ئەو گولەیا هێژ سار نەبووی
خورشید تەوفیق باکۆزی
ئەڤە هێشتا
ل وارگەهێ قەدەم خێرێ و
ل وارێ (خانێ)
دناڤ پەڕاسویێن
بورجێن کەلا (دم دم)یدا
دگەهێن شۆرها شەڕگەهاندا
کەڤرێ بۆکان نالینەکا بێ داوییە و
هێشتا بڕینەک هەودایە
هەسپێ شەڤا کوفر و غەدرێ
یێ لغاڤێ خۆ دڤەجویت و
ل سەرکێلەکا کێلەشینی و زاگرۆسی
یێ دشهیت و پێ تۆزێ دکەت
سینگێ سنە و سینگێ سەقز
مهاباد و قارنە و قەلات
جەرگێ سەردەشتا دلشەوات
بێهنا خوونێ و بێهنا کادیێ
بەرنەدایە …
ئەو گولەیا زڤرا سینگێ
(قاسملۆ)یۆ (شەرەفکەندی)
کریە ئارمانج چاڤکێلکری
هێش یا گەرمە و سار نەبوویە
چارچرا دخەونێن چرادا
ژبۆ فرەکا ئازادییێ
یا ب جزبە چووی
خوینا قازی
ژپەتیێ سێدارێ نەچوویە
هێش یا گەرمە
بێ مافکرن ژێر ئاخکرن .
زیندان و سێدارە و ئازار
دفەرهەنگا خەلخالی دا
هێژ حەلالە و
هێشتا یاسایەک بێ شەرمە
یا بێ شەرمە…
