ئەڤرۆ چارەنڤیسێ كۆما پارێزگەهێ د ناڤبەرا چار یانەیان دا دێ ئێكلا بیت
دهێتە چاڤەڕێ كرن ئەڤرۆ دو یاریێن ئاگرین و چارەنڤیس د ناڤبەرا چار یانەیێن پارێزگەها دهۆكێ دا بهێنە كرن ژبۆ ئێكلا كرنا دو تیمێن دەربازبوویی بۆ خولا پلا ئێك، ئەوا بڕیارە ژ چارچووڤێ هەڤڕكیێن خولا پلا دو یا گەڕا چارێ و دووماهیێ یا كۆما دویێ و پارێزگەهێ ل دەمژمێر 4:30 ئێڤاری هێنە كرن.
شێخان- تەناهی
ئێك ژ یاریێن چارەنڤیس بۆ هەردو یانەیێن كۆما پارێزگەها دهۆكێ، دەمێ یانەیا تەناهی ل یاریگەها زانكۆ مێڤانداریا یانەیا شێخان دكەت، تیما تەناهی خودانا سێ خالانە رێزا سێیێ دهێت ژ سێ وەكهەڤیان، بەرانبەر دا شێخان چار خال كۆمكرینە ژ سەركەفتن و وەكهەڤیەكێ و رێزا دویێ دهێت، ئەڤ یاریە یا بهێز بیت ژبۆ هەڤڕكیا دەربازبوو بۆ قۆناغا دویێ.
باتیفا- بەردەرەش
د یاریەكا دی یا ب هێز دا یانەیا بەردەرەش دێ بیتە مێڤانا یانەیا باتیفا ل یاریگەها وێ دا، تیما مێڤان سێ خال كۆمكرینە و رێزا چارێ دهێت، ژلایێ خوەڤە باتیفا دو خال هەنە ریزا پێنجێ دهێت، یانەیا بەردەرەش و باتیفا دێ شەڕێ سێ خالان كەن و چاڤەڕێ یاریا شێخان و تەناهی بن ژبۆ ئێكلا كرنا ئێك ژ تیمێن دەربازبوویی.
شێلادزێ چاڤەڕێ دو ئەنجامانە
تیما یانەیا شێلادزێ ئەوا نوكە ب شەش خالان سەرێ لیستێ دهێت د ڤێ گەڕێ دا یاریێ ناكەت و دێ چاڤەڕێ دو ئەنجامان بیت ئەو ژی، ئەنجامێ هەردو یاریێن ئەڤرۆ، دیسان ئەنجامێ دووڤچوونا لژنەیا تایبەت یا ئێكەتیا تەپا پێی ل سەر سكالایا یانەیا بەردەرەش ئەوا دیاركری كو یانەیا شێلادزێ سەرپێچییا یاسایا ئێكەتیا تەپا پێی یا كوردستانێ كریە ب پشكداریكرنا چار یاریزانێن پیشەكار رەكەز عەرەب ل جهێ سێ یاریزانێن دەستنیشانكری، ل دووڤ رێنمایان هەر یانەكێ مافێ هەیی سێ یاریزانێن پیشەكار پشكداربكەت و هەكە سەرپێچی كر دێ هێتە سزادانا ب خوسارەتی 3-0 ، دبیت ئەڤ بڕیارە بهێتە دەركرن و كارتیكرنێ ل سەر دەربازبوونا تیما شێلادزێ بكەت، هەرچەندە دیاریا دگەل بەردەرەش ب گۆلەكێ وەكهەڤبوون لێ چارنڤیسێ وێ هێشتا دیار نینە.
