ئەڤرۆ ئەلهۆیێن چیا دگەل سۆران دێ شەڕێ خوە قۆرتالكرنێ كەن
دهێتە چاڤەڕێ كرن ئەڤرۆ ل دەمژمێر 2:30 پشتی نیڤرۆ چار یاریێن مایی ژ هەڤڕكیێن گەڕا 19ێ بۆ یانەیێن فوتبۆلا پلا نایابا كوردستانێ بهێنە ئەنجامدان، تیما دهۆك ب ژڤانە ل یاریگەها خوە مێڤاندارییا یانەیا سۆران بكەت.
تیما یانەیا دهۆك ئانكو ئەلهۆیێن چیا ب ژڤانە دناڤ ئەرد و جەماوەرێ خوە دا مێڤاندارییا سۆران بكەت، ئەلهۆیێن چیا 18 خال كۆمكرینە ژ چار سەركەفتن، شەش وەكهەڤییان ل رێزا 14ێ دهێت كو دبیتە رێزبەنییا مەترسی یا داكەفتنێ بۆ پلا ئێك، رەوشا وێ د خولێ دا یا باش نینە سەرباری هاتنا راهێنەرێ نوو رابین هاشم ئەوێ تا رادەیەكی گوهۆڕینەك د ئاست و ئەنجامان و تەكتیكا تیما دهۆكێ دا كری لێ دەم بۆ دڤێت هەتا بشێت تیمێ دۆبارە ڤەگەڕینتە ئاست و ئەنجامێن خوە، .
د بەرانبەر مێڤانا وێ یانەیا سۆران ژی د رەوشەكا خراب دا دەربازدكەت ئەوا بتنێ 17 خال هەین و رێزا 15ێ دهێت، یارییا ئەڤرۆ دێ یا شەڕێ خوە قۆرتالكرنێ بیت ژ رێزبەندیێن دووماهیێ و پاشڤەچوون بۆ پلا ئێك بیت، ژ یاریێن دی یێن ئەڤرۆ، سەیدسادق- برایەتی، چوارقۆرنە- شێروانە، هندرین- برایەتی.
د داخویانەكێ دا رابین هاشم راهێنەرێ تیما یانەیا دهۆكێ بۆ رۆژنامەیا ئەڤرۆ گۆت: سەرباری ژ دەستدانا چەند خالان لێ وەكو تەكتیك و ئاست یاری بۆ یاری بەر ب باشتر دچیت و ئەم پێدڤی ب دەمی هەنە بۆ بجهئینانا ئارمانجێن خوە، بوو مە یا گرنگ ڤەگەڕاندنا هێزا دهۆكێ یە لەوما ئەم كار ل سەر هێز و مۆرالا یاریزانان دكەین، ئێك ژ ئارمانجێن ئەم شەڕی بۆ دكەین بزاڤێ دكەین چو خالان ژ دەست نەدەین ژبۆ پێشڤەبرنا تیمێ بۆ رێزێن باشتر، یارییا ئەڤرۆ ب سانەهی نابیت ژبەركو ئەوێ ژی سێ خال دڤێن لێ رژدین ب گەهینە ئارمانجا خوە.
