ئەڤرۆ دهۆكێ و زاخۆ دیدارێن ئاگرین یێن هەین
قەیس وەیس:
چاڤەڕێ دهێتە كرن ئەڤرۆ چار یاریێن دی ژ هەڤڕكیێن گەڕا شەشێ ژ خولا ستێرێن ئیراقێ یا فوتبۆلێ بهێنە كرن، دیدارا یانەیێن پارێزگەهێ دهۆك و زاخۆ د ڤێ گەڕێ دا ئاگرینن و دێ بزاڤێ كەن بەردەوامیێ بدەنە سەركەڤتنێن خوە.
دهۆك- نەفت
جەماوەرێ وەرزشی یێ یانەیا دهۆك ئەڤرۆ ل دەمژمێر 8:30 شەڤ دێ دەست ب پشتەڤانییا تیما خوە كەن دناڤ ئەردێ خوە دا دەمێ تیما وان یانەیا نەفت یا بەغدایی مێڤان دكەت، ئەلهۆیێن چیا پشتی چار خوسارتیێن ل دووڤ ئێك د یارییا حەفتییا بۆری دا شیابوو ب سەركەڤتنەكا گرنگ و مەعنەوی ژ باژێرێ سلێمانیێ ڤەگەڕیت پشتی ب دو گۆلان هەمبەری نەورۆزێ ب سەركەڤتی، ئەڤ ئەنجامە گەشبینی و دلخوەشیی دناڤا جەماوەر دا پەیدا كرییە ژبۆ یارییا ئەڤرۆ بەرانبەر نەفتێ بەردەوامبیێ دەنە سەركەڤتنان، هەرچەندە ڕێزبەندییا دهۆكێ یا باش نینە ئەوا بتنێ سێ خال هەین ڕێزا 15ێ دهێت، ژلایێ خوەڤە نەفت هەشت خال كۆمكرینە ڕێزا نەهێ دهێت.
ئەلغراف – زاخۆ
ژلایێ خوەڤە تیما زاخۆ ئەڤرۆ ل دەمژمێر شەشێ مەغرەب دێ ل یاریگەها ناسرییە بیتە مێڤانا یانەیا ئەلغراف ئێك ژ تیمێن سۆپرایزا خولێ كو دبیتە یارییا دویێ یا ئاگرین بۆ یانەیێن پارێزگەهێ، زاخۆ خودانا نەهـ خالایە ژ سێ سەركەڤتن و دو خوسارەتییان دێ بزاڤێ كەت یارییا ئەڤرۆ بكەتە سەركەڤتنا چارێ لێ تیما ئەلغراف یا ب سانەهی نابیت ئەوا 11 خال كۆمكرین ڕێزت دویێ دهێت هیچ خوسارەتییەك نە دایە.
ژ یاریێن دی یێن ئەڤرۆ، ئەمانەت بەغدا- نەجەف، دەمژمێر شەشێ ئێڤاری، جەوییە دیالا، دەمژمێر 8:30 شەڤ، یاریێن سوبەهی ئەینی، دو یاریی دەمژمێر شەشێ مەغرەب هێنە كرن مینا و ئەلقاسم و كەرخ دگەل كارەبا، دو یاریێن دی دەمژمێر 8:30 شەڤ هێنە كرن، مووسل ل یاریگەها دهۆكێ دگەل زەورا و تەلەبە بەرانبەر نەفت میسان.
ل دور یاریێن هەردو تیمان سلێمان زەكی شرۆڤەكارێ وەرزشی ل پارێزگەها دهۆكێ بۆ رۆژنامەیا ئەڤرۆ گۆت: هەردو یانەیێن پارێزگەهێ د قووناغەكا ئارام دانە پشتی سەركەڤتن د یاریێن خوە یێن حەفتیا بۆری دا تۆماركرین، لێ یاریێن ئەڤرۆ تاقیكرنەكا دی یا بزەحمەتە بۆ هەردو یانەیان، دهۆك دێ بەرانبەر یانەیا نەفت بیت، دبیت چەنسێ دهۆكێ باشتر بیت ژبەر ئەڤان خالان دێ دناڤ ئەرد و جەماوەرێ خوە دا و دیسان دێ ب مۆرالەكا بلند هێتە دناڤ یاریگەهێ دا، دیارە ژی سەقامگێریەكا دناڤ پێكهاتیێ تیما وان دا پەیدابوویە پشتی هاتنا ڕاهێنەر عەبدولغەنی شەهەد و شیایی كونترۆلا كێماسیا بكەت و لایەنێ دەرۆنی ژی ئارام بكەت و دوبارە تیمێ ڤەگەڕینتە دناڤ هەڤڕكییان دا.
ل دۆر یارییا زاخۆ بەرانبەر ئەلغراف گۆت: ئەركێ زاخۆ ب سانەهی نابیت بەرانبەر تیمەكێ كو هەتا نوكە شیایە ئاست و ئەنجامێن گەلەك باش بینیت ژ پێنچ یاریێن وێ هیچ خوسارەتیەك نینە بەلكو سێ سەركەڤتن هەبووینە، لەوما ژی یارییا ئەڤرۆ بەرانبەر ڤێ یانەیێ زاخۆ دێ زەحمەتەكا مەزن بینت و سەركەڤتن ژی دێ بیتە ئارمانجا هەردو یانەیان، زاخۆ ب سەركێشیا ڕاهێنەرێ خوە یێ قەتەری ویسام ڕزق شیانێن باش هەنە، دبیت پشكدارییا وێ د كۆپا كەنداڤی دا لایەنەكێ دی یێ گڤاشتنێ ل سەر یاریزانێن وێ بكەت، ب هیڤییا وێ یەكێ هەردو یانەیێن پارێزگەهێ بشێن سەركەڤتنان بینن.
بەری ب دووماهی هاتنا یاریێن گەڕا شەشێ هەلوەستێ گشتی بڤی ڕەنگی یە
1- هەولێر 13 خال.
2- ئەلغراف 11 خال.
3- دیالا 11 خال.
4- ئەلگەرمە 10 خال.
5- جەوییە 10 خال.
6- ئەلكەرخ 10 خال.
7- زاخۆ نەهـ خال.
8- شورتە نەهـ خال كێمترییا یارییەكێ.
9- نەفت هەشت خال.
10- تەلەبە هەشت خال.
11- مووسل حەفت خال.
12- مینا حەفت خال.
13- ئەمانەت بەغدا شەش خال.
14- زەورا پێنج خال، كێمترییا یارییەكێ.
15- دهۆك سێ خال.
16- نەجەف سێ خال.
17- نەفت میسان سێ خال.
18- نەورۆز سێ خال.
19- ئەلقاسم ئێك خال.
20- كارەبا ئێك خال.