ئەڤرۆ زاخۆ دێ بزاڤێن مسۆگەركرنا قۆناغا پلەی ئۆف كەت
چاڤەڕێ دهێتە كرن ئەڤ هەردو تیمێن باسكێت بۆلا یانەیا زاخۆ ل سەر ئاستێ پێشكەفتیان و لاوان یاریێن خوە ژ گەڕا 19ێ و بەری دووماهییا قۆناغا ئێكێ یا خولا پلا نایابا ئیراقێ مێڤاندارییا یانەیا غاز ئەلشیمال ل هۆلا گرتییا بنگەهێ وەرزش و لاوان ل باژێرێ زاخۆ بكەت
ل سەر ئاستێ لاوان بڕیارە ل دەمژمێر دو یێ پشتی نیڤرۆ یارییا خوە ئەنجام ب دەن، لێ ل سەر ئاستێ پێشكەفتییان و د یارییەكا گرنگ و چارەنڤیس دا دێ ل دەمژمێر چاری ئیڤاری ئەنجامدەت و بزاڤێ كەت ببیتە ئێك ژ تیمێن هەشتێ یێن دەربازبوونێ بۆ قۆناغا پلەی ئۆف مسۆگەر بكەت ئەوا 11 یانە هەڤڕكیێ بۆ دكەن، كوڕێن خابووری هەتا نوكە ب كۆمكرنا 25 خالان زێدەباری خالەكا تیما لاوان ل رێزا حەفتێ دهێت ب ئەنجامدانا 18 یارییان كو دێ بزاڤێ كەت هەردو یاریێن بهێت دا بشێت دەربازبوونا خوە مسۆگەر بكەت.
د داخویانیەكێ دا جوتیار عەلی هاریكارێ راهێنەرێ زاخۆ دیاركر یارییا ئەڤرۆ و یا بهێت بۆ مە گەلەك گرنگن و چارەنڤیسن بەر ب قۆناغا دویێ، بەرهەڤیێن مە د بەردەوامن و رژدین و گەشبینن ب دەستڤە ئینانا پلێتا دەربازبوونێ بەر ب قۆناغا پلەیی ئۆف، هەر تشتەكێ پێدڤی ژی كارگێرییا یانەیێ بۆ تیمێ بەرهەڤكرینە و یا د شیان دا بیت دێ بۆ سەركەفتنێ كەین
بۆ زانین دیفاع ئەلجەوی ب 34 خالان سەرێ لیستێ دهێت، كەرخ ب 33 خالان، نەفت ب 32 خال، شورتە ب 28 خال، حەشد ئەلشەعبی ب 28 خال، دیجلە ئەلجامعە ب 26 خالان رێزێن دویێ هەتا شەشێ دهێن، زاخۆ ب 25 خالان رێزا حەفتێ، كارەبا ب هەمان خال رێزا هەشتێ دهێت، حللە ب 24 خالان، نەفت ئەلشیمال 23خال و غاز ئەلشیمال 22 خالان رێزێن نەهێ هەتا 11ێ دهێن.
