ئەڤرۆ دێ چار یانەیێن دی پلێتا دەربازبوونێ مسۆگەر كەن
بڕیارە ئەڤرۆ هەشت یاریێن دی ژ چارچووڤێ قۆناغا كۆمان و گەڕا شەشێ یا قارەمانیا یانەیێن ئۆرۆپا قارەمانێن خولا چامپیۆنز لیگ بهێتە كرن و حەفت یانە دێ بۆ چارپلێتێن دەربازبوونێ بەر ب قۆناغا 16ێ شەڕی كەن.
كۆما ئێكێ
بایرن میۆنخ- كۆبنهاگن
گالاتا سارایی- مانچستەر یۆنایتد
یانەیا بایرن میونخ یا ئەلمانی دێ پشتگەرمییا دەربازبوونا خوە یا مسۆگەر كری مێڤاندارییا یانەیا كۆبنهاگن یا دانیماركی كەت، هەرچەندە یانەیا بافارییا سەرێ لیستێ دهێت ب12 خالان و بەرهەڤییان بۆ قۆناغا دی دكەت لێ مێڤانا وێ یانەیا دانیماركی ئەوا چار خال كۆمكرین و رێزا دویێ دهێت دێ ب هەمی سەنگا خوە هێتە دناڤ یاریێ دا پێخەمەت رێزا خوە ژ دەست نەدەت و بەر ب هیڤییا بچیت، دبیت بایرن پلانەكێ بدانیت یاریزانێن خوە نە وەستینت لێ دناڤ یاریگەها خوەدا ناهێلیت تووشی خوسارەتیێ بیت، یارییا دویێ یا ئاگری دڤێ كۆمێ دا دێ دناڤبەرا گالاتا سارایی یا توركی بیت ئەوا چار خال كۆمكرین و رێزا سێیێ دهێت و مێڤانا وێ مانچستەر یۆنایتد یا ئنگلتەرایێ ئەوا سێ خال رێزا چارێ دهێت، ئەڤ یارییە دێ ئێك ژ یاریێن دی یێن بهێز و پڕی هەڤڕكی بیت ژبەركو هەردو یانەیان چەنسێ دەربازبوونێ بۆ قۆناغا 16ێ یا هەیی، بۆ زانین یارییا بایرن و كۆبنهاگن دەمژمێر 11ی شەڤ بیت لێ یا گالاتا سارایی و مان یۆنایتد دەمژمێر 8:45 هێتە كرن.
كۆما دویێ
سیڤییا- ئایندهۆڤن – ئارسنال- لانس
شەڕێ پلێتێن دەربابوونێ بۆ هەر چار یانەیێن ڤێ كۆمێ دا بەردەستە ژ وانا بۆ چامپیۆنزێ و یا دی بۆ كۆپا خولا ئۆرۆپایێ، دەمژمێر 8:45 شەڤ یانەیا سیڤییا یا ئسپانی دووماهی دەلیڤە د یارییا ئەڤ شەڤە دا دێ مێڤاندارییا ئایندهۆڤن یا هۆلەندی كەت، هەرچەندە یانەیا ئسپانییا ب دو خالان رێزا چارێ و دووماهیێ دهێت لێ ئایندهۆڤن پێنج خال هەنە و رێزا دویێ دهێت، ئانكو دو یاری ماینە ئەڤ قۆناغە دێ ب دووماهی هێت ژ هەردو یارییان سیڤییا سەركەفتنێ بینت دێ دەربازبوونێ ژی ب دەستڤە ئینیت، د بەرانبەر دا یانەیا هۆلەندی ب سانەهی خوە ب دەستڤە بەرنادەت و دێ شەڕێ پاراستنا رێزبەندییا خوە كەت و دبیت بۆ سەرێ لیستێ ژی بجیت هەكە ئەنجامێن یاریێن دی د بەرژوەندییا وێ دابن، لێ یانەیا ئەرسنال خودانا سەرێ لیستێ ئەوا د باشترین دەمدا د خولا ئنگلتەرایێ دا دبۆرینت و خودانا نەهـ خالان رێزا ئێكێ د كۆمێ دا دێ هەمی بزاڤان كەت نە هێلیت مێڤانا وێ لانسی یا فرەنسی چو خالان ژێ وەربگریت و گڤان ل سەرێ لیستێ بكەت ئەوا ئەڤ یارییە دەمژمێر 11ێ شەڤ هێتە كرن.
كۆما سێیێ
ریال مەدرید- ناپۆلی
سپۆرتینگ براگا – یۆنیۆن
ئێك ژ یاریێن دی یێن بۆ جەماوەرێ وەرزشی خوەشیەكێ ژێ دبینن یارییا دناڤبەرا ریال مەدرید یا ئسپانی هەلگرا 14 ناسناڤێن چامپیۆنزێ بەرانبەر ناپۆلی یا ئیتالی كەت ئەوا ئەڤ سالە هیڤیێن مەزن هەین، یانەیا ئسپانی دەربازبوونا خوە بۆ قۆناغا 16ێ مسۆگەر كرییە ب كۆمكرنا 12 خالان لێ ناپۆلی حەفت خال هەنە و رێزا دویێ دهێت و بتنێ پێدڤی ب ئێك سەركەفتن هەیە ژ دو یارییان هەتا دەربازبیت یان ژی تیما سپۆرتینگ براگا یا پۆرتۆگالی تووشی خوسارەتیێ بیت بەرانبەر یۆنیۆن بەرلین یا ئەلمانیا بیت، لێ تیما پۆرتۆكالی ژی هیڤیێن هەین ئەوا سێ خال و رێزا سێیێ دهێت و یۆنیۆن بتنێ ئێك خال كۆمكریە و رێزا چارێ دهێت، ژلایێ خوەڤە ریال مەدرید دبیت ب كۆمەكا یاریزانێن خوە یێن هنگاڤتی بهێتە دناڤ یاریێ دا و ئەڤە ژی دێ بیتە دەلیڤە بۆ ناپۆلی ئەو ئەنجامی د بەرژوەندییا خوە دا ب دووماهی بینت، بۆ زانین هەردو یاری ل دەمژمێر 11شەڤ هێنە ئەنجامدان.
كۆما چارێ
ریال سوسیداد- رێد بۆل سالزبۆرگ
بەنفیكا – ئەنتەر میلان
هەرچەندە هەردو یانەیێن ئەنتەر میلان و ریال سوسیداد دەربازبوونا خوە بۆ قۆناغا 16 مسۆگەر كرینە، لێ یاریێن وان یێن ئەڤ شەڤە دبیت گوهۆڕینێ بێخیتە درێزبەندییا واندا، یارییا ئێكێ ریال سۆسیداد یا ئسپانی ئەوا دێ مێڤاندارییا رێد بۆل سالزبۆرگ یا نەمسایی كەت و یا دویێ ئەنتەر میلانا ئیتالی دێ بیتە مێڤانا بەنفیكا یا پۆرتۆگالی، ریال سوسیداد 10 خال هەنە و ئەنتەر هەمان خال هەنە رێزێن ئێكێ و دویێ دهێن، رێد بۆل سالزبۆرگ شەش خال هەنە رێزا سێیێ دهێت و بەنفیكا ب تنێ ئێك خال هەیە رێزا چارێ و دووماهیێ دهێت، دبیت شەڕێ رێدبۆل و بەنفیكا بتنێ بۆ پلێتا كۆپا خولا ئۆرۆپا بیت، ئەڤ هەردو یارییە ژی دێ ل دەمژمێر 11ێ شەڤ هێنە كرن.
