ئەڤرۆ دێ دێربیەكا پارێزگەهێ هێتە كرن
بڕیارە ئەڤرۆ و سوبەهی حەفت یاری ژ هەڤڕكیێن گەڕا نەهێ یا خولا پلا ئێكا كوردستانێ یا فوتبۆلێ ل دەمژمێر 2:3 پشتی نیڤرۆ بهێنە ئەنجامدان، یارییا دهۆك و سێمێل دێربیێ پارێزگەهێ یە و تەناهی دێ ڕواندوز مێڤانكەت و یانەیا خاك دێ یا چاڤەڕێ كری بیت
یاریا دهۆك و سێمێلێ ئاگرینە
یاریگەها سێمێل یا وەرزشی دێ پشتەڤانێن هەردو یانەیێن پارێزگەهێ كۆمڤەكەت ژبۆ دیتن و پشتەڤانییا یانەیێن خوە دهۆك و سێمێل د یارییەكا ئاگرین و دێربیەكێ تایبەت یێ پارێزگەهێ دا، تیما سێمێل ئەوا ب ئارمانجێن دەربازبوونێ دەست ب هەڤڕكییان كری كەڤتییە دئاستەنگێن جودا دا، پشتی بۆرینا گەڕا هەشتێ ژ حەفت یارییان 11 خال كۆمكرینە ژ سێ سەركەفتن، دو وەكهەڤی و دو خوسارەتی هەنە ل رێزا هەشتێ دهێت، ژلایێ خوەڤە كاودانێن دهۆكێ ژ وێ باشتر نینن ئەوا ب تنێ پێنج خال كۆمكرین ئێك سەركەفتن و دو وەكهەڤی هەنە و چار خوسارەتی تۆماركرینە ل رێزا 13ێ دهێت كو یا د مەترسییا داكەفتنێ بۆ پلا دویێ دا، لەوما ژی یارییا ئەڤرۆ دێ یا گرنگ بیت بۆ هەردو یانەیان و سێ خالێن وان دێ پێنگاڤەكا باش هاڤێژیت بۆ رێزێن پێشیێ.
تەناهی چاڤ ل سەركەفتنێ یە
ژلایێ خوەڤە بڕیارە سوبەهی یانەیا تەناهی دێ ل یاریگەها خوە یا زانكۆیا دهۆك مێڤاندارییا یانەیا ڕواندوز كەت، یانەیا پارێزگەهێ دێ بزاڤێ كەت بۆ دەستڤە ئینانا سێ خالان پێخەمەت پێشڤەچوون و مانا خوە د خولێ دا پارێزیت و نە كەڤیتە لبن گڤاشتنێن پاشڤەچوونێ بۆ پلا ئێك دا، تەناهی خودانا هەشت خالانە ل رێزا 11ێ دهێت و ڕواندوز ب تنێ ئێك خال كۆمكریە رێزا 15ێ و دووماهیێ دهێت.
