ئەڤرۆ كوڕێن خابووری دێ بزاڤێن دەربازبوونێ ژ ئاستەنگا (حدود)ی كەن
عەلی حاجی:
چاڤەڕێ دهێتە كرن ئەڤرۆ چار یاریێن دی ژ هەڤڕكیێن گەڕا 33ێ یا خولا ستێرێن ئیراقێ یا فوتبۆلێ ل یاریگەهێن جودا بهێنە كرن، یانەیێن رێزبەندیێن پێشیێ یاریێن ئاگرین هەنە و دێ بزاڤێ كەن جهێن خوە پارێزن و پێشڤە بچن، بڕیارە سوبەهی ب ئەنجامدانا دو یاریێن دی هەڤڕكیێن ڤێ گەڕێ ب دووماهی بهێن.
زاخۆیی ب ژڤانن بۆ سەركەفتنێ
ئەڤرۆ ل دەمژمێر شەشێ ئێڤارییەكا درەنگ جەماوەرێ وەرزشی یێ یانەیا زاخۆ ب ژڤانن ژبۆ پشتەڤانییا تیما خوە دەمێ ل یاریگەها زاخۆ یا نێڤدەلەتی مێڤاندارییا مێڤانا خوە یانەیا حدود یا بەغدایی دكەت د یارییەكێ دا كو بزاڤێن وان بەردەوامبن ژبۆ ب دەستڤە ئینانا سێ خالێن دی ب سەرپەرشتییا ڕاهێنەرێ خوە یێ نوو عەبدولغەنی شەهەد، كوڕێن خابۆری ئەوێن 57 خال كۆمكرین ژ 16 سەركەفتنان، نەهـ وەكهەڤی و حەفت خوسارەتی هەنە، یاریزانێن وان 46 گۆل تۆماركرینە و 24 گۆل ل سەر هاتینە تۆماركرن، د بەرانبەر دا یانەیا حدود خودانا 17 خالانە رێزا 20ێ و دووماهیێ دهێت.
محەمەد ئەلئەسوەد: ئەم ڕژدین ل سەر ئەنجامێن باش بەردەوامبین
ستێرێ یانەیا زاخۆ و هەلبژارتیێ یەمەنێ محەمەد ئەلئەسوەد دیار كر ئێدی ئەو دێ هەموو بزاڤان كەن نا هێلین خالان ژ دەست بدەن و گۆت: سۆزێ د دەینە جەماوەرێ خوە بۆ هەر یارییەكێ نە هێلین هیچ خالەكێ ژ دەستبدەین و رژدین ل سەر ئەنجامێن باش بەردەوامبین.
ژلایێ خوەڤە سەمیر زاخۆیی ڕێڤەبەرێ تیما زاخۆ گۆت: پشتی گوهۆڕین كەفتییە د كارێ ڕاهێنانێ دا ئاستێ تیما مە ژی تا ڕادەیەكێ باش هاتییە گوهۆڕین بۆ باشتر بوویە، یارییا بەرانبەر حدود گەلەك یا گرنگە و دڤێن هەموو بزاڤان بكەین سەركەفتنێ بینن، دگەل هوژداریێ كو دڤێت یاریزان ڤێ تیمێ ب كێماسی نە بینت و سڤكاتیێ پێ نەكەت
گۆلكەرێن یانەیا زاخۆ كینە؟
ژلایەكێ دووڤە یاریزانێن وێ 43 گۆلان د خولێ دا ئیناینە و بەلاڤكرینە ل سەر یاریزانان و بڤی شێوەیی، پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 13 گۆلان رێزا دویێ دهێت، ناسر ئەحمەد محەمەدو حەفت گۆل، ئەحمەد یاسین دو گۆل، دیبیۆتی ئۆگۆنا سێ گۆل، مەحمود فائیز ئەلئەسوەد دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، دیسان پاتریك مارسێلۆ گۆلەك تۆماركرینە كو سەرجەمێ گۆلێن زاخۆ بووینە 46 گۆل بەری دەستپێكرنا هەڤڕكیێن گەڕا 33ێ.
