ئەڤرۆ دێ قارەمانییا هەلبژارتیێن په‌روه‌رده‌یان ب دووماهی هێت
ئەڤرۆ، زنار تۆڤی:
بڕیاره ئه‌ڤرۆ یاریێن دووماهییا قارەمانییا باسکێت بۆلا 3*3 یێن کوڕان و کچان بۆ هەلبژارتیێن پەروەرده‌یێن قەزایێن پارێزگەها دهۆک ل هۆلا گرتییا یانه‌یا دهۆکێ بهێنە کرن، ئه‌وا هەر ئێک ژ پەروەرده‌یێن دهۆک رۆژهەلات، دهۆک رۆژئاڤا ل سەر ئاستێ کوڕان و کچان هەڤڕکیێ ل سەر ناسناڤێ قارەمانیێ کەن، دیسان هەرئێک ژ پەروەرده‌یێن شێخان ل سەر ئاستێ کچان و سێمێل ل سەر ئاستێ کوڕان رێزا سێیێ ب دەستڤە ئینایە، ئەوا هەر نه‌هـ پەروەرده‌یێن قەزایێن پارێزگەها دهۆکێ پشکداری تێدا کری.
ل دۆر ڤێ یه‌كێ ئێحسان حەسەن زۆبێر رێڤەبەرێ چالاکیێن وەرزشی و دیدەڤانی ل پارێزگەها دهۆکێ بۆ رۆژناما ئەڤرۆ گۆت: پشتی ئەنجامدانا ڤه‌ستیڤالا یاریێن گۆرەپانێ و قارەمانییا فۆتسالا کوڕان بۆ قۆناغا بنەرەت و فوتسالا کچان بۆ قۆناغا ( 7 – 9) بنەرەتی و ئەنجامدانا قارەمانیا تەپا مێزێ بۆ قۆناغا ئامادەیی کوڕان و کچان دپلانا مە دایە ئێکسەر پشتی ڤێ قاره‌مانیێ هه‌ڤڕكیێن قارەمانیا ڤۆلی بۆلا کوران دەستپێبکەین.
ناڤهاتی گۆت ژی: ئارمانجا مە یا سەرەکی پەروەردەیێ یە کو د ڤان جۆرە قارەمانییان دا مە دڤێت هەڤنیاسین د ناڤبەرا قوتابیێن هەمی قەزایێن پەروەرده‌یێن پشکدار دا پەیدا بکەین، ژبلی هندێ قوتابیان فێری گیانێ هەڤرکیێ بکەین، دیسان فێری قەبوولکرنا ئەنجامان بکەین و گیانێ هەڤالینییێ ژی ل دەف وان پەیدابکەین و هەر ئەڤ ئارمانجەیە یاکو وەرزشا قوتابخانان لسەر هاتییە ئاڤاکرن.
