ئەڤرۆ دهۆك دێ پێنگاڤا ئێكێ د كۆپا كەنداڤی دا هاڤێژیت
قەیس وەیس:
چاڤەڕێ دهێتە كرن ئەڤرۆ تیما یانەیا دهۆك یا فوتبۆلێ پێنگاڤا خوە یا ئێكێ د كۆپا كەنداڤی دا پاڤێژیت، دەمێ د ناڤ ئەرد و یاریگەها خوە دا ل دەمژمێر هەشتی شەڤ مێڤاندارییا یانەیا ئەهلی سەنعا یا یەمەنی دكەت كو دبیتە جارا سێیێ د دیرۆكا خوە دا پشكداریێن دەرڤە بكەت و یا ئێكێ د كۆپا كەنداڤی دا بكەت، هەرچەندە ئەڤ قارەمانییە بۆ ماوەیێ نەهـ سالە بوو هاتییە ڕاوەستاندن.
بۆ وەرزێ نوو بڕیارە هەشت یانە پشكداریێ تێدا بكەن ئەوێن هاتینە بەلاڤكرن ل سەر دو كۆمان، یاریێن وان دێ ب شێوەیێ خول دو قۆناغ هێنە ئەنجامدان و بەردەوامبن هەتا 25ێ نیسانا سالا 2025ێ، تیما فوتبۆلا یانەیا دهۆك نوونەرا هەرێما كوردستانێ و ئیراقێ یە و كەڤتییە د كۆما دویێ دا.
كۆما ئێكێ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
ل دووڤ لیستەیا یاریێن تیما یانەیا دهۆك د كۆپا كەنداڤی دێ بڤی شێوەی.
یارییا ئێكێ ل 22-10-2024 یانەیا دهۆك دێ ل یاریگەها خوە مێڤاندارییا یانەیا ئەهلی سەنعا یا یەمەنی كەت كو دێ بیتە رێورەسمێن ڤەكرنا وەرزێ نوو یا كۆپا كەنداڤی ئەوا دێ ل دەمژمێر حەفتی شەڤ هێتە ئەنجامدان.
یارییا دویێ دێ یانەیا دهۆك ل دویێ چرییا دویێ یا بهێت بیتە مێڤانا یانەیا زەفار یا عومانی.
یارییا سێیێ 27-11- 2024 ل دەمژمێر حەفتی شەڤ مێڤاندارییا نەسر یا كوێتی كەت.
یارییا چارێ كۆ دبیتە قۆناغا دویێ ژ كۆمێ دێ ل 3-12- 2024 بیتە مێڤانا نەسر یا كوێتی.
یارییا پێنجێ ل 4-2-2024 دێ بەر ب وەلاتێ یەمەن چیت و بیتە مێڤانا یانەیا ئەهلی سەنعا.
یارییا پێنجێ و یا دووماهیێ ژ قۆناغا كۆمان دێ ل 19-2-2024ێ مێڤاندارییا یانەیا زەفار یا عومانی كەت كو دێ ل دەمژمێر حەفتی شەڤ هێتە ئەنجامدان.
ل دۆر بەرهەڤیێن تیما دهۆكێ جاسم محەمەد حاجی سكرتێرێ یانەیا دهۆك و سەرپەرشتێ تیما فوتبۆلا یانەیێ گۆت: یاریەكا گرنگە و ب هێزە دێ بیتە ئێكەم پێنگاڤا مە یا دەرڤە د وەرزێ ئەڤ سالە دا تایبەت د گۆپا كەنداڤی دا، كادرێ راهێنانێ بەرهەڤیێن گەلەك باش كرینە و هەموو یاریزان ب مۆرالەكا بلند ژی بەرهەڤن ئێكەم سەركەفتن بینن، مە جەماوەرەكێ مەزن هەیە و گەشبینن دێ دیارییا سەركەفتنێ ژی پێشكێشكەن، ب ئۆمێدین هەر ژ خولەكا ئێكێ و هەتا فیركا دادڤانی ب دووماهی هاتنا یاریێ ب كەیفخوەشی دێ جەماوەر پشتەڤانییا تیما مە كەت، وەكو كارگێرییا یانەیێ هەر تشتەكێ پێدڤی ژی بۆ تیمێ و پێشوازییا تیما مێڤان كرییە.
بەرهەڤیێن یانەیا یەمەنی
د داخویانیەكا رۆژنامەڤانی دا عادل ئەلسالمی هاریكارێ راهێنەرێ تیما یانەیا ئەهلی سەنعا یا یەمەنی گۆت: بەرهەڤیێن مە بۆ ڤێ یاریێ ب شێوەكێ باش هاتینە كرن، بۆ ماوەیێ دو حەفتیە مە پشت گەرم ب بلندكرنا ئاستێ چەستەیی و هونەری یێ یاریزانان كرییە، ئەم یێن گەهشتینە قۆناغەكا باش، هەرچەندە ئەم د نەخۆشترین كاودان دا دەرباز دبین و شیانێن مە یێن كێم بەرانبەر یانەیێن دی یێن پشكدار، یاری بەرانبەر دهۆك یا ب سانەهی نابیت ژبەركو ئێك ژ تیمێن ب هێزە ل خولا ئیراقێ دا، بۆ مە گرنگ ئەم پشكداریەكا سەرفەراز بكەین، راستە یارییا ئێكێ یا بزەحمەتە تایبەت هەكە ژ دەرڤەیی یاریگەها خوە دا بكەین ژبەركو تاقیكرنەكا نوویە دگەل یانەكا ب هێز، بۆ مە گرنگ ئەم ئاست و ئەنجامەكێ باش بینن.
ژلایێ خوەڤە مشیر دۆسكی پشتەڤانەكێ بەردەوام یێ یانەیا دهۆك كەیفخوەشیا خوە دیار كر كو جارەكا دی تیما دهۆكێ ڤەگەڕیاییە پشكداریێن دەرڤە و گۆت: یارییا ئەڤرۆ بۆ مە دێ یا تایبەت و گرنگ بیت، ژبەركو پشتی پشكدارییا تیما مە د قارەمانییا كۆپا ئێكەتییا ئاسیا دا دو جارا دناڤبەرا سالێن 2010 هەتا 2013ێ دا كری، ئەڤرۆ بۆ جارا دویێ ڤەگەڕیایە پشكدارییا خوە یا دەرڤە و ئەڤچارە قارەمانییا كۆپا كەنداڤی یە، هەرچەندە دبێژن ئاستێ ئەهلی سەنعا هند ب هێز نینە لێ هیڤییا من ئەوە یاریزانێن مە د هۆشداریێ دابن و مەغرور نەبن، گەشبینم ئەڤرۆ دێ ئاهنگا سەركەفتنا تیما خوە گێرین، مە باوەری ب كادرێ راهێنانێ و یاریزانان یێن هەین، هەتا دووماهی فیركا دادڤانی دێ پشتەڤانێن یانەیا خوە بین و گەشبینن ئەلهۆیێن مە دێ نێجیرا خوە كەن و بلند فرن.
كادرێ دادڤانێن یارییا ئەڤرۆ قەتەری نە
فدراسیۆنا فوتبۆلا كەنداڤی بۆ بڕێڤەبرنا یارییا ئەڤرۆ یا تیما دهۆكێ بەرانبەر ئەهلی سەنعا كادرێ دادڤانان ژ وەلاتێ قەتەری دەستنیشانكرینە ئەو ژی هەر ئێك ژ محەمەد ئەلشەمەری دادڤانێ ئێكێ، جومعە ئەلبو رەشید، زاخی سنێد ئەلشەمەری، عەبدولهادی ئەلرویلی، عەبدولرەحمان جاسم و فەیسەل عیج ئەلشمەری، هەلسەنگاندنا دادڤانان سەلاح ئەلعباس ژ بەحرەینێ.
پاداشت و خەلاتێن قارەمانیێ
بۆ زانین قارەمانا كۆپا كەنداڤی دێ سێ ملیۆن دۆلاران وەرگریت، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ كۆپا دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
هەروەسان هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
