ئەڤرۆ د كۆپیتكا یاریێن خولا ئیراقێ دا باسكێت بۆلا زاخۆ مێڤانا كارەبایە
قەیس وەیس:
بڕیارە ئەڤرۆ تیما باسكێت بۆلا یانەیا زاخۆ بەر ب بەغدا پایتەختێ ئیراقێ بچیت ژبۆ ئەنجامدانا یارییا خوە یا حەفتێ ژ چارچووڤێ هەڤڕكیێن خولا پلا نایابا ئیراقێ، ئەوا چاڤەڕێ یە ل ئەینییا بهێت ل هۆلا گرتییا شەعب ببیتە مێڤانا یانەیا كارەبا ل سەر ئاستێ پێشكەفتی و تازەپێگەهشتییان.
ل دەستپێكی تیما تازەپێگەهشتییان دەمژمێر چاری ئێڤاری دێ بنە مێڤانێن تازەپێگەهشتیێن كارەبا، دووڤدا ل دەمژمێر شەش تیما پێشكەفتییان دێ یارییا خوە بەرانبەر هەمان تیم كەن ل سەر ئاستێ پێشكەفتیان.
كوڕێن خابووری ئەوێن د شەش یاریێن بۆری دا سێ سەركەفتن و سێ خوسارەتی هەین نەهـ خال كۆمكرینە رێزا پێنجێ دهێت، بەرانبەر دا كارەبا هەشت خال هەنە رێزا حەفتێ دهێت، هەرچەندە تیما زاخۆ ل دو یاریێن دەستپێكێ بهێز هاتبوو دناڤ خولێ دا لێ بۆ یاریێن دووڤدا ئەو ئاستێ پێدڤی نە هاتە دیتن تایبەت ئەو یاریزانێن پیشەكار یێن ئەمریكی تایبەت رەشاد حسێن، مایكل مەككۆل و ریتچارد چاكسۆن، ئەڤچەندە بوویە جهێ نەرازیبوونا كادرێ راهێنانێ و كارگێرییا یانەیی و جەماوەرێ وەرزشی.
ل دووڤ پێزانین دەست ب رۆژنامەیا ئەڤرۆ كەفتین دبیت یارییا كارەبا دووماهی دەلیڤە بیت بۆ یاریزانین پیشەكار هەكە ئاستێ خوە یێ راستەفینە نیشان نەدەن دوور نینە بهێنە دوورئێخستن و یێن باشتر بهێنە جهێ وان، كارگێرییا یانەیا زاخۆ ب هەمی شیانێن خوە دێ بزاڤێ كەت هێزا تیما خوە د ناڤ خولێ دا ڤەگەرینت وەكو هەڤڕكەك د خولێ دا.
