ئەڤرۆ یانەیا ئافرەتێن دهۆكێ چاڤ ل ناسناڤێ ئیراقێ یە
قەیس وەیس:
چاڤەڕێ دهێتە كرن ئەڤرۆ تیما یانەیا ئافرەتێن دهۆكێ ل دەمژمێر 12ێ نیڤرۆ ل یاریگەها یانەیا دهۆكێ یا سێیێ بەرانبەری یانەیا ئەلبدێر ژ باژێرێ دیوانییە بییت، ژ چارچووڤەیێ فینالا قارەمانییا ئیراقێ یا فوتبۆلێ بۆ شەش یاریزانی و چاڤ ل ناسناڤێ ئێكێ یێ ڤێ قارەمانیێ یە، ئەوا هەشت یانە پشكدارن و هاتینە بەلاڤكرن ل سەر دو كۆمان، یاریێن وان ب شێوەیی خول كەتنا دۆجاركر، خودانێن ڕێزێن ئێكێ و دویێ یێن هەر كۆمەكێ دێ دەربازبنە چارگۆشەیا زێرین، ئەوا ب چاڤدێرییا د. عەلی تەتەر پارێزگارێ دهۆكێ ژلایێ فدراسیۆنا فوتبۆلا شەش یاریزانی یا ئیراقێ ب هەڤكاری دگەل ڕێڤەبەرییا وەرزشی ل دهۆكێ دهاتنە بڕێڤەبرن.
دەربازبوونا هەردو یانەیان چەوا بوویە
تیما یانەیا ئافرەتێن دهۆكێ ژ قووناغا كۆمان وەكو خودانا سەرێ لیستێ دەربازبوو قووناغا پێش دووماهیێ پشتی ب سەركەڤتی ل سەر یانەیا سۆران، ژلایێ خوەڤە یانەیا ئالدبدێر دەربازبوو یارییا فینالی پشتی ڕێزا دویێ د كۆما دویێ دا هاتی و قووناغا پێش دووماهیێ دا ب لێدانێن پەنەلتیان سەركەڤت بوو ل سەر یانەیا ینت ئەلعیراق ب4-3 گۆلان.
ئێكەم پشكدارییا كچێن دهۆكێ یە
ئەڤ قارەمانییە سالانە ل پارێزگەهەكێ دهێتە كرن، د وەرزێ ئەڤ سالە دا بۆ جارا ئێكێ یە تیما ئافرتێن دهۆكێ پشكداربوو، ئەوا ل سەر ئاستێ فوتسالێ شیایی سێ ناسناڤێن كوردستانی و ئێكا پارێزگەها دهۆكێ ب دەستڤە بینت.
ڕاهێنەر پشت گەرمە ب هیڤییە ناسناڤی ب دەستڤە بینن
د داخویانیەكێ دا ئاراز سالح گەشبینە دیارییا ئەڤرۆ دا تیما وان ب شێت سەركەڤتنێ بینت و ناسناڤێ قارەمانیێ ب دەستخوەڤە بینت و گۆت: پێنەڤێت یارییا فینالێ بۆ هەر تیمەكێ یا ب سانەهی نابیت، ئەو تیما دهێتە ڤێ قووناغێ ژ هێزەكێ یا هاتی، دێ یارییەكا پری هەڤڕكی بیت بۆ بلندكرنا كۆپا قارەمانیێ، مە یاریزانێن خودان شیان هەنە، سەربار ئەڤە جارا ئێكێ یە تیما مە پشكداری ڤێ قارەمانیێ بوویە كو شێوازەكێ نوویە، هەروەسان كارتیكرن ل سەر ئاست و چەستەیی راستەقینە یێ یاریزانان هەبوویە لێ ب مۆرالەكا بلند یاریزان بەرهەڤن و ب هیڤی نە ناسناڤی ب دەستڤە بینن.
بۆ زانین ئەو یانەیێن پشكدار هەر ئێك ژ یانەیا ئافرەتێن دهۆك، بنت ئەلعراق، رۆژهەلات، یانەیا سۆران، یانەیا قەرەقۆش، هەلەبچە، یانەیا ئالبدێرـ ئانەیا تلسقۆف.
