ئەڤرۆ ئەلهۆیێن چیا چاڤ ل سەركەفتنا شەشێ و رێزبەندییا پێنجێ یە
قەیس وەیس:
چاڤەڕێ دهێتە كرن ئەڤرۆ دەست ب هەڤڕكیێن گەڕا 13ێ یا خولا ستێرێن ئیراقێ یا فوتبۆلێ ب ئەنجامدانا دو یارییان بهێنە كرن، دهۆك دێ ل كەربلا شەڕی بۆ ب دەستڤە ئینانا سەركەفتنا شەشێ كەت و یانەیا نەفت دێ بزاڤێ كەت بەردەوامیێ ب دەتە ئاست و ئەنجامێن خوە یێن باش دەمێ مێڤاندارییا یانەیا مینا ئێك ژ تیمێن خودان هیڤی كەت.
دهۆك بۆ سەركەفتنا شەشێ و پێشڤەچوونێ بەرهەڤن
بڕیارە ئەڤرۆ ل دەمژمێر پێنجێ ئێڤاری تیما فوتبۆلا یانەیا دهۆك ل باژێرێ كەربەلا ببیتە مێڤانا یانەیا كەربەلا د یارییەكا گرنگ دا بۆ ئەلهۆیێن چیا ئەوا شیایی ئاستەك و ئەنجامێن باش ب دەستڤە بینت، د یارییا بۆری دا و د ناڤ ئەرد و جەماوەرێ خوە دا سەركەفتنەكا ژ هەژی ل سەر مێڤانا خوە یانەیا نەفت ئەلبەسرا ب گۆلەكێ بێ بەرانبەر ئینابوو، گۆلا ئێكانە یا دهۆكێ ژلایێ یاریزانێ وێ یێ لوبنانی كەریم دەرویش د خولەكا 90ێ دا هاتبوو تۆماركرن، ئەڤ سەركەفتنە بوو ئەگەر تیما ئەلهۆیێن چیا ژ رێزبەندییا 10 پێشڤە بهێتە یا نەهێ ب كۆمكرنا 18 خالان ژ پێنج سەركەفتن، سێ وەكهەڤی هەنە و چار خوسارەتییا.
كەربەلا پشت گەرمیێ ب پشتەڤان و یاریگەها خوە كەت
د بەرانبەر دا تیما كەربەلا هەڤڕكەكا ب سانەهی نابیت بۆ ئەلهۆیێن چیا، ئەوا دناڤ ئەرد و جەماوەرێ خوە دا، هەرچەندە ل رێزا 12ێ د هێت ب كۆمكرنا 15 خالان، لێ دناڤا ئەردێ خوە دا ئامارێن وێ د خراب نینن و دێ بزاڤێ كەت سەركەفتنێ بینیت ژبۆ پێشڤەچوونێ و دوورنینە هەتا پێنج رێزا پێشڤە بهێت هەكە سێ خال ب دەستڤە ئینان.
گۆلكەرێن تیما دهۆكێ
بۆ زانین حەفت یاریزانان پشكداری د تۆمار كرنا 14 گۆلان دا هەیە بۆ یانەیا دهۆكێ و بڤی ڕەنگی، پاشەنگ عەبدوللا چار گۆل، پیتەر گۆرگیس سێ گۆل، هەرئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن گۆلەك تۆماركرینە.
رێزبەندییا گشتی یا خولێ بەری دەستپێكرنا هەڤڕكیێن گەڕا 13ێ
1- جەوییە 27 خال.
2- شورتە 25 خال.
3- زاخۆ 22 خال.
4- زەورا 22 خال.
5- نەفت 20 خال.
6- ئەلتەلەبە 20 خال.
7- هەولێر 18 خال.
8- نەفت میسان 18 خال.
9- دهۆك 18 خال.
10- نەجەف 17 خال.
11- مینا 16 خال.
12- كەربەلا 15 خال.
13- كەرمە 15 خال.
14- كارەبا 15 خال.
15- ئەلقاسم 14 خال.
16- نەورۆز 14 خال.
17- نەفت ئەلبەسرا 11 خال.
18- كەرخ 11 خال.
19- دیالا چار خال.
20- حدود سێ خال .
ئەمجەد عتوانی سەرێ لیستێ ژ دەستدا
پشتی ب دووماهی هاتنا یاریێن گەڕا 12ێ یایزانێ یانەیا شورتە موهەنەد عەلی ب تۆماركرنا هەشت گۆلان پێشڤە هاتە سەرێ لیستێ پشتی د یارییا گەڕأ 11ێ دا شیایی هاتریك ل سەر یانەیا هەولێرێ بینت، یاریزانێ جەوییە عەلا عەباس ب تۆماركرنا حەفت گۆلان پێشڤە هاتە رێزا دویێ، ستێرێ یانەیا زاخۆ ئەمجەد عتوان ئەوێ بوویە جهێ ڕەخنەیا پشتەڤانێن كوڕێن خابووری بۆ ماوەیێ سێ یارییە ئەو ئاستێ چاڤەڕێ كری نیشان نەدایە و بوو ئەگەر سەرێ لیستا گۆلكەران ژ دەست بدەت و پاشڤە بچیتە رێزا سێیێ، د بەرانبەردا هەڤالێ وی یێ تیمێ گۆستاڤۆ هێنریك پێشڤە هاتییە ل رێزا چارێ یە ب تۆماركرنا پێنج گۆلان.
