ئەڤرۆ شانۆگەریەكا جودا ل دهۆكێ دێ هێتە نیشادان
كۆمەكا ئەكتەر و شانۆڤانێن دهۆكێ مژوولی پرۆڤە و كارێ شانۆگەریەكێنە كو بریارە ل رۆژێن ٥ـ٦ـ٧/٧/٢٠٢٣ ل باژێرێ دهۆكێ و ل هۆلا محەمەد عارفێ جزیری شانۆگەری یا ب ناڤونیشانێ (گەشت) بهێتە نیشادان، كو ژ نڤیسین و دەرهێنانا (د. فازڵ سودانی) یە.
د. فازڵ سودانی، دەرهێنەر و نڤیسەرێ شانۆگەریا ناڤهاتی بۆ ئەڤرۆ خویا كر كو ئەڤ نیشادانە ل شوینا كو پشتبەستنێ ل سەر دیالۆگێ بكەت، لێ ئەو ل سەر وێنەی دكەت، ب ڤی شێوەی زمانەكێ جیهانی كو هەر كەسێ ببینت دشێت لێ تێبەگەهیت. دیسا سودانی دیاركر كو ناڤەرۆكا ئەڤی بەرهەمی بەحس ل پەیوەندیا هونەرمەندی و زاتێ وی و جڤاكی دكەت، داكو ب ئەڤی شێوەی بشێت ژیانێ رۆهن بكەت و رەنگێ زەر بكەتە رۆناهی بۆ جانێ خوە و كەسانێن دیتر، ژبۆ بەرجەستەكرنا ئەڤێ چەندێ ژی ژیانا تراژیدیك یا هونەرمەند (ڤانكۆخ)ـی بكارئینایە.
ناڤهاتی گۆت: سینۆگرافیا ڤێ شانۆگەریێ ژ لایێ هونەرمەند (شیراز عەزیز) ڤە هاتیەكرن، هەروەسا دەرهێنەر و نڤیسەر (سەرحان ئەحمەد) رۆلێ هاریكارێ دەرهێنەری دیتیە، زێدەباری ڤێ ئێكێ ئەڤ بەرهەمە ل گەل كۆمەكا ئەكتەرێن ب ئاست هاتیەكرن كو ژ وان ژی مامۆستا (سیار تەیب)، هەر وەسا ئەكتەرێ ناڤدار (كاروان جەرجیس) زێدەبارێ ( ژین محەمەد، هیڤان شەعبان) كو رۆلێن سەرەكی هەلگرتینە.
