ئەڤرۆ دهۆك دێ بزاڤێن قەرەبوو و ڤەگەڕاندنا سەركەفتنان كەت
ئەڤرۆقەیس وەیس:
چاڤەڕێ دهێتە كرن ئەڤرۆ چار یاریێن مایی ژ گەڕا سێیێ و قۆناغا ئێكێ یا هەڤڕكیێن خولا ستێرێن ئیراقێ یا فوتبۆلێ بهێنە ئەنجامدان، یانەیا دهۆك دێ یارییا خوە بەرانبەر یانەیا نەجەف ب هێزترین یارییا خوە دا كەت، یانەیا نەورۆز ل بەغدا دێ بیتە مێڤانا یانەیا كارەبا.
د یارییەكا ئاگرین دا بڕیارە تیما یانەیا دهۆك ئەلهۆیێن چیایی ببنە مێڤانا یانەیا نەجەف ئەوا دێ ل دەمژمێر هەشتی شەڤ هێتە ئەنجامدان، تیما دهۆكییا د دەمەكێ هەستیار دا دەرباز دكەن تایبەت پشتی د هەردو یاریێن خوە یێن بوری دا و دناڤ ئەرد و جەماوەرێ خوە دا بەرانبەر زەورا و هەولێر تووشی خوسارەتیێ بووی، دیسان ڕاهێنەرێ تیمێ بڕیار دابوو شەش یاریزانێن خوە ژ بەر ئاستێ وان یێ لاواز بهێنە دوور كرن، دبیت ئەڤ هەردو خالە كارتیكرنا دەرۆنی ل سەر یاریزانان هەبیت، لێ د فوتبۆلێ دا هەردەمێ تیم ب ئێك كۆم و هێز كاربكەن دشێن ئاستێ خوە باشتر و سەركەفتنان بینن.
جەماوەر چاڤەڕێ سەركەفتنێ نە
بۆ ڤێ یاریێ ئەلهۆیێن چیا یا داخوازكرییە ژلایێ جەماوەرێ خوە ئێك سەركەفتن بینت، لەوما ژی دێ هەموو بزاڤان كەت بۆ ڤێ یاریێ قەرەبوویا خالان بكەت و بشێت دووبارە ڤەگەڕیتە ئاست و ئەنجامێن جاران و دێ پشت بەستنێ ل سەر هێرشبەرێ خوە یێ نوو یێ لوبنانی كەریم دەرویش كەت، تایبەت روودانەكا مەزن ل پێشییا وێ یە ئەوژی كۆپا كەنداڤی، بەری دیدارا 22ێ ڤێ مەهێ بەرانبەر یانەیا ئەهلی سەنعا یا یەمەنی بكەت، ل دووڤ دیدارێن هەردو تیمان دهۆكێ شیایە نەهـ سەركەفتنان بینت بەرانبەر نەهـ خوسارەتییان و سێ وەكهەڤی هاتینە.
ژ یاریێن یێن ئەڤرۆ یانەیا نەورۆز دێ ل بەغدا بیتە مێڤانا یانەیا كارەبا ئەوا دێ ل دەمژمێر 5:30 ئێڤاری هێـە كرن، تیما نەورۆز د هەردو یاریێن خوە یێن پێشتر دا، دگەل كەربەلا و زاخۆ وەكهەڤی ئینایە، ب سەركێشییا راهێنەرێ خوە یێ بەرازیلی جۆرڤان ڤیێرا دێ شەڕی بۆ سەركەفتنا ئێكێ كەت، هەروەسان د یاریێن ئەڤرۆ دا جەوییە ل دەمژمێر هەشت شەڤ دێ بیتە مێڤانا نەفت ئەلبەسرا، دیسان نەفت دێ بەرانبەر نەفت میسان یاریێ كەت.
