ئەڤرۆ دهۆك و سێمێل د دێربیەكێ پارێزگەهێ دا
قەیس وەیس:
چاڤەڕێ دهێتە كرن چار یاریێن مایی ژ هەڤڕكیێن گەڕا نەهێ یا خولا فوتبۆلا پلا ئێكا كوردستانێ دەربازبوون بۆ پلا نایاب ل دەمژمێر 2:30 پشتی نیڤرۆ بهێنە كرن، یارییا سێمێل و دهۆك د گرنگترین و گۆپیتكا هەڤڕكیێن ڤێ حەفتیێ دا نە، ژلایەكێ دووڤە یانەیا تەناهی دێ دڤێ گەڕێ دا یا چاڤەڕێ كرێ بیت ل دووڤ سیستەمێ خولێ.
یارییا حوان و دێربییەكێ براینی
دهێتە چاڤەڕێ كرن ئەڤرۆ ل یاریگەها سێمێلێ یا وەرزشی هەردو یانەیێن پارێزگەهێ سێمێل مێڤاندارییا یانەیا دهۆك بكەت د یارییەكا دهێـتە پێشبینیكرن یا جوان و دێربییەكێ براینی دا، تیما دهۆكێ ل ڕێزا سێیێ دهێت ب كۆمكرنا 14 خالان ژ حەفت یارییان كو ب چار سەركەڤتن، دو وەكهەڤی و خوسارەتییەك هەیە، یاریزانێن وێ 18 گۆل تۆماركرینە و پێنچ ل سەر تیما وان هاتینە تۆماركرن.
ژلایێ خوەڤە یانەیا سێمێل ژ هەشت یاریێن ئەنجامداین 13 خال كۆمكرینە ل ڕێزا پێنجێ دهێت كو ڤەرێژا سێ سەركەڤتن، چار وەكهەڤی و ئێك خوسارەتی هەیە، یاریزانێن وێ 15 گۆل تۆمار كرینە لێ 13 گۆل ژی ل سەر هاتینە تۆماركرن، ب شێوەیەكێ گشتی هەردو یانەیێن پارێزگەهێ د ئاست و ئەنجامێن باش دانە و هەڤڕكێن ب هێزن بۆ ب دەستڤە ئینانا پلێتێن دەربازبوون بەر پلا نایاب، دهێتە پێشبینكرن ئەڤ یارییە ب شێوەیەكێ جوان گیانێ براینی بهێتە بڕێڤەبرن.
شێخان چاڤ ل ڤەگەڕاندنا سەركەڤتنایە
ژلایێ خوەڤە د هەمان دەمدا یانەیا شێخان دێ ل كەركووكا دلێ كوردستانێ بیتە مێڤانا یانەیا شورجە د یارییەكا گرنگ و بهێز دا بۆ نوونەرا پارێزگەهێ، تیما شێخان ل رێزا 13ێ دهێت ب كۆمكرنا حەفت خالان ژ ئێك سەركەڤتن و چار وەكهەڤییان و سێ خوسارەتی هەنە، شەش گۆل تۆماركرینە لێ نەهـ گۆل ل سەر هاتینە تۆماركرن،دبەرانبەردا تیما مێڤان ل ڕێزا 14ێ دهێت ب شەش خالان، ئانكۆ یارییەكا ئاگرینە بۆ ڕێزبەندێ و خوە قورالكرن ژ ڕێزا داكەڤتنێ.
ژ یاریێن دی یێن ئەڤرۆ، یانەیا هەولێر دێ مێڤاندارییا یانەیا كفری كەت و ئارارات دێ بیتە مێڤانا یانەیا كویە، هەژی گۆتنێ یە 17 یانە د خولێ دا پشكدارن و یاریێن وان ب شێوەێ خول ئێك قووناغ دهێنە كرن، چار یانەیێن ڕێزبەندییا ئێكێ دی دەربازبنە پلا نایاب، هەروەسان ئەو چار یانەیێن ڕێزبەندییا دووماهیێ دێ پاشڤە چنە پلا دو یا وەرزێ بهێت.
