ئەڤرۆ ب ساناهی نەهاتیە و گەلەك رۆژێن سڕ و سەقەم و سەرما و ترس و برس مە دەربازكرینە
كەریم جەمیل زوراب
دیدار، سالار محەمەد دۆسكی:
پێشمەرگێ شۆڕەشا ئیلونێ (كەریم جەمیل زوراب نێروەیی) ل سالا 1979ێ چوومە ناف رێزێن شۆڕەشێ و ل دەڤەرا (شیف ئوسمانكا) ل دەڤەرا نێروەیان ئاكنجیبووم و پاشان چووینە ئیرانێ و دەڤەر بۆ دەڤەرێ تێدا ژیاینە و هەر دەما سەركردایەتی یا پارتی داخاز ژ مەكریە مە بێ دو لی بەرەڤانی ژ ئاخ و وەلاتێ خوە كریە.
پێشمەرگێ شۆڕەشا ئیلونێ كەریم جەمیل زوراب نێروەی بۆ رۆژناما ئەڤرۆ گۆت: ل سالا 1983ێ بەرەف دەڤەرا (كەوپەرێ) ل وەلاتێ ئیرانێ ب رێكەفتین و دووڤ دا زڤرینە حاجی عومران وێ سالێ زڤستانەكا گەلەك دژوار بوو و گەلەك بەفر ل دەڤەرێ كەفت بوو، هاتنا مە بۆ حاجی عومران بۆ پشكداریكرنێ بۆ دوی شەری دا ل دەڤەرێ وی دەمی بەرپرسێ مە خودێ ژێ رازی (مستەفا نێروەیی) بوو و گەلەك پێشمەرگێن دی ژی پشكداربوون دوی شەری دا لێ ئەم سەر ب هێزا مستەفا نێروەیی ڤە بووین، د وی شەری دا مە هێرشی رەبیەكا دوژمنی كر و شیاین پێنچ جندیان ب دەست بگرین و گەلەك چەك و تەقەمەنی ب دەست مە كەفتن، وی شەری دا وەك پێشتر مە ئاماژە پێكری كو زڤستانەكا گەلەك ساربوو، و مە هندەك چادر ل گەل خوە بربوون، لێ جهێ هەمی پێشمەرگەی لبن چادران نەدكر ، و نەچاربووین هندەك بن كەڤرابوون و هەر ئێكێ جهێ وی نەكربا بخوە جهەكێ دی ل دەرڤە دروست دكر، ل دەمێ چوونێ مە هندەك هێسترێن گوندێن دەردو ل گەل خوە برن چونكە سەقایەكێ ساربوو و رێكا چوونێ گەلەك یا بزحمەت بوو دەوارەك دوو ل ئەوان كەڤرا را فرین و بیرا من دهێت دەوارەك مر و دەوارێن دی لەنگ بوون چونكی جهەكێ گەلەك بلند و گەلەك سارما لێ هەیە، مە گەلەك نەخوشی دیتی نە وی دەمی ئامرێن گەهاندنێ نەبوون و ئەگەر پوستەك هەبا ل ناف نێروەیا بربا دڤیابا ب پیان چووبا ئیرانێ یان سنورێ سوریێ وی دەمی بڤی رەنگی پوستە دهاتنە گەهاندن و هەر هەمی تشتێ ب زحمەت بوو و گەلەك ماندیبوون هەبوو و ژیان ب خوشی و نەخوشی خوشە لێ ژیانا مە پیچەك یا دژوار بوو خوارن و ڤەخوارن كێم بوو و ب دەست مە نە دكەڤتن و وەرزێ هاڤینێ ژی هاتن و چوون هەبوو لێ گەرمەكا مەزن بوو.
هەمان پێشمەرگە زێدەتر گۆت: رەنگە گەلەك جارا گەهشت بینە وی ئاستی ژ گیانێ خوە تورەبووینە و گەلەك جاران ل چیان نان ب دەست مە نەكەفتیە و مە گەلەك رەزالەت دیتی یە وەك نوكە بەرفرەهی نەبوو، نوكە سوپاس بۆ خودێ مللەتێ مە دژیانەكا خوش و شایستەدایە و ب ترۆمبێلا خوارن و ڤەخوارنێ دبەن و ئەوێن نوكە نەخوشی نە دیتی نە و درازی نینن.
هێشتا گۆت: دەمێ شەرێ كانی ماسێ پوستەك بوومە هات كو بچین هاریكاری یا پێشمەرگەی بكەین ل ناحیا كانی ماسێ وی دەمی پوست گەهاندن گەلەك یا بزحمەت بوو وی دەمی ئەم دو رێكخراو ژ ناف نێروەی یا چووین بۆ تروانش و كەفتینە ناف هێزێن حوكمەتێ و فرۆكێن حوكمەتێ هاتن و چوون دكرن ل هنداف مە و دەنگ و باس ب شاشی گەهشت بوونە مە و ئەم كەفتینە ناف هێزێن دوژمنی و دەڤەر هاتبوو بەردان ژلایێ پێشمەرگەی ڤە و زالگەهەكا دوژمنی درێكێ دا بوو و پرسیار ژ مەكرن هوون كینە مە گۆتێ پێشمەرگەی نە و ب عەرەبی تاخفتن و هەڤالێن مە هزركرن هێزێن شوعی نە دووڤ دا زیلەكا لەشكەری هات و ب توپا دانا مە و ئامیرێن گەهاندنێ تێكچوو بوون هەكە دا زێدەتر هێز بۆ دوژمنی هێت هێت و هەر هەمان دەم دناڤبەرا مە دا بۆ شەر مە خوە گەهاندە بەر گركەكی و مە هێدی هێدی خوە قورتال كر و دناف مە بخوە ژی دا شەپرزەیی چێبوو و هەر هندەك پێشمەرگە ل جهەكی بوون و سوپاس بۆ خودێ ب سەلامەتی ئەم هەمی دەربازبووین و كەفتینە بەر جادێ و هاتین و دەربازبووین و ئەم قورتال بووین و گەهشتینە لژنا ئامێدیێ دناڤ بەرواری یا بوو وی دەمی د. رۆژێ بەرهەڤبوو و مە گەلەك ئێخسیر گرتبوون و مە سوحبەت بۆ د. رۆژ گۆت وی باوەرنەكر گۆت هەكە پێشمەرگە دجادێ را بهێت و دەربازبیت خوە ئێك پێشمەرگە قورتال نابیت چەوا هوون قورتال بوون مە گۆتێ ئەڤە ئێخسیر و ئەڤە دەسكەفت و سوپاس بۆ خودێ خوە تبلا ئێك پێشمەرگەی ژی خوین ژێ نەهاتیە وی دەمی مە داخازا چەكی كر، چوونكی ئەم مابووینە بێ چەك و چەكێ مە خلاص ب بوو.
ناڤبری گۆت: گەلەك جاران مە كەمین ل بەر دوژمنی ل سەر جادا ڤەدان و تایبەت ئەگەر جارەكێ دەنگ و باسێ گەهشتنا ترۆمبێلێن لەشكری یان بەرپرسەكێ لەشكری یێ حوكمەتێ گەهشت بیتە مە و گەلەك جاران ئەو هایداربوون كو ئەم دهشیارین و چاڤەرێی هاتنێ دكەین پلانا مە تێكدا و گەلەك جاران ژی هێرشی مە دكر و پلانا مە ب ئێكجاری دهاتە تێدان و هەمان دەم ژی گەلەك جاران ژی ژ مە قورتال نەبووینە و ب سەركەفتیانە ئەم دەربازبووینە، رۆژێن سەخت هەبوون ژیان ل چول و چیا گەلەك یا بزحمەت نەبوو و هەتا دەوار ژی بزحمەت بوون كو كەل و پەلێن خوە لێ بكەین، خەلكێ بێ گێول بوو و خەلكی حەژ وەلاتێ خوە و ئاخا خوە دكر و مە هاژ خەلات و دەست خوشی یا نەبوو و بتنێ ڤیانا وەلاتی مە هەبوو و دەم هەبوو گەلەك بەفر بوو و نان نەبوو و گوندێ دویرە و حوكمەتا ل گوندی مرۆوف نەشێت بچیت ئیلا بچیتە شەف و گەلەك جاران مەغرەب دچووینە گوندی.
هەمان پێشمەرگە گۆت: هیڤی و داخازیا مە ئەوە ماندیبوونا پێشمەرگێ كوردستانێ بەرچاف بهێتە وەرگرتن و زێدەتر هێزێن كوردی ئێكگرتی بن چونكە هەر دەمێ ئەم ئێكگرتی بووینە چ دوژمن نەشیاینە خوە نێزیكی مە بكەن و مە هیڤی هەنە رۆژەكا روون بینن ل پاشەرۆژێ و دەولەتا كوردستانی بهێتە ئاڤاكرن.
