ئەڤرۆ دێ باشترینێن جیهانێ هێنە ڕاگەهاندن
بڕیارە ئەڤرۆ ل دەمژمێر نەهی شەڤ ل هۆلا شاتلێ یا ب ناڤودەنگ ل پایتەختێ فرەنسا پاریس ڕێورەسمێن چاپا 69ێ یا ئاهنگا دەستنیشانكرنا باشترین یاریزانێن یارییا فوتبۆلێ ل سەر ئاستێ جیهانێ بهێنە ڕاگەهاندن و باشترین یاریزان ب بالۆن دۆرێ بهێتە خەلاتكرن كو ئەڤ ڕێورەسەمە سالانە ژلایێ گۆڤارا فرانس فوتبۆل یا فرەنسی ب هەڤكارییا فدراسیۆنا فوتبۆلا جیهانێ فیفا دهێتە كرن.
پیڤەرێن دەستنیشانكرنێ
شێوازێ ژێگرتنا یاریزانان بۆ باشترینێ جیهانێ ل سەر سێ پیڤەران هاتییە دانان، یا ئێكێ ئاستێ یاریزانی یێ هونەری، یا دویێ شیانێن یاریزانی دگەل تیما خوە چو یانە بیت یان هەلبژارتی، یا سێیێ گیانێ وەرزشی و یارییا پاقژ دناڤ یاریگەهێ دا، ژێگرتنا یاریزانان ژی ژلایێ كۆمەكا رۆژنامەڤانێن جیهانی یێن ژێگكرتی و سنۆردار، كو هەر ئێك دێ لیستا یاریزانان دانیت، لژنەیەكا تایبەت دێ خالان بۆ هەر یاریزانەكێ ل دووڤ ڕێزبەندییا وی دانیت ل دووماهیێ ئەو یاریزانێ زێدەتر خال هەین دێ بیتە باشترینێ جیهانێ.
چەند خەلات هێنە بەلاڤكرن
دهێتە پێشبینیكرن د ناڤا ڕێورەسمان دا 13 خەلات بۆ یاریزانان، یانە، ڕاهێنەران ل سەر ئاستێ كوڕان و كچان، دیسان ئاستێ گەنجان هێنە و بڤی شێوەیی بن، تەپا زێری بۆ كوڕ و كچان، خەلاتێ كۆپا بۆب اشترین یاریزانێ گەنج كور و كچ، خەلاتێ یاشین بۆ باشترین گۆلپارێز كور و كچ، خەلاتێ كرۆیڤ بۆ باشترین ڕاهێنەر كوڕ و كچ، خەلاتێ گێرد مۆلەر بۆ باشترین گۆلكەر كوڕ و كچ، خەلاتێ سوقرات بۆ كەسێ كارەكێ مرۆڤاتی كربیت، دیسان خەلاتێ باشترین یانە كوڕ و كچ.
كی بەربژارە بۆ باشترینێ جیهانێ
ل دووڤ بەلاڤووكێن وەرزشی و رۆژنامەیێن جیهانی ئەو یاریزانێن بەربژار بۆ بالندۆرێ هەر ئێك ژ عوسمان دیمبیلی- پاریس سانجێرمان یا فرەنسی، لامین یامال- بەرشەلۆنا یا ئسپانی، فیتینیا- پاریس سانجێرمان، هەلبژارتیێ پۆرتۆگال، ڕاڤینیا- بەرشەلۆنا یا ئسپانی و هەلبژارتیێ بەرازیل، محەمەد سەلاح- لیڤەرپۆلا ئنگلتەرا و هەلبژارتیێ مسرێ، ئەشرەف حەكیمی- پاریس سانجێرمان و هەلبژارتیێ مەغرب، كۆل بالمەر- چێلسی و هەلبژارتیێ ئنگلتەرایێ، كێلیان مباپی- ریال مەدرید یا ئیسپانی و هەلبژارتیێ فرەنسا، ڤابیان رۆیێز- پاریس سانجێرمان و ئسپانیا، سكۆت مێكتۆمینای- ناپۆلی یا ئیتالی و هەلبژارتیێ ئسكۆتلەندا.
چەنسێ كێ پترە بۆ بالندۆرێ
ل دووڤ دووماهی بۆچوون دەزگەهێ شرۆڤەكرنا وەرزشی یا جیهانی كو دەلیڤە پتر بۆ عوسمان دیمبلیی بەرهەڤە ئەو ببیتە باشترین یاریزانێ ئەڤ سالە، تایبەت پشتی بوویە ئەگەرەك دگەل یانەیا خوە ناسناڤێ قارەمانییا یانەیێن ئۆرۆپا قارەمانێن خولا چامپیۆنز لیگ ب دەستڤە بینت، ل دووڤ ڕاوەرگرتنا وان رێژەیا 72% بۆ عوسمانی هاتییە، ژلایەكێ دووڤە ڕێژەیا 56% بۆ لامین یامال هاتییە، بۆ ڤیتینیا 40% هاتییە، بۆ محەمەد سەلاحی 39% هاتییە، لێ یا دروست و فەرمی دێ ئەڤ شەڤە هێتە ڕاگەهاندن.
