ئەڤرۆ بڕیارە كۆمپانیا ئەپل زنجیرە مۆبایلێن خوە یێن ئایفۆن 15 نیشان بدەت
بڕیارە ئەڤرۆ ب شەڤ كۆمپانیا ئەپل كۆنفرانسێ خوە یێ سالانە ئەنجام بدەت و تێدا نووترین شاكارێن خوە یێن تەكنۆلۆژی نیشان بدەت و ژ وان ژی زنجیرەیا مۆبایلێن خوە یێن ب ناڤێ ئایفۆن 15 و هندەك بەرهەمێن دژی.
بڕیارە ئەڤ كۆنفرانسە ب رەنگەكێ زیندی ل دەمژمێر 20:00 ب دەمێ كوردستانێ بهێتە نیشاندان و چەندین چالاكڤان و كەسانێن گرنگیێ ب ڤان رەنگە كاران ددەن ئامادە ببن كو دهێتە پێشبینیكرن ئەپل مەزنترین گوهۆڕینان د دیزاینا موبایلێ دا ب ب درێژیا 11 سالێن بۆری ئەنجام بدەت.
هەروەسا گەلەك گوهۆڕینێن د ئاستێ كاركرنێ، قەبارەیێ پاتریێ و ساخلەتێن كامیرەیێ دێ د موبایلێن ئایفۆن 15 دا هەبن ب هەڤبەركرن ل گەل ئایفۆنێن بەری وێ
بۆ جارا ئێكێ دێ ئالاڤێ بارگاویكرنێ یێ ئایفۆنان ب سیستەمێ USB-C بیت پشتی ئێكەتیا ئەورۆپا د قانوونەكێ دا ئەو كۆمپانی ب ڤێ چەندێ نەچار كری. د كۆنفرانسێ سوبەهی دا، ئامیرەیێن ئایفۆن 15، ئایفۆن 15 پلەس، ئایفۆن 15 پرۆ و ئایفۆن 15 پرۆ ماكس هەروەسا ئێرپۆد و دەمژمێرێن ئەپل یێن سمارت ژی دێ هێنە نیشاندان. شارەزا هزر ناكەن كو ئەپل بەری ئوكتۆبەرێ ئایپادان و لاپتۆپێن ماك بووك بەرهەمبینیت.
كۆمپانیا ئەپل ئەپدێتا نوو یا سیستەمێ كاركرنێ iOS 16.6.1 ژ بۆ پاراستنا ئێمناهیا بكاربەران بەردەستكر. پشتی هوشداریا هندەك لێكۆلەرێن ئینستیتیۆیا سیتیزن لاب ل زانكۆیا تورونتۆ یا كەنەدی ژ هێرشێن هاككەران، ئەپل رابوویە ب چارەكرنا وێ كێشەیێ ب رێكا بەردەستكرنا ئەپدێتا نوو یا سیستەمێ كاركرنێ. شارەزایێن وێ ئینستیتیۆیێ داخواز ژ بكارهینەرێن ئایفۆنان كرینە كو ئەپدێتا نوو یا سیستەمێ كاركرنێ iOS 16.6.1 ل سەر موبایلێن خۆ جێگیر بكەن. ژ بۆ جێگركرنا ئەپدێتا نوو، پێدڤیە بكارهێنەر بچیتە د ناڤ Settings دا و پاشی General ژێبگریت و د دووڤ دا خانەیا ئەپدێتكرنا سیستەمێ كاركرنێ لێ بدەت. ئەگەر بكارهێنەری بۆ جارا ئێكێ ئەپدێتا نوو نەدیت، پێدڤیە موبایلا خۆ ریستارت بكەت یان ژی خۆ پشتراست بكەت كو رەنگە بەروەخت ئەپدێتا نوو د موبایلا وی دا هاتبیتە جێگیركرن.
ژمارەیەكا پێشبینیان بۆ هندێ دچن كو بهایێن زنجیرە موبایلێن ئایفۆن 15 و ب تایبەت ئایفۆن 15 پرۆ ماكس دێ بلندترین بها بن هەر ژ دەمێ دەستپێكرنا كۆمپانیا ئەپل بۆ بەرهەمئینانا ئایفۆنان. ل گۆرەی دەیلی مەیل؛ پێشبینی دهێتە كرن بهایێ ئایفۆن 15 پرۆ ماكس بلندترین بهایێ ئایفۆنان بیت هەر ژ دەستپێكا بەرهەمئینانا ئایفۆنان كو دێ ژ 2000 دۆلاران پتر بیت. ژمارەیەكا كەسێن ئاگەهدار دیاركرینە كو بهایێ ئایفۆن 15 پرۆ ماكس یا قەبارەیێ میمۆریێ وێ دو تێرابایت دی گەهیتە 2099 دۆلاران. ئەڤە ل دەمەكێ یە كو بهایێ ئایفۆن 14 پرۆ ماكس یا قەبارەیێ میمۆریێ وێ ئێك تێرابایت ل سالا بۆری 1599 دۆلار بوون. بۆ ئێكەم جار دێ قەبارەیێ میمۆری یێ دو تێرابایتان د موبایلێن ئایفۆن دا هێتە بەردەستكرن، هەروەسا دێ تەخەكا تیتانیۆمێ، كامیرەیەكا پێشكەفتی و هندەك ساخلەتێن نوو یێن ب هێز تێدا هەبن.
د هەمان دەم دا مالپەرێ 9to5Mac دیاركریە؛ دێ لەزاتیا بارگاویكرنا موبایلێ د ئایفۆن 15 دا پتر بیت ژ نڤشێن بەری وێ پشتی سیستەمی وێ ژ Lighting بوویە USB-C. ژمارەیەكا ژێدەرێن ئاگەهدار بۆ وی مالپەری ئاشكرا كرینە «دێ لەزاتیا بارگاویكرنێ د ئایفۆن 15 دا پتر بیت ژ هەموو نڤشێن بەرێ یێن ئایفۆنان و دێ گەهیتە 35 واتان ب كێماسی».
