ئەڤرۆ سیڤییا و رۆما دێ شەڕێ ناسناڤێ یۆرۆ لیگایێ كەن
ئەڤرۆ
بڕیارە ئەڤرۆ ل دەمژمێر 10ێ شەڤ یاریگەها بۆشكاش ئارینا ل پایتەختێ هنگاریا بۆدابسێت قارەمانێ وەرزێ 2022- 2023ێ یێ یۆرۆ لیگ بهێتە كرن كو دهێتە هژمارتن قارەمانیا دویێ یا ئۆرۆپا پشتی چامپیۆنز لیگ، ئەوا دێ دناڤبەرا هەردو یانەیێن سیڤییا یا ئسپانی و رۆما یا ئیتالی هیتە ئەنجامدان.
دەربازبوونا هەردو یانەیان
یانەیا سیڤییا یا ئسپانی دەربازبوو یاریا دووماهیێ پشتی سەرجەمێ هەردو یاریێن هاتنێ و چوونێ یێن پێش دووماهیێ ب وەكهەڤیەكێ و سەركەفتن ل سەر یانەیا یۆڤانتۆس یا ئیتالی ئینایی، ژلایێ خوەڤە یانەیا رۆما ژی ب هەمان ئەنجام شیا ل سەر كیستێ یانەیا بایرن لیڤەركۆزن یا ئەلمانی دەربازبوویە یاریا دووماهیێ، سیڤییا خودانا بلندترین رێژەیا دەستڤە ئینانا ناسناڤی یە ب شەش جاران، بەرانبەر دا رۆما نە شیایە چو ناسناڤان ب دەستڤە بینت.
چەند پێزانینێن بەری یاریێ
ئەو تیما ناسناڤێ یۆرۆ لیگ ب دەستڤە بینت دێ بۆ قارەمانیا كێشوەران پشكداریێ كەت، دیسان دێ دەربازبوونا خوە بۆ چامپیۆنز لیگ یا وەرزێ بهێت مسۆگەر كەت، یانەیا رۆما ئەوا ب سەركێشیا راهێنەرێ خوە یێ پۆرتۆگالی خوسێی مۆرینیۆ د خولا ئیتالیا دا رێزا شەشێ دهێت ب60 خالان 48 گۆل تۆماركرینە و 37 گۆل ل سەر هاتینە كرن، ژ 10 یاریێن بۆری دا بتنێ دو جاران سەركەفتن ئینایە، ژلایێ خوەڤە سیڤییا ب راهێنەراتیا خۆسێ لویس مێندێلێپار د خولا ئسپانیا دا 49 خال كۆمكرینە ل رێزا 11ێ دهێت و 46 گۆل هەنە و 52 گۆل ل سەر هاتینە تۆماركرن، دادڤانێ ئنگلتەرایێ ئنتۆنی تایلەر دێ یاریێ ب رێڤەبەت.
هەڤڕكی بۆ ناسناڤێ گۆلكەرێ قارەمانیێ
ڤیكتۆر بۆنیڤاس یاریزانێ یۆنیۆ سان خیلویزی یا بەلجیكی و ماركۆس راشفۆرد ژ مانچستەر یۆنایتد یا ئنگلتەرا ب شەش گۆلان هەڤپشكی رێزا ئێكێ دهێن، لێ د یاریا ئەڤرۆ دا سێ یاریزان دێ بۆ گۆلكەرێ خولێ شەڕی كەن ئەوێن هەر ئێك چار گۆل تۆماركرین، ئەوژی ماركۆ دیبالا و لۆرێنزۆ بێلگرینی یاریزانێن یانەیا رۆما و یوسف ئەلنەسری یاریزانێ یانەیا سیڤییا.
