشتیا جڤاتا وەرزش ل دهوكێ وی سەردەمی ئەڤ جڤاتە زور یا چالاك بوو ژبۆ ئەنجامدانا قارەمانیا د ناڤ بەرا یانەیێن پارێزگەها دهوكێ ،جەماوەرەكێ زور ئامادەبوو هەر چەندە هیچ جهەكێ رینشتنێ نەبوو لێ ڤی جەماوەری تامەكا تایبەت دا ڤان یارییا ئەو رێژەییا جەماوەری ل سەر لێڤێن وان دیوار ئامادەبوون باوەرناكەم چ یاریێن نوكە یین خولێن هەریمێ ئامادەبیت، لەورا د ناڤ ڤێ گورەپانێ دا نڤشەكێ باش دلسوز پەیدا بوو پترییا وان بوونە یاریزانێن یانەیێن پارێزگەهێ تایبەت ل یاریین باسكێت بۆلێ و ڤۆلی بۆلێ، ڤان سالێن دووماهی ئەف گورەپانە ئێكجاری یا ڤالا بوو هەر چەند یا هاتیە نوژەنكرن ب شێوەیەكێ باشتر لێ یا بێ چالاكی یە، راست نوكە ل سنوری پارێزگەها دهوكێ پتری شەش هولێن گرتێ هەنە لێ باوەرناكەم ئەو وەرزشا ل گورەپانا كاوە هاتە كرن ل هەر شەش هولێن گرتی بهێتە ئەنجامدان، بووچوونا من وەك پێشنیار بۆ دەزگەهێن وەرزشی ل دهۆكێ ئەگەر سالانە چالاكییەكا وەرزشی ل ڤێ گورەپانێ هاتبا كرن بڤێ پێنگاڤی دا بزاڤا وەرزشی باشتر لێ هێت هەروسا بیرهاتنێن جاران زڤرنە ڤە.
