ئەڤرۆ قارەمانا ئیراقێ دێ ل دهۆكێ ئێكلا بیت
چاڤەڕێ یە ئەڤرۆ ل دەمژمێر دویێ پشتی نیڤرۆ ل هۆلا گرتیا كولیژەیا پەروەردەیا چەستەیی و زانستێن وەرزشی ل زانكۆیا دهۆك یاریا دووماهیا قارەمانیا كۆپا ئیراقێ یا فۆتسالا كچان د ناڤبەرا ئافرەتێن هەولێر و یانەیا جەویە مێڤان بكەت، د هەڤڕكیێن واندا ئەوا بۆ ماوەیێ هەشت رۆژە پارێزگەها دهۆكێ مێڤانداریا قارەمانیێ كری.
ل دۆر ڤێ قارەمانیێ سەرۆكا لژنەیا فوتسالا كچان د. رەشا تالب بۆ رۆژناما ئەڤرۆ گۆت: سۆپاسیا پارێزگارێ دهۆكێ د. عەلی تەتەر دكەین كو هەر ژ رۆژا ئێكێ پێشوازیا مە كری و پشتەڤانیا خوە یا تەمام بۆ ئەنجامدنا قارەمانیێ دیار كری و دگەل مە د هاریكار بوون، دیسان سۆپاس بۆ هەر لایەنەكێ بوویە ئەگەر كۆپا ئیراقێ ب سەركەفتیانە ب دووماهی بهێت، ل دهۆكێ گەشبینی بوو مە پەیدابوو كو نڤشەكێ یاریزانێن فۆتسالا كچان دهێتە درۆستكرن، مە گەلەك حەز دكر ژ پارێزگەها دهۆكێ ژی پشكداری هەبان لێ مخابن چو یانە نەبوون، هەڤڕكیێن كۆپا كۆمەكا مەزن یا یاریزانێن ستێر بۆ هەلبژارتیێ ئیراقێ ژی هاتنە دەستنیشانكرن.
بۆ زانین دەه یانەیێن ئیراقێ و ئێكا هەرێما كوردستانێ پشكداری كربوون ئەو ژی، ئافرەتێن هەولێر، جەویە، زەورا، تلسقۆف، قەرەقۆش، سیناعات كارەبا، ئال بدێر، رافیدەین، شەهربان و بیلادی، هاتبوونە بەلاڤكرن ل سەر دو كۆمان، یاریێن وان ب شێوەیێ خول ئێك قۆناغ دهاتنە كرن، ئەوا ژلایێ ئێكەتیا تەپا پێی یا ئیراقێ ب پشتەڤانیا دارایی و سەرپەرشتیا ئێكەتیا ئاسیا هاتیە رێكخستن.
