ئەڤرۆ فیفا باشترینێن جیهانێ دێ دەستنیشان كەت
ئەڤرۆ
بڕیارە ئەڤرۆ ل پایتەختێ فرەنسا پاریس ئاهنگا سالانە یا The Best ئەوا ژلایێ ئێكەتیا تەپا پێی یا جیهانی فیفا دهێتە رێكخستن پشتی دەنگێن هەموو لژنەیێن تایبەتمەند و جەماوەری و رۆژنامەڤانان هاتینە كومكرن و ئەڤ شەڤە ب ئامادەبوونا هژمارەكا مەزن ژ ستێر و بەرپرسێن وەرزشی ل جیهانێ ژبۆ ژێگرتنا باشترین یاریزانێن كوڕ، كچ، جوانترین گۆل و باشترین گۆلپارێز و هەتا.
باشترین یاریزان
هەموو جەماوەرێ وەرزشی ل جیهانێ دێ چاڤەڕێ دەستنیشانكرنا باشترین یاریزانێ جیهانێ بن ئەوا دهێتە پێشبینیكرن د ناڤبەرا هەرسێ یاریزانان یێ ئەرجەنتینی و یانەیا پاریس سانجێرمان لیۆنێل مێسی، یێ فرەنسی و یانەیا ریال مەدرید كەریم بنزێمایی دیسان یێ فرەنسی و پاریس سانجێرمان كێلیان مباپی، بووچوون هوسا دهێنە دیاركرن لیۆنێل مێسی خودان چەنسەكێ مەزنە بۆ دەستڤە ئینانا خەلاتێ باشترین یاریزانێ جیهانێ ژبەركو بوویە ئەگەر هەلبژارتیێ ئەرجەنتین ناسناڤێ قارەمانیا جیهانی قەتەر 2022 ب دەستڤە ئینایی، بۆ زانین لیۆنێل مێسی شیایە شەش جاران ناسناڤی دستخوەڤە بینت،
باشترین یاریزانا كچ
دیسان بڕیارە باشترین یاریزانا كچ ژی بهێتە خەلاتكرن كو سێ یاریزان بەربژارێن بهێزن ئەو ژی، یا ئسپانی ئەلێكسیا بۆتیاس، یا ئنگلتەرایێ بێس مێد، یا ئەمریكی ئەلێكسیس مۆرگان.
خەلاتێ باشترین راهێنەر
ژلایەكێ دووڤە چەند راهێنەر دێ هەڤڕكیێ بۆ ناسناڤێ باشترین راهێنەرێ جیهانێ كەن ئەو ژی، یێ هەلبژارتیێ ئەرجەنتین لیۆنێل سكالۆنی ئەوێ دگەل هەلبژارتیێ خوە ناسناڤێ مۆندیالا قەتەر 2022 دەستڤە ئینایی، یێ ئیتالی و یانەیا ریال مەدرید كارلۆ ئەنشلۆتی سەركەفتیێ چامپیۆنز لیگ یا وەرزێ بۆری، یێ ئسپانی و یانەیا مانچستەر ستی پێب گۆرادیۆلا، ل سەر ئاستێ كچان راهێنەرا فرەنسی سۆنیا بۆمباستۆر ئەوا دگەل یانەیا لیۆن ناسناڤێ چامپیۆنز دەستڤە ئینایی و یا سویدی بییا سۆندهاچ راهێنەرا هەلبژارتیا بەرازیل و یا هۆلەندی سارینا ڤیگمان ئەوا دگەل هەلبژارتیێ ئنگلتەرا قارەمانیا ئۆرۆپا یا وەرزێ بوری دەستڤە ئینایی.
خەلاتێ بۆشكاش
دێ د ناڤبەرا هەرسێ یاریزانان بیت ئەو ژی یێ فرەنسی دیمێتری باییت یاریزانێ مارسێلیا گۆلا وی ل سەر یانەیا باۆك سالۆنیكی یا یۆنانسانێ، یاریزانێ هەلبژارتیێ بەرازیل ریتشالیسۆن لسەر هەلبژارتیێ سربیا د مۆندیالا قەتەر 2022ێ، یێ پۆلەندی مارتشین ئۆلیكسی یاریزانێ ڤارتا بۆونانی ل سەر گۆلا ستال جیشۆڤ.
باشترین گۆلپارێز
گۆلپارێزێن ل سەر ئاستێ كوڕان یێن بەربژار، یێ بەلجیكی و یانەیا ریال مەدرید تیبۆ كۆرتۆا، یێ مەغربی و یانەیا سیڤییا یاسین بۆنۆ و یێ ئەرجەنتینی و یانەیا ئاستۆن ڤیا ئیمیلیانۆ مارتینێز، ل سەر ئاستێ كچان یا ئەلمانی و یانەیا چێلسی ئان كاترین بیرگر، یا ئنگلتەرا و مانچستەر یۆنایتد ماری ئیبریس، یا چیكی و ئۆلمپیك لیۆن كریستیان ئاندلر.
خەلاتێن جودا
د چارچووڤێ رێورەسمێن ئاهنگێ دا فیفا دێ چەند خەلاتێن دی بەلاڤكەت ژ وانا خەلاتێ یاریا پاقژ، خەلاتێ باشترین جەماوەر.
