ئەڤرۆ یانەیێن پارێزگەهێ د دو یاریێن چارەنڤیس دا
قەیس وەیس:
دهێتە چاڤەڕێ كرن ئەڤرۆ یاریێن گەڕا سێیێ ژ هەڤڕكیێن پلا دو یا كوردستانێ و قۆناغا دووماهیێ و دەربازبوو بۆ پلا ئێكا تەپا پێی ب ئەنجامدانا سێ یارییان بهێتە كرن، پشتەڤانێن هەردو یانەیێن پارێزگەها دهۆكێ شێلادزێ و تەناهی ب هیڤی نە تیمێن وان سەركەفتنا ئێكێ بینن پێخەمەت گەشگرنا هیڤیێن هەڤڕكیێ ئەوا بڕیارە هەردو یانە ل سنۆرێ باژێرێ دهۆكێ یاریێن خوە ل دەمژمێر پێنجی ئیڤاری ئەنجامبدەن.
تیما شێلادزێ دێ ل یاریگەها سێیێ یا یانەیا دهۆك مێڤاندارییا یانەیا هەلەبجەیا شەهید كەت د یاریەكا پری هەڤڕكی دا، نوونەرا پارێزگەهێ ژ دو یارییا بتنێ وەكهەڤی و خۆسارەتیەك هەیە و ب خالەكێ رێزا پێنجێ و بەری دووماهیێ دهێت، بەرانبەر دا تیما مێڤان چار خال كۆمكرینە و سەرێ لیستێ دهێت، شێلادزێ پێدڤی ب سەركەفتنێ هەیە ژبۆ ڤەگەڕاندنا هیڤیێن دەربازبوونێ و دێ ب سەركێشییا راهێنەرێ خوە تارق تعێمە بزاڤێن سەركەفتنا ئێكێ كەن.
ژلایێ خوەڤە تیما یانەیا تەناهی ژی دێ یارییا چارەنڤیس و شەڕی بۆ سێ خالان كەت دەمێ ل یاریگەها زانكۆیا دهۆك مێڤاندارییا یانەیا بەختیاری دكەت، تەناهی ژ دو یاریێن خولێ خۆسارەتی دایە و نەشیاییە چو خالان كۆمبكەت و د نوكە دا بێ خال ل رێزا شەشێ و دووماهیێ دهێت، بەرانبەر دا تیما بەختیاری چار خال كۆمكرینە كێمتر گۆلان رێزا دویێ دهێت، بۆ یاریا ئەڤرۆ دڤێت سەركەفتنێ بینت ژبۆ بەردەوامییا هەڤڕكیێ بۆ پلێتەكا دەربازبوونێ لێ هەكە خوسارەت بوو ئێدی دێ هیڤیێن دەربازبوونێ ژ دەست دەت.
ژ یاریێن یێن ئەڤرۆ، یانەیا پەرەوەردە دێ بیتە مێڤانا مەخمۆر، بۆ زانین 19 یانەیێن هەرێمێ پشكداری كربوون و هاتبوونە بەلاڤكرن ل سەر سێ كۆما، كۆما پارێزگەها دهۆكێ پێكهاتی بوون ژ یانەیێن، شێخان، تەناهی، شێلادز، دینارتە، باتیفا، بەردەرەش، هەر كۆمەكێ دو یانە دەربازبوونە قۆناغا دووماهیێ.
