ئەپیكۆر: ب مەرج د بەرهەڤین هنارتنا پەترۆلا هەرێما كوردستانێ ئێكسەر دەست پێ بكەین
كۆمەلا پیشەسازییا پەترۆلا كوردستانێ (ئەپیكور ) راگەهاند، ل گەل هەولێرێ وبەغدایێ كۆمبوویە و یا بەرهەڤە ئێكسەر هنارتنا پەترۆلا هەرێما كوردستانێ دەستپێبكەت، بەلێ مەرجێ وێ ئەوە كو رێككەفتنەكا نڤیسكی هەبیت بۆ پشتڕاستبوون ژ وەرگرتنا شایستەیێن دارایی و رێزگرتن ل گرێبەستێن قانوونی.
كۆمەلا پیشەسازییا پەترۆلا كوردستانێ (ئەپیكور ) دیاركر» كۆمپانیێن ئەندام د كۆمەلێدا خوەشحالن ب وێ چەندێ دانوستاندنێن د ناڤبەرا حوكمەتا هەرێما كوردستانێ و حوكمەتا ئیراقێ بۆ گەهشتن ب رێككەفتنێ ل سەر دەستپێكرنا هنارتنا پەترۆلێ هاتنە ب لەزكرن، هیڤیدارین د دەمەكێ نێزیكدا ئەو ئارمانجە بدەستڤە بهێت».
ب گۆڕەی بەیاننامەیا (ئەپیكور )» بەری ڤان دانوستاندنان، كۆمپانیێن ئەندام د ئەپیكور دا و نوونەرێن كۆمپانیێن دی یێن پەترۆلێ كو ل هەرێما كوردستانێ كار دكەن، رۆژا 12/7/2025 ل گەل بەرپرسێن حوكمەتا هەرێما كوردستانێ و حوكمەتا ئیراقێ كۆمبوون».
د كۆمبوونێدا كۆمپانیێن نێڤدەولەتی دوپاتكر كو» د بەرهەڤن ئێكسەر دەست ب هنارتنا پەترۆلێ بكەن، ئەوژی دەمێ رێككەفتنەكا پێگیر بهێتە ئیمزاكرن، كو پشتڕاستبوونێ بدەت ل پێدانا پارەیێ هنارتنێ، رێز ل گرێبەستێن قانوونی یێن كارپێكری بهێتە گرتن و چارەسەرییەك بۆ شایستەیێن دارایی یێن كەفتینە سەر ئێك بهێتە دیتن».
ئەپیكور رۆهنكر ژی» دڤێت هەموو پارەدان ب شێوەیەكێ ب لەز و زەلال بیت، جهێ قەبوولكرنا كۆمپانییان و حوكمەتا هەرێما كوردستانێ بیت، ئەڤجا ب كاش بیت یان ب رێكا رادەستكرنا پشكا پەترۆلێ».
مایلز كاگینز، پەیڤدارێ كۆمەلا پیشەسازییا پەترۆلا كوردستانێ (ئەپیكور ) دیاركر» كۆمپانیێن ئەندام د ئەپیكورێ دا د بەرهەڤن دەست ب هنارتنا پەترۆلێ بهێتە كرن، كو ل دووڤ قانوونێن نێڤدەولەتی هاتینە رێكخستن».
مایلزی گوت ژی» ئەپیكور هەردەم دوپاتكریە كو دڤێت رێز ل گرێبەستێن هەڤپشك ل بەرهەمئینانا ئەندامێن وێ بهێتە گرتن و ئەندامێن وێ ژی چو پشكداری د هیچ كۆمبوونەكێدا نەكریە ل گەل هیچ ئالییەكێ حكومی، كو بەرۆڤاژی ڤێ پێشنیاز هاتبیتە كرن».
پشتی دەستپێكرنا دانوستاندنێن ڤێ دووماهیێ یێن هەولێرێ و بەغدایێ بۆ هنارتنا پەترۆلا هەرێما كوردستانێ و چارەسەرییا مووچەی، جارا ئێكییە ئەپیكور هەلوەستێ خوە ب ئاشكرا رادگەهینیت.
حوكمەتا هەرێما كوردستانێ د رەشنڤیسێ چارەسەریێ كو پێشكێشی بەغدایێ كریە، ل ئەگەرێ پشكداریكرنا كۆمپانیێن پەترۆلی پێشنیازا رادەستكرنا 217 هزار بەرمیلێن پەترۆلێ رۆژانە ب بەغدایێ كریە. ل ئەگەرێ پشكدارنەبوونا كۆمپانییان ژی د رێككەفتنێدا، پێشنیازا وێ چەندێ كریە 100 هزار بەرمیلێن پەترۆلێ رۆژانە رادەست بكەت.
حوكمەتا هەرێما كوردستانێ داخوازا 65 هزار بەرمیلێن پەترۆلێ ژی بۆ بكارئینانا ناڤخوە كریە.
نوكە بەرهەمئینانا پەترۆلێ ل هەرێما كوردستانێ رۆژانە 282 هزار بەرمیلە.
