ئەڤرۆ لاوێن ئیراقێ دێ كاروانێ خوە ل مۆندیالێ ب دووماهی ئینیت
دهێتە چاڤەڕێ كرن ئەڤرۆ ل دەمژمێر نەهی شەڤ هەلبژارتیێ لاوێن ئیراقێ بەرانبەر هەلبژارتیێ ئنگلتەرا بیت ژ چارچووڤێ گەڕا سێیێ یا كۆما پێنجێ ژ كۆپا جیهانێ مۆندیالا لاوان 2023ێ ئەوا دێ ل یاریگەها دیێگۆ ئارماندۆ مارادۆنا باژێرێ بیۆنس ئایرس یا وەلاتێ ئەرجەنتین میڤانداریا وێ كەت.
هەلبژارتیێ ئیراقێ د هەردو یاریێن خوە یێن بۆری دا تووشی خوسارەتیێ بوو و دەربازبوون بۆ قۆناغا 16ێ ژ دەستدایە، دگەل هەلبژارتیێ ئۆرۆگۆایی ب چار گۆلێن پاقژ خوسارەت بوو، د یاریا دویێ دا بەرانبەر هەلبژارتیێ تۆنس ب سێ گۆلێن پاقژ تووشی خوسارەتیا دویێ بوو، د یاریا ئەڤرۆ دا بەرانبەر ئنگلتەرا چو گوهۆڕین د هەلوەستێ دەربازبوونا ئیراقێ بۆ قۆناغا دووڤدا نا كەت، ژبەركو ئنگلتەرا ئەوا ب شەش خالان چوونا خوە مسۆگەر كریە، هەردو هەلبژارتیێن تۆنس و ئۆرگۆایی ب سێ خالان رێزێن دویێ و سێیێ دهێن، هەر ئەنجامەكی ئێك وان دێ دەربازبیت، دیسان دەلیڤەیا باشترین هەلبژارتییا رێزا سێیێ ژی نەمایە، بۆ زانین بتنێ جارەكێ هەردو هەلبژارتیێن ئیراقێ و ئنگلتەرا بەرانبەر ئێك بووینە ل مۆندیالا 2013 یا توركیا ئەوا ب دو گۆلان وەكهەڤبوون.
