ئەڤرۆ ئەلهۆیێن چیا گەشبینن دیرۆك دوبارە بیت
دهێتە چاڤەڕێ كرن ئەڤرۆ تیما فوتبۆلا یانەیا دهۆك ل دەمژمێر شەشێ ب شەڤ ب كەڤیتە د تاقیكرنا خوە یا دویێ ژ چارچووڤەیێ كۆپا كەنداڤی دەمێ ل ستادیۆما ئەلسەعادە ببیتە مێڤانا یانەیا زەفار یا عومانی ژ گەڕا دویێ یا كۆما ئێكێ ئەوا بڕیارە د هەمان كۆم دا یانەیا ئەهلی سەنعا مێڤاندارییا نەسر یا ئیماراتی بكەت.
ئەلهۆیێن چیا گەشبینن د تاقیكرنا خوە یا دویێ ژی دا ب سەركەڤن
شاندنێ تیما یانەیا دهۆك ل دوشەمبییا بۆری ب مۆرالەكا بلند و گەشبینی بۆ سەركەفتنا دویێ د كۆمێ دا و یا سێیێ د دیرۆكا هەردو یانەیان دا بینت، د یارییا خوە یا ئێكێ دا ژ كۆپا كەنداڤی تیما دهۆكێ شیابوو ب دو گۆلان سەركەفتنەكا باش ل سەر مێڤانا خوە ئەهلی سەنعا یا یەمەنی ب دو گۆلێن پاقژ بینت، بۆ ڤێ یاریێ ژی دێ بزاڤێ كەت بەردەوامیێ بدەتە سەركەفتنان پێخەمەت دەستڤەئینانا سەرێ لیستێ و هیڤیێن دەربازبوونێ گەشتر لێبكەت.
ئامار د بەرژوەندییا ئەلهۆیێن چیا دایە
ل دوو ئامارێن هەردو یانەیان، تیما دهۆكێ پێشتر دو یاری دگەل زەفار یا عومانی كرینە و شیایە د هەردو یارییان دا ب سەركەڤیت، ئەو ژی ژ چارچووڤەیێ كۆپا فدراسیۆنا ئاسیا ل سالا 2013ێ بوو ژ چارچووڤەیێ كۆما سێیێ دا د یارییا ئێكێ ئەوا ل عومان هاتبوو كرن یانەیا دهۆك ب سێ گۆلان بەرانبەر گۆلەكێ سەركەفتن ئینابوو، هەرسێ گۆلێن وێ ژلایێ پیشەكارێ وێ یێ سوری بورهان سەهیۆنی، ئوسامە عەلی و عەلی بەهجەت، د یارییا دویێ یا هاتنێ دا ئەوا ل یاریگەها دهۆكێ هاتییە كرن ئەلهۆیێن چیا تیما زەڤار گۆلبارانكربوو ب شەش گۆلان بەرانبەر گۆلەكێ، عەلا عەبدولزەهرە هێرشبەرێ دهۆكێ چار گۆل ئینابوون و هەر ئێك ژ بورهان سەهیونی و عەلی عەبدزیاب گۆلەك، دبیت كاودان و گوهۆڕین د ئاست و شیانان دا هەبن دناڤبەرا 11 سالان دا و سۆپرایز ژی هەبن و دوور نینە دهۆك ژی ئەنجامێ خوە دۆبارە بكەتەڤە.
زەفار د كاودانەكێ خراب دایە
تیما یانەیا زەفار یا عومانی د كاودانەكێ خراب دایە تایبەت پشتی د یارییا ئێكێ یا كۆپا كەنداڤی ب پێنج گۆلان بەرانبەر دو گۆلان تووشی خوسارەتیەكا گران بوو بەرانبەر نەسر یا ئیماراتی، دیسان ژلایەكێ دووڤە پشتی نەبوونا مۆلەتا ڕێپێدانا ئاسیایی فدراسیۆنا فوتبۆلا عومانی د وەرزێ ئەڤ سالە دا ئەڤ تیمە پاشڤە بریە ژ پلا نایاب بۆ پلا ئێك و نە شیایە چو یاریزانێن پیشەكار ب دەستخوەڤە بینت.
سەرپەرشتێ تیما دهۆكێ گەشبینە
ل دۆر ڤێ یاریێ جاسم محەمەد حاجی سەرپەرشتێ تیما دهۆكێ گۆت: ئەم یێن هاتینە عومان پێخەمەت ب دەستڤە ئینانا خالێن یاریێ و بەردەوامی دا ب سەركەفتنان، هەرچەندە ئەركێ مە ب سانەهی نینە، لێ یاریزان ب مورالەكا بلند هاتینە و كارگێرییا یانەیێ هەر تشتەكێ پێدڤی بۆ تیمێ بەرهەڤكرینە، مە یارییا خولێ یا ژبیر كر و هەموو یاریزان ژ د ئاستەكێ پێدڤی دانە و بەرهەڤن بتنێ پشكدارییا موسێس و زاكێری د گۆمانێ دایە، راستە ئامار د بەرژوەندیا تیما مە دانە لێ كاودانێن یاریێ ژی تایبەتمەندیا خوە هەنە، هەرچەوابیت ئەم گەشبینن دێ ئاست و ئەنجامێن دلخوەشكەر ژ عومانێ ڤەگەڕینە كوردستانێ.
شرۆڤەكارەكێ وەرزش: دەلیڤەكا باشە دهۆك هێزا خوە یا دەرڤە ڤەگەڕینت
ژلایێ خوەڤە وەحید رەشید شرۆڤەكارێ یارییا فوتبۆلێ ل پارێزگەها دهۆكێ گۆت: پێنەڤێت هەر یاریەكا بۆ دهێت گرنگییا خوە یا تایبەت هەیە و حەق و حساباتێن خوە هەنە، یاریێن دەرڤەیی یاریگەها خوە دبیت ئاستەنگ هەبیت ژبەركو دوورێ جەماوەرێ خوەیە، لێ پێكهاتیێ تیما دهۆكێ د ئاستەكێ بلندایە و دێ هەموو بزاڤان كەن ژبلی ئەنجامێ باش چو ئەنجامێن دی نەبن، ئەڤە یارییا دویێ یە بەرانبەر تیمەكێ یە خوسارەتیەكا مەزن یا دایی ڕامانا وێ ئەوە یاری ب سانەهی نابیت ژبەركو زەفار خودانا ئەردی و جەماوەری یە دێ ل بن گڤاشتنان بیت ژبۆ سەركەفتنێ و ڤەگەڕیانا هەڤڕكیێن خولێ، ئەم وەكو خەلكێ دهۆكێ حەز دكەین تیما دهۆك سەركەفتنێ بینت ژبەركو پشكدارییەكا دەرڤەیە و دهۆك نوونەرا كوردستانێ و ئیراقێ یە.
بەرهەڤیێن دهۆكێ د چ ئاست دانە
ل دۆر بەرهەڤیێن تیما دهۆكێ جاسم محەمەد حاجی سكرتێرێ یانەیا دهۆك و سەرپەرشتێ تیما فوتبۆلا یانەیێ گۆت: یاریەكا گرنگە و ب هێزە دێ بیتە ئێكەم پێنگاڤا مە یا دەرڤە د وەرزێ ئەڤ سالە دا تایبەت د گۆپا كەنداڤی دا، كادرێ راهێنانێ بەرهەڤیێن گەلەك باش كرینە و هەموو یاریزان ب مۆرالەكا بلند ژی بەرهەڤن ئێكەم سەركەفتن بینن، مە جەماوەرەكێ مەزن هەیە و گەشبینن دێ دیارییا سەركەفتنێ ژی پێشكێشكەن، ب ئۆمێدین هەر ژ خولەكا ئێكێ و هەتا فیركا دادڤانی ب دووماهی هاتنا یاریێ ب كەیفخوەشی دێ جەماوەر پشتەڤانییا تیما مە كەت، وەكو كارگێرییا یانەیێ هەر تشتەكێ پێدڤی ژی بۆ تیمێ و پێشوازییا تیما مێڤان كرییە.
یانەیا زەفار ئەركێ خوە ب زەحمەت دبینت
د داخویانیەكێ دا بۆ
دەزگەهێن ڕاگەهاندنێ
عەبدوللا زاهر هێرشبەرێ یانەیا زەفار یا عومانی گۆت: یارییا ئەڤرۆ دگەل تیما دهۆكێ تاقیكرنەكا ب زەحمەتە بۆ مە، ژبەركو ئەم د ڕەوشەكا باش دا نینن و خوسارەتیەكا گران هاتیە دان و ئاریشەیا یانەیا مە ژ بەر ئەگەرێن نە بوونا ڕێپێدانێ ژ پلا نایاب بۆ پلا ئێك هاتبوو پاشڤەبر، كارگێریا یانەیێ دگەل مە روونشتینە و ئەم هەموو گەهشتینە وێ یەكێ دڤێت قەرەبوویا خوسارەتییا بۆری ب سەركەڤت بكەین و جەماوەرێ خوە ئاشتبكەین، باش دزانین ئەركێ مە ب سانەهی نابیت بەرانبەر تیمەكا گەنج و جارا ئێكێ یە هاتییە كۆپا كەنداڤی و خودان هیڤی و ئارمانجێن مەزنە.
پاداشت و خەلاتێن قارەمانیێ
بۆ زانین قارەمانا كۆپا كەنداڤی دێ سێ ملیۆن دۆلاران وەرگریت، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ كۆپا دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
هەروەسان هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
یانەیێن پشكدار چەندن؟
بۆ وەرزێ نوو بڕیارە هەشت یانە پشكداریێ تێدا بكەن ئەوێن هاتینە بەلاڤكرن ل سەر دو كۆمان، یاریێن وان دێ ب شێوەیێ خول دو قۆناغ هێنە ئەنجامدان و بەردەوامبن هەتا 25ێ نیسانا سالا 2025ێ، تیما فوتبۆلا یانەیا دهۆك نوونەرا هەرێما كوردستانێ و ئیراقێ یە و كەڤتییە د كۆما دویێ دا.
كۆما ئێكێ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
