ئەڤرۆ یارییا دهۆك و شورتە دیدارا قارەمانانە
بڕیارە ئەڤرۆ ژی چار یاریێن مایی ژ هەڤڕكیێن گەڕا دویێ ب دیدارێن ئاگرێن یا خولا ستێرێن ئیراقێ یا فوتبۆلێ بهێنە كرن، دهۆك قارەمانا كۆپا ئیراقێ و شورتە قارەمانا خولا ئیراقێ و ژلایەكێ دووڤە زەورا و تەلەبە د گرنگترین و هێزترین یاریێن ڤێ گەرێ دێ ل پایتەختێ ئیراقێ بەغدا و باشۆرێ ئیراقێ هێنە كرن.
دیدارا قارەمانان
بڕیارە ئەڤرۆ ل دەمژمێر شەشێ مەغرەب تیما فوتبۆلا یانەیا دهۆك ل یاریگەها فەیحا ل باژێرێ بەسرا ببیتە مێڤانا یانەیا شورتە ئێك ژ ب هێزترین یاریێن ڤێ گەڕێ دا، هەرچەندە بڕیاربوو ئەڤ یارییە ل یاریگەها شەعب هاتبا كرن لێ ژ نشكەكێ ڤە شورتە ڤەكوهاستە یاریگەها فەیحا، سەرباری نەرازیبوونا یانەیا دهۆكێ لێ ببووهانەكێ فدراسیۆنا فوتبۆلا ئیراقێ ڕازیبوو.
ئەلهۆیێن چیا قارەمانێن كۆپا ئیراقێ دێ بنە مێڤانێن شورتە قارەمانێن خولا ستێرێن ئیراقێ، ئەڤ دیدارە یا قارەمانا نە،د گەڕا ئێكێ دا دهۆك دەستڤالا بوو پشتی ب گۆلەكێ تووش خوسارەتیێ بووی بەرانبەر مێڤانا خوە ئەلگەرمە، بۆ ڤێ یاریێ دێ بێ بەهر بیت ژ شیانێن ستێرا خوە هارۆن ئەحمەد ژبەر هنگاڤتنێ و پیتەر گۆرگیس، پاشەنگ عەبدوللا و یوسف ئەلئیمام ژبەر ئەگەرێن جودا، د بەرانبەر دا یانەیا شورتە دێ ب هەموو یاریزانێن خوە یا بەرهەڤبیت ئەوا ل یارییا ئێكێ یا خولێ ژبەر كۆپا ئاسیا نەكربوو.
د دووماهی پێنچ دیدارێن هەردو تیمان دا سێ سەركەڤتن بۆ شورتە و ئێك بۆ دهۆكێ و وەكهەڤییەك هاتییە، پشتەڤانێن دهۆكێ چاڤەڕێ سەركەڤتنا ئێكێ نە و ڤەگەریان بۆ ئاست و ئەنجامێن باش.
ژ یاریێن دی یێن ئەڤرۆ
تیما یانەیا زەورا دێ ل یاریگەها خوە یانەیا تەلەبە ل دەمژمێر 8:30 شەڤ مێڤانكەت كو ئێك ژ یاریێن جەماوەری و ب هێز د ڤێ گەرێ دا، ژلایێ خوە ئەلغرف – كارەبا، ل دەمژمێر 8:30 شەڤ، ئەمانەت بەغدا- مووسل، دەمژمێر شەشێ ئێڤاری.
شرۆڤەكارەكێ وەرزشی: ئەركێ یانێن كوردستانێ ب سانەهی نابینیت
وەحید رەشید شرۆڤەكارێ وەرزشی و شارەزایێ ڕاهێنانێ ل پارێزگەها دهۆكێ بۆ رۆژنامەیا ئەڤرۆ گۆت:
ل دوڤ ئەنجام و ئاستێ یارییا بۆری یا دهۆكێ یێ باش نەبوو كو دەستپێكەكا خراب هاتییە د خولێ دا، لێ ئەڤە نابیتە ئەگەر كو یاریێن دووڤدا بەردەوامبیت، یارییا ئەڤرۆ بۆ دهۆكییان گەلەك یا بزەحمەتە بەرانبەر شورتە قارەمانا خولێ و پشكدارا كۆپا ئاسیا، لێ یانەیا دهۆك پێدڤی ب قەرەبوویا خالانە پێخەمەت ڤەگەڕیان بۆ هەڤڕكییان، هەرچەندە یارییا دویێ یە ژ سەرجەمێ 38 یاریێن خولێ هێشتا زوویە بڕیارێ ل سەر بدەین لێ گەشبینن دێ دهۆك یاری بۆ یاری باشتر بیت ئەڤچەندە ژی دەم بۆ دڤێت.
