ئەڤسالە دێ شوقە بۆ كرێداران هێنە ئاڤاكرن
هەولێر، قائید میرۆ:
پەیڤدارێ دەستەیا گشتیا وەبەرهێنانێ دیار كر، بەردەوام حوكمەتا هەرێما كوردستانێ یا كار دكەت بۆ دەستپێكرنا پڕۆژەیێ ئاڤاكرنا یەكەیێن ئاكنجیبوونێ بۆ خەلكێ هەژار ب قستێن دومدرێژ و دبێژیت: ئەڤ سالە دەست ب ئاڤاكرنا وان یەكەیان دێ هێتە كرن.
بەرگەشت ئاكرەیی، پەیڤدارێ دەستەیا گشتیا وەبەرهێنانێ بۆ رۆژناما ئەڤرۆ دیاركر، بڕیارا مەسرور بارزانی، سەرۆكێ حوكمەتا هەرێما كوردستانێ بۆ ئاڤاكرنا 20 هزار یەكەیێن ئاكنجیبوونێ بۆ خەلكێ هەژار و كرێدار ب قستێن دومدرێژ و بهایەكێ ئەرزان هەیە و گۆت: «ئەگەرێن گیرۆبوونێ ژی بۆ ئاریشەیا دارایی ڤەدگەڕیت، بەلێ ئەم پشتڕاستین دێ چارەسەر بیت و تشتەكێ دەمكیە».
گۆتژی: «حوكمەت یا كار دكەت و بزاڤ د بەردەوامن، د ئەڤسالە دا ئەو پڕۆژە بچیتە د بیاڤێ بجهئینانێ دا و دەست ب ئاڤاكرنا شوقەیان بهێتە كرن، چونكی حوكمەتا هەرێمێ هەموو بزاڤەكێ دكەت خەلكێ كرێدار و هەژار ببیتە خودان جهێ ئاكنجیبوونێ و ژ كرێداریێ رزگارببیت».
