ئەڤرۆ دهۆك بێ جەماوەر دێ پێنگاڤا خوە یا ئێكێ هاڤێژیت
قەیس وەیس:
بڕیارە ئەڤرۆ سێ یاریێن دی ژ هەڤڕكیێن دەستپێكا وەرزێ نوو كو دبیتە گەڕا ئێكێ یا خولا ستێرێن ئیراقێ یا فوتبۆلێ وەرزێ 2025-2026ێ بهێنە ئەنجامدان، یانەیا نەفت میسان ل یاریگەها خوە دێ ل دەمژمێر شەشێ ئێڤاری مێڤاندارییا یانەیا مینا یا بەسرایی كەت، ژلایێ خوەڤە ڤە یانەیا نەفت یا بەغدایی دێ د هەمان دەم دا بیتە مێڤانا یانەیا ئەلقاسم، یارییا ئەلهۆیێن چیا تیما دهۆكێ د گرنگترین یاریێن ئەڤرۆ دا دێ مێڤاندارییا یانەیا ئەلگەرمە كەت
دهۆك د تاقیكرنا ئێكێ دا و جەماوەر بەرهەڤ نابیت
پشتەڤانێن وەرزشی یێ یانەیا دهۆك دێ بێ بەهربن ژ یارییا ئەڤرۆ یا تیما وان بەرانبەر یانەیا ئەلگەرمە ئەوا دێ ل یاریگەها دهۆكێ ل دەمژمێر 8:30 شەڤ هێتە كرن، ئەڤ یارییە دهێتە هژمارتن تاقیكرنەكا ب هێز و یا ئێكێ بۆ ئەلهۆیێن چیا بەرانبەر یانەیەكێ باشترین شێوە خوە بەرهەڤكرییە ب دانانا كەمپێ دەرڤە و ئینانا چار یاریزانێن هەلبژارتیێ ئوردنێ و ئەیمەن حسێن گۆلكەرێ هەلبژارتیێ ئیراقێ، لێ بەرهەڤیێن دهۆكییا ژی گەلەك باش بووینە ب ئینانا كۆمەكا یاریزانێن خودان شیان و ڕاهێنەرەكێ خودان سەربۆر یێ بەرازیلی.
دیدارێن هەردو تیمان دا ل وەرزێ بۆری دەستپێكرییە ژبەركو یانەیا ئەلگەرمە یا نوویە دێ بیتە سالا دویێ هاتییە دناڤ خولێ دا، پێشتر چ یاریێن فەرمی نەبووینە، ئەو هەردو دیدارێن وەرزێ بۆری ئەنجامێ سەركەڤتنێ بۆ هەر تیمەكێ بوویە، وەرزێ بۆری ئەلهۆیێن چیا خودانا ناسناڤێن كۆپا ئیراقێ و كەنداڤی یە و ب مۆرالەكا بلند دێ بزاڤێن دەستڤە ئینانا ئێكەم خال كەن
كاپتنێ تیما دهۆكێ: مۆرالا بلندە
ل دۆر یارییا ئەڤرۆ د داخویانیەكا رۆژنامەڤانی دا ستێرێ یانەیا دهۆك و كاپتنێ تیمێ هارۆن ئەحمەد گۆت: بەرهەڤیێن باش ژلایێ كادرێ ڕاهێنانێ و یاریزانان هاتینە كرن و كارگێرییا یانەیا دهۆكێ ب هەردو مللان پشتەڤان و دووڤچوونا تیمێ دكەن، ئەم خودان دیرۆك و دەستكەڤتین دڤێت بەردەوامیێ بدەینە ئاست و ئەنجامێن خوە یێن مەزن، یارییا ئەڤرۆ ب سانەهی نابیت بەرانبەر ئەلگەرمە ئێك ژ تیمێن باش خۆ بەرهەڤكرین لێ ئەم ژ چو تیما نا ترسین و باش ڕژدین بۆ ئەنجامەكێ باش و دلخوەشكەر، نە بەرهەڤبوونا جەماوەرێ مە دلگران بووینە دڤیابا هاتبا ڕاكرن لێ مخابن چو بەرسڤ نەبووینە، هەموو یاریزان بەرهەڤن و ڕژدین بۆ ئەنجامەكێ دلخوەشكەر.
شرۆڤەكارەكێ وەرزشی یاریێ ب سانەهی نابینیت
ژلایێ خوەڤە وەحید رەشید شرۆڤەكارێ وەرزشی ل پارێزگەها دهۆكێ بۆ رۆژنامەیا ئەڤرۆ گۆت: یارییا ئەڤرۆ بۆ دهۆكییا ب سانەهی نابیت ژبەركو دێ بێ پشتەڤان بیت و هەروەسان یا ئێكێ یە بۆ كۆمەكا یاریزانان و كادرێ ڕاهێنانێ، ل دووڤ بەرهەڤیێن یانەیا دهۆك دبیت هێشتا پێدڤی ب دەمی هەبیت هەتا تێگەهشتنەكا باش د ناڤبەرا یاریزانان دا پەیدابیت، هەرچەندە نە بەرهەڤبوونا جەماوەری د ناڤ یاریگەهێ دا ژبەر سزایان كارتیكرنا خوە دێ هەبیت ل سەر مۆرالا یاریزانان لێ دێ د ناڤ ئەردێ خوە دا كەت دڤێت مفایی ژێ وەربگریت، ب گشتی كادرێ ڕاهێنانێ پێنگاڤێن باش هاڤێژتینە بۆ چارەسەركرنا كێماسییان، ژلایێ دووڤە تیما ئەلگەرمە بەرهەڤیێن باشتر كرینە ب ئینانا كۆمەكا یاریزانێن خودان شیان نموونە ئەیمەن حسێن و چەندین یاریزانێن دی، یارییا ئێكێ هەر ئەنجامەكێ پێشبینیكریە ژبەركو ئاستێ دورست یێ هەر تیمەكێ هێشتا دیارنینە، بۆ مە گرنگ و هیڤی خوازین یانەیا دهۆك ب سەركەڤیت.
بۆچی سزا نە ڕابوون
ل دووڤ ژێدەرێن رۆژنامەڤانی پشتی كۆمبوونا لژنەیا دێسپێلینێ و سزایان ل فدراسیۆنا فوتبۆلا ئیراقێ دگەل سەرۆك كارگێریێن هەردو یانەیێن دهۆك و زاخۆ و وەرگرتنا سۆزنامەیان، دڤیابا سزایێن پێشتر یێن ل سەر هەردو یانەیان هاتبا ڕاكرن ئەوێن دەرئەنجامێ پشتی یارییا دووماهییا كۆپا ئیراقێ دناڤبەرا هەردو یانەیان ل بەغدا هاتییە كرن تێدا فدراسیۆنا ئیراقێ بڕیارێن چەند سزایێن دژوار دژی هەردو یانەیان دەركربوون ژ وانا بۆ وەرزێ نوو یا خولا ستێرێن ئیراقێ دێ قۆناغا ئێكێ هەموویێ دا كو دبنە نێزیكی نەهـ یارییان بێ جەماوەر یاریێ كەن.
بڕیاربوو ئەڤ سزایە بهێتە ڕاكرن لێ فدراسیۆنا فوتبۆلا ئیراقێ ل بن گڤاشتێن هندەك یانەیێن پشكدارن نەچاربوون چو گوهۆڕینان د بڕیاریێن خوە دا نەكەن، بوو ئەگەر یارییا ئەڤرۆ یا دهۆكێ بێ جەماوەر بیت.
