ئەڤرۆ ل سەنتەرێ باژێرێ دهۆكێ گازا سپی دێ هێتە بەلاڤكرن
زنار تۆڤی:
دەڤەرداریا دهۆكێ دیار كر، ب هەڤكاریا رێڤەبەریا نەفت و كانزایان ل دهۆكێ، ئەڤرۆ ئێكشەمبی 12/11/2023 ل سەنتەرێ باژێرێ دهۆكێ ل دو جهان گازا سپی دێ هێتە بەلاڤكرن.
مللەت زكری، سەرپەرشتێ لژنا بەلاڤكرنا گازا سپی، ل دەڤەرداریا دهۆكێ، بۆ رۆژناما ئەڤرۆ گۆت: «ئەڤرۆ دەست ب بەلاڤكرنا گازا سپی ل سەر وەلاتیێن سەنتەرێ باژێرێ دهۆكێ دێ هێتە كرن، هەروەسا ئەڤ سالە ل سەنتەرێ باژێرێ دهۆكێ، 28 هزار و 247 سەرۆك خێزانان پلێتێن گازا سپی وەرگرتینە و پرۆسا بەلاڤكرنا پلێتان ژی یا بەردەوامە، ل قووناغا ئێكێ گازا سپی دێ ل گۆرەپانێن مزگەفتێن حەجی ئەحمەدی و سەیدۆ هێتە بەلاڤكرن و بۆ هەر بەرمیلەكا گازێ ژی دێ 100 هزار دینار هێنە وەرگرتن».
ناڤهاتی ئەو ژی گۆت: «بەلاڤكرنا گازا سپی ل رۆژێن بهێن ژی دێ یا بەردەوام بیت و گەرا دویێ یا پلێتێن گازێ دێ هێنە بەلاڤكرن و هەر جهەكێ پلێت هاتنە بەلاڤكرن ل نێزیك وی تاخی جهەكێ تایبەت دێ هێتە دەستنیشانكرن بۆ بەلاڤكرنا گازێ و خەلكێ وی تاخی دێ بەهرا خوە یا گازێ وەرگرن».
