ئەڤرۆ نيوز داخوازیێن رژێما بەشاری ژ شاندێ یەپەدێ ئاشکرا دکەت
ئه‌ڤرۆ نيوز:
پشتی ھەڤدیتنێن د ناڤبەرا شاندێ پەیەدێ و رژێما سووریێ ل باژێرێ شامێ کەسەکێ نێزیکی شاندێ پەیەدێ بۆ رۆژناما ئەڤرۆ دیار کر کو رژێما شامێ ١٢ خال وەکو داخوازی رادەستی شاندێ پەیەدێ کرینە و ل ھەمبەر ڤان داخوازیان ژی گۆتینە دێ فیدراسیۆنەکا سنۆردارکری یان ژی ھەرێمەکا ئۆتۆنۆمی بۆ کوردان ل سووریێ نوو ھەبیت.
خەلیل باوەر کەسەکێ نێزیکی شاندێ پەیەدێ کو بەری دو رۆژان سەرەدانا شامێ کربوو تایبەت بۆ رۆژناما ئەڤرۆ دیار کر کو ھەڤدیتن ل سەر داخوازیا رژێما بەشاری بوو و شاندێ یەپەدێ سەرەدانا شامێ کر، د سەرەدانێ دا شاندێ پەیەدێ بۆ حوکمەتا سووریێ دیار کرن کو ئێدی سووریە وەکو بەرێ ناھێتە برێڤەبرن و دڤێت سیستەمەکێ نوو بۆ سووریێ بھێتە دان و کورد و نەتەوێن دی کو ل سووریێ دژین ژی بگەھنە مافێن خوە.
ل ھەمبەر ھەلویستێ شاندێ پەیەدێ نوونەرێن رژێما سووریێ ژی ١٢ خال وەکو چارەسەری رادەستی شاندێ پەیەدێ کرن و ژ بۆ وان دیار کرن ھەکە ئالیێ کوردی ڤان ١٢ خالان قەبوول بکەن و بجە بینن دێ حوکمەتا سووریێ ژی بەرھەڤ بیت ل سەر فیدراسیۆنەکا سنۆردارکری یان ژی ھەرێمەکا ئۆتۆنۆمی بۆ کوردان گەنگەشێ بکەت، ژ بەر ھندێ ژی دھێتە چاڤەرێ کرن کو ھەڤدیتن د بەردەوام بن و گۆت: (چونکو ھەر دو شاندێن کو دەست ب ھەڤدیتنان کرن خوەدان بریارا دووماھیێ نینن و ژ بەر ھندێ ژی ھەر دو ئالی دێ داخوازیێن خوە ببەنە ناڤەندێن بریارێ و دیارە دێ پاشی دیسان ھەڤدیتن ھێنە کرن).
ل دۆر ١٢ خالێن کو رژێما سووریێ رادەستی شاندێ یەپەدێ کرینە ژی ناڤھاتی دیار کر کو رژێما سووریێ داخواز کریە کو کورد ھەر دو باژێرێن رەققە و دێرازۆرێ ب تەمامی رادەستی رژێما سووریێ بکەن- کۆنترۆلا سکرێ کارەبێ یێ فراتێ دڤێت رادەستی رژێمێ بھێتە کرن- پەترۆل و زێر و ھەموو ژێدەرێن داھاتی ل دەڤەرێن کوردی دڤێت رادەستی حوکمەتا سووریێ بھێتە کرن- نابیت ژ بلی ئالایێ سووریێ چو ئالایێن دی ل سازیێن فەرمی یێن دەولەتێ بھێنە بلند کرن- دڤێت فەرمانداریا ھەموو ھێزێن سەربازی یێن کوردی سەر ب شامێ و فەرمانداریا لەشکرێ سووریێ بیت- دڤێت پەیوەندیێن ل گەل وەلاتێن دەرڤە بھێنە راگرتن یان ژی ل ژێر چاڤدێریا شامێ ھەڤدیتن بھێنە کرن- چو ئاستەنگی ل ھەمبەر چاندنیێ ل دەڤەرا رۆژھەلاتێ فراتێ ژ ئالیێ سازیێن سەر ب دەولەتێ ڤە نەھێتە دروست کرن- ھەموو بەرھەمێن کشتوکالی یێن دەڤەرێن کوردی دێ ژ ئالیێ دەولەتا سووریێ ڤە ھێنە کڕین و دێ حوکمەتێ پارێ وان دەتێ- ل ھەمبەر داعشێ و گرۆپێن دی یێن تیرۆرستی دێ پێکڤە کار کەن- بریارا دەستەسەرکرنێ کو بەری نھا بۆ ھندەک بەرپرسێن سەربازی و سیاسی یێ کوردی ھاتبوو دان دێ ھێتە راکرن و دڤێت یەپەگە ژی ھەموو سەربازێن سووریێ ئازاد بکەت و ئاستەنگیان بۆ کارێ وان دروست نەکەت- د دستوورێ نوو یێ سووریێ دا دڤێت چاوانیا چارەکرنا پرسا کوردی بھێتە دیار کرن و یا دووماھیێ ژی دڤێت ل دۆر چارەنڤیسێ ھێزێن سەربازی یێن کوردی گەنگەشە د ناڤبەرا ھەر دو ئالیان دا بھێتە کرن دا بگەھنە چارەسەریەکا گونجای.
ناڤھاتی ئەو یەک ژی دیار کر کو ھەتا نھا شاندێ کوردی ل دۆر ڤان داخوازیێن رژێما سووریێ چو داخۆیانیێن فەرمی نەداینە، دیارە ھندەک ناڤەندێن خوەدان بریار ھەنە کو دڤێت ئەو بریارا دووماھیێ بدەن، لێ ھەتا نھا دیار نینە کا ھەڤدیتنا دویێ یا شاندێ پەیەدێ و رژێما سووریێ دێ کەنگێ و ل کیڤە بیت.
