ئەڤرۆ کلاسیکو یا کوردستانێ یە و ئەرکێ نوونەرێن دی یێ ب زەحمەتە
ئەڤرۆ، قەیس وەیس:
یاریێن گەرا پێنجێ یێن خولا نایابا کوردستانێ یا تەپا پێ بریارە ئەڤرۆ و سوباھی دەستپێبکەن د گرنگترین یاریێن ڤێ گەرێ دا دێ دیربیا کوردستانێ دناڤبەرا دھۆک و ھەولێرێ ھێتە ئەنجام دان و زێرەڤانی ژی دێ پێشمەرگا سلێمانیێ مێڤان کەت ژبو ب دەستڤە ئینانا سێ خالان و زاخۆ و ئاکرێ دێ ژ دەرڤەی یاریگەھێن خوە یاریێن بھێز دگەل نەورۆز و گازا باکور کەن.
دیاریا ئێکێ دا ئەوا بریارە ئەڤرۆ ل یاریگەھا دھۆکێ بھێتە کرن تێدا یانا دھۆک خودانا رێزا دویێ ب دەە خالان دێ ھەمی بزاڤان کەت سەرکێشیا خولێ بزڤرینیت دەمێ یاریەکا بھێز دگەل یانا ھەولێرێ خودانا رێزا پێنجێ ب شەش خالان ئەنجامدەت.
ل دور ڤێ یاریێ کاپتنێ تیما یانا دھۆک جاسم حاجی بۆ رۆژناما ئەڤرۆ گۆت: تیما مە یا گەھشتیە ئاستێ خوە یێ دروست و ئەم د بەرھەڤین بۆ ڤێ یاریێ و ئارمانجا مە تنێ سێ خالێن یاریێ نە بدەستخوڤە بینین و جارەکا دی بەرب سەرکێشیا خولێ ڤە چین ئەوا ب زوری و بریار ژ مە ھاتیە ستاندن و یاری دێ یا بھێز بیت ژبەرکو ب دێربیا کوردستانێ دھێتە ناسین و ب ئانەھیا خودێ دێ د روژا خودا بین و سەرکەفتنێ تومارکەین.
ژ ھەمان گەر نوونەرا دویێ یا پارێزگەھێ یانا زاخۆ خودانا رێزا یازدێ ب سێ خالا دێ ھەولدەت ئێکەم سەرکەفتن ئەڤ سالە ژ دەرڤەی یاریگەھا خوە ل باژێرێ سلێمانیێ توماربکەت دگەل یانا نەورۆز خودانا رێزا دەھێ ب پێنج خالا.
ل دور ڤێ یاریێ عەمەر عەبدوللا یاریزانێ یانا زاخو دبێژیت: پشتی ڤەگەریانا سێ یاریزانێن مە کو دێ د ڤێ یاریێ دا ئامادەبن مە ھەمی یاریزانا سوز دایە ب ھەمی شیانێن خوە ژبو ب دەستڤە ئینانا خالێن یاریێ بکەین، لێ دڤێت ژبیر نەکەین یانا نەورۆز د ناف یاریگەھا خوە دا یا بھێزە و ئەرکێ مە یێ ب ساناھی نابیت.
نوونەرا سیێ یا پارێزگەھێ ئەڤرۆ ل باژێرێ کەرکوکێ یانا ئاکرێ خودانا رێزا دوازدێ ب سێ خالان دێ مێڤانا یانا غاز شیمال بیت خودانا رێزا حەفتێ ب پێنج خالان د یاریەکا بھێز دا و تێدا ھەردو یانە پێدڤی ب سێ خالێن یاریێ نە بۆ باشترکرنا ھەلویستێ خوە.
ل دور ڤێ یاریێ رەیان عەبدولقادر یاریزانێ یانا ئاکرێ بۆ رۆژناما ئەڤرۆ دبێژیت: بەرھەڤیێن مە وەکی ھەر یاریەکێ نە ئاریشێن مە جەستەیی نە، لێ یاری بۆ یاریێ یێن چارەسەر دبن و دبەرھەڤین خالێن یارێێ بدەستخوڤە بینین و سوزی ددەینە جەماوەرێ ئاکرێ ھەمی شیانێن خوە مەزێخین ژبو پشتەڤانیێ و خوە رازی کەین و دلێ خوان خوش بکەین.
ژ ھەمان گەر و ل روژا ئەینی یانا زێرەڤانی خودانا رێزا ھەشتێ ب پێنج خالان دێ مێڤانداریا یانا پێشمەرگا سلێمانیێ خودانا رێزا ئێکێ ب دەە خالان کەت، دیاریەکێ دا زێرەڤانی دێ ھەول دەت قەرەبویا خالێن ژ دەست چوین بکەت دیسان سەرکەفتنا وێ دێ خزمەتەکا مەزن پێشکێشی یانا دھۆکێ کەت داکو ئەگەر یانا دھۆک ژی سەرکەفتن تومارکر دێ بێ ھەڤرک پێشڤە ھێتە رێزا ئێکێ و پێشمەرگە ھەولێن سەرکەفتنێ کەت ژبو مانا خو ل سەرکێشیا کومێ .
ل دۆر ڤێ یاریێ ئەیوب ئەیاد ھێرشبەرێ یانا زێرەڤانی دبێژیت: د رژدین بو بدەستڤە ئینانا خالێن یاریێ ژبەرکو دێ مە نیزیکی ھەڤرکیێ کەت و بەروڤاژی ھەر ئەنجامەکێ نەباش دێ مە بەرب رێزێن پاشیێ بەت بەرامبەر یانا پێشمەرگە ھەتا نوکە ئاستەکێ باش یێ پێشکێشکری، لێ ئەم درژدین سەرکەفتنێ ل سەر توماربکەین.
ژ یاریێن دی یێن ڤێ گەرێ ھەندرین دێ دگەل ئارارات کەت و دیسان دەربەندیخان ژی دێ برایەتی مێڤان کەت، ھەروەسان پێشمەرگا ھەولێرێ ھەمبەر یانا شێروانە.
