ئەڤرۆ سەنحاریب چاڤ ل سەركەڤتنا سێیێ یە داود رەبەن: دەربازبوون مسۆگەر بوویە و هیڤییا مە دەستكەڤتە
چاڤەرێ دهێتە كرن ئەڤرۆ ل دانێ نیڤرۆ تیما ڤۆلی بۆلی بۆلا یانەیا سەنحاریب دێ یارییا خوە یا سێیێ ژ چارچووڤەیێ هەڤڕكیێن قارەمانییا رۆژئاڤا ئاسیا ل سەر ئاستێ كچان ب هیڤیینە سەركەڤتنێ بینن و وەكو قارەمانا كۆما خوە دەربازبنە قووناغا دویێ، ئەوا هەڤڕكیێن وێ ل هۆلا سەلوا وەلاتێ كۆێتێ بەردەوامن و ب پشكدارییا 12 یانەیان ل سەر ئاستێ پێشكەڤتیان دهێتە كرن.
\
كچێن سەنحاریب بۆ سەركەڤتنێ بەرهەڤن
تیما یانەیا سەنحاریب نوونەرا پارێزگەها دهۆكێ، كوردستانێ و ئیراقێ دێ یارییا خوە یا سێیێ ژ چارچووڤەیێ كۆما سێیێ بەرانبەر یانەیا نەسر یا ئۆردنی ل دەمژمێر ئێكێ نیڤرۆ كەت، كچێن سەنحاریب د یارییا ئێكێ دا سەركەڤتنەكا باش ل سەر یانەیا فەیحا یا سعۆدیێ ئینابوو ب(3-1) گێمان، یارییا دویێ بەرانبەر قدوس یا فلەستینی ب سێ گێمان بێ بەرانبەر سەركەڤت و دەربازبوونا خوە بۆ قووناغ دویێ مسۆگەر كر، دیارییا ئەڤرۆ دا بەرانبەر یانەیا نەسر دێ بزاڤێ كەتە سەركەڤتنا سێیێ بینیت، نوونەرا كوردستانی و ئیراقی چاڤ ل سەركەڤتنێ یە وەكو قارەمانا كۆما خوە دەربازبیتە قووناغا دووڤدا
لدۆر یارییا ئەڤرۆ داود ڕەبەن سەرۆكێ یانەیا سەنحاریب و سەرۆك شاندنێ تیمێ بۆ رۆژنامەیا ئەڤرۆ گۆت: هەتا نوكە بەرهەڤیێن تیما مە بۆ یارییا ئەڤرۆ گەلەك د باشن و ب مۆرالەكا بلند دێ هێنە دناڤ یاریێ دا، هەڤڕكا مە نەسر یا ئۆردنی وەكو مە سەركەڤتنێن یێن ئیناین لەوما ژی یارییەكا ب سانەهی نابیت، لێ مە باوەرییەكا مەزن ب یاریزان و كادرێ ڕاهێنانێ هەیە كو دێ ل دووڤ پلان و هیڤیێن مە شێن سەركەڤتنا سێیێ ئینن.
هەروەسان ناڤهاتی گۆت: هەردو یانەیان دو یاریێن كرین ئەڤەژە بۆ ڕاهێنەر ویاریزانان ئاست و هێزا ئێكود دیاربووینە، لەوما ژی دێ یارییەكا پری هەڤڕكی بیت، كچێن مە د ڕژدن و گەشبینن دێ بەردەوامیێ دەنە ئەنجامێن باش و پلێتەكا دەربازبوونێ بۆ قووناغا پێش دووماهیێ وەرگرن، راستە بۆ جارا ئێكێ یە د دیرۆكا یانەیا مە دا پشكداربووینە، لێ گەشبینن دێ پشكدارییەكا سەرفەراز و سەركەڤتی بیت و هیڤییا مە دەستكەڤتەكە.
بۆ زانین تیما ڤۆلی بۆلا یانەیا سەنحاریب د كۆما سێیێ دایە پێكهاتینە ژ یانەیێن نەسر یا ئوردنی، قودس یا فلەستینی و فەیحا یاسعودی، كۆما ئێكێ پێكهاتییە ژ قەلەمۆن یا لوبنانی، قەتەر یا قەتەری، عەلا یا سعۆدیێ، فەتات یا كۆێتی، كۆما دویێ پێكهاتینە ژ نەسر یا یەمەنی، شارقە یا ئیماراتی، عەرەبی یا قەتەری و سەلوا یا كوێتی.
