ئەڤرۆ فیستەڤالا 16ێ یا تری و هنگڤینی ل دهۆكێ دێ هێتە ڤەكرن
بڕیارە ئەڤرۆ 20/9/2023 و ل دەمژمێر ١١ی سپێدێ و ب پشتەڤانی و چاڤدێریا د. عەلی تەتەر، پارێزگارێ دهۆكێ فیستەڤالا 16ێ یا تری و هنگڤینی ل فاملی مۆل ل دهۆكێ بهێتە ڤەكرن.
فیستەڤالا تری و هنگڤینی سالانە ب مەرەما پشتەڤانیا بەرهەمێ خۆمالی و جۆتیاران ل پارێزگەها دهۆكێ دهێتە ڤەكرن و تێدا چەندین جۆرێن تری و هنگڤینی دهێنە نیشادان، هەروەسا پارێزگارێ دهۆكێ و رێڤەبەریا گشتیا چاندنێ ژی ب بەردەوامی بزاڤان دكەن بۆ ساخكرنا بەرهەمێن خۆمالی.
ل دووڤ پێزانینان نێزیكی 125 جۆرێن تری ل پارێزگەها دهۆكێ هەنە و پتری 50 تۆخمێن وان ل فیستەڤالێ دێ هێنە نیشادان، هەروەسا هنگڤینێ سروشتی و خۆمالی یێ گوند و چیایێن كوردستانێ ژی تێدا دێ هێتە نیشادان.
سالانە فیستەڤا تری و هنگڤینی ل دهۆكێ د مەها ئیلۆنێ دا دهێتە ڤەكرن.
