ئەڤرۆ چلیا هەلبەستڤان (خورشید ئەحمەد پیرۆمەری) ل دهۆكێ دێ هێتە گێڕان
شاكر ئەتروشی:
ب هەلكەفتا بۆرینا چل رۆژان ل سەر وەغەركرنا هەلبەستڤان و رەوشەنبیر و كەسایەتیێ دیارێ پارێزگەها دهۆكێ (خورشید ئەحمەد پیرۆمەری) ب پشتەڤانیا رێڤەبەریا گشتی یا رەوشەنبیری و هونەری ل پارێزگەها دهۆكێ و ناڤەندا خانی یا رەوشەنبیری و راگەهاندنێ، گرۆپێ فەلەك یێ رەوشەنبیری و جڤاكی، ل بەرە ئەڤرۆ سێشەمبی رێكەفتی 29/7/2025 ئاهەنگەكا ماتەمینی ل هولا سەنتەرێ پێشمەرگە یێ رەوشەنبیری بگێڕیت و هژمارەكا بڕگە و پەنەلان هاتینە بەرهەڤكرن.
حەسەن فەتاح، پەیڤدارێ رێڤەبەریا گشتی یا رەوشەنبیری و هونەری ل پارێزگەها دهۆكێ ل دۆر بەرنامەیێ ئەڤرۆ گۆت: ژبەركو خال خورشید رەوشەنبیرەك و كەسەكێ خۆشتڤی و دیارێ پارێزگەها دهۆكێ بوو، هەروەسا گەلەك خزمەت د بۆارێن جودا دا ب تایبەت ژی ئەدەبی و هونەری بۆ پارێزگەها دهۆكێ كریە، لەورا مە بزاڤ كریە دڤێ چالاكیا ئەڤرۆ دا هەر چو نەبیت هندەك ژ خزمەتێن وی بەرچاڤ بكەین، بەرنامە ل دەمژێر پێنجی ئێڤاری دێ دەست پێ كەت، چەند پەیڤ هاتینە ئامادەكرن، ژوانا پەیڤا ئێكەتیا نڤیسەرێن كورد/ تایێ دهۆكێ و پەیڤا سەندیكا هونەرمەندێن كوردستانێ/لقێ دهۆك و پەیڤا گرۆپێ فەلەك یێ رەوشەنبیری و جڤاكی ل گەل پەیڤا بنەمالێ، د دووڤدا رێزدار (ئحسان ئامێدی) بەرپرسێ ناڤەندا خانی یا رەوشەنبیری و راگەهاندنێ دێ هندەك بیرهاتن و بیرەوەریێن خوە ل گەل خال خورشید ڤەگێڕیت، هەروەسا بەلگە فلمەكێ دكیۆمەنتاری ل دۆر ژیان و بەرهەمێن ئەدەبی یێن هەلبەستڤانێ وەغەركری (خورسید پیرۆمەری) هێتە نیشادان و هەلبەستڤان (خورشید باكۆزی) ژی دێ هەلبەستەكێ كەتە دیاری بۆ خال خورشیدی و نڤیسەر و هەلبەستڤان (زوهێر كۆرەماركی) ژی دێ ب كورتی بەحسێ بزاڤێن وێژەی یێن خال خورشید پیرۆمەری كەت.
